Bonde Kaya Tena Nɛ Kɔlɔ Efula Nganɛ?

ETENA katoyodjasɛka dia mbadia jurunalɛ mɔtshi, menda televiziɔ kana dia nonga nsango ya l’aradiyo, shi wɛ tokongɛka dia mɛna kana mboka nsango ya kɔlɔ? Ondo wɛ hatokashimɔka lam’okayɛ ɔnɛ ta dimɔtshi dialɔwɔ nshi nyɛ diekɔ lo tetemala ndjaka anto, awui a ngala wekɔ lo tatetemala fulanɛ, kana ɔnɛ ndjala ka kasha kekɔ lo tatetemala mɛnya anto pâ lo wodja wele bu l’ekondjelo k’efula.

Naka wɛ mbidjasɛ lo dihole dianganyi yema la lɛnɛ atomba akambo asɔ, kete ondo aha nshi tshɛ mbatoyolekaka ndjâkiyanya lam’okayɛ awui wa ngasɔ. Ko akɔna mɛtɛ mɛtɛ akoka mbetawɔ ndjadja lo dihole dia lokema l’anto asɔ wasowa na? Koyanga mbediɔ ɔsɔku, ekɔ wolo efula wɛ monga ko hoki kandji l’asolo naka wɛ ambɛna woho wasowa anto. Kɛdikɛdi, mbadia awui w’ata l’ekanda ndo kanyiya lofulo l’anto wahomɔ mpokoso, tshikitana efula la mbadia ɔkɔndɔ wa yana ya hiami y’ɛnɔnyi divwa y’Ose Bosnie yelɛwɔ Adnan; nyango akavu lam’akahandjola bɔɔmbɛ kɛmɔtshi luudu lawɔ vwa. L’ɔkɔngɔ wa ngɔndɔ ngana tsho, lam’akawatakɛndakɛndaka l’otadimbo nde la she, onto ɔmɔtshi lakɔlama lo dihole dia woshamu akakande she Adnan ko nde akavu. L’ɔkɔngɔ wa mingu ngana tsho, kadiyɛnde akakɛlanɛ dikila woho w’anyanya nɛ dia nde akatokamɛ ekoma watowokundɛka lo nkɛtɛ lo sɛkɛ dia kalasa ko akavu lo asho w’Adnan. Adɔkɔtɛlɛ wakasakɛka Adnan lo mpota kakandahomɔ l’asolo wakɛnyi ɔnɛ dikɛnda dia pami sɔ akayala oko onto lambɔla yɔɔ, oko onto laya bu l’otema w’onto​—⁠hayoka kânga mposa ka mbeya dikambo. Wɔma la suvɛnirɛ y’akambo wakete yakoyɛka la shashimoya lo yimba yakawoshaka pâ lo lumu la yanyi; l’otsho, eheka wakandɛnaka wakafukutanyaka djɔ yande. Akambo wakakomɛ Adnan bu akambo wa lokanyiya kana wa lɔfɔnya. Nde ekɔ tshondo y’ɔna lasowa; ndoko woho wahatakoke mbôka kɛtshi.

Ngasɔ mbele ndo ekakatanu ekina wa l’andja ɔnɛ. Mbadia dikambo dia ndjala ka kasha lo tojurunalɛ tshikitana efula la mɛna fɔtɔ ka yana ya yimato y’ɛnɔnyi etanu la dikundju diaya oko kanga diemi ndo ekolo wa totshitshɛ totshitshɛ wate kana nɛngɛsɛ y’asami, ko aya l’asa eko la nyɔi l’ɔtɛ wa ndjala ka kasha. Mbadia lofulo l’akambo a ngala tshikitana efula la mboka lokumu l’ɔnɛ ekumanyi ka omoto kele wadi aki odo akakulama ludî oko nyama, wakawɔhɔtɔla diangɔ diande, ndo wakeyana la nde la wolo. Mbadia woho wambolana nkumbo tshikitana efula la mboka ɔnɛ mama kɛmɔtshi ndashaka ɔnande hita ndjala l’okonda ndo mbɔhɛnyahɛnyaka l’osehe wa tshɛ.

Ndjâka ndo kandji wɛ mbadia awui wa ngasɔ. Koko naka sui dimɔtshi dia l’atei w’asui asɔ wahɛnyahɛnya anto l’andja w’otondo diambokokomɛ wɛmɛ, kete lâsɔ ambotoleka tshɛ kɔlɔ! Etena kasowa tshondo yayɛ wɛmɛ, awui wasalema lo nkɛtɛ k’otondo watɛkɛtawɔ lo tita nsango ta l’andja ɔnɛ mbeyaka kohandjola yimba vwa. Ndjâka ndo wɔma mɛna ɔnɛ fɔnu y’oma l’awui w’epetenge, ata, ndjala ya kasha, la hemɔ, yekɔ lo tafulanɛ tsho lo yɛdikɔ yahatɛnamaka ndoko lushi lo lɔsɛnɔ l’onto lanɛ la nkɛtɛ. Lo mɛtɛ, etombelo w’oma lo woho wahomana anto l’akambo wasalema mɛtɛ l’eleko kɛnɛ ka 20 kokaka monga weke efula​—⁠okandanu, wɔma ndo otshutshumalo, ekɔ awui wambokokanɛ le anto tshɛ.

Anto wa l’ɛtɛmwɛlɔ efula nyangaka ekadimwelo lo wembola wa nganɛ wahandjola anto wɔɔngɔ: Lande na kaya akambo kɔlɔ efula nganɛ na? Otsha lende atatshu anto wa l’andja ɔnɛ na?

Lonyangu ko, ɛtɛmwɛlɔ wa nshi nyɛ hawoleke mbisha anto ekadimwelo w’ɛlɔlɔ lo wembola ɛsɔ. Lam’akayɛnyi dimbola dia ngasɔ ntondo diofundami lo lohoso la jurunalɛ nyɛ, ondo wɛ akadje tamu ɔnɛ ndoko okadimwelo wa mɛtɛ wayoyokondja​—⁠ndo ɔsɔ ekɔ dui diokɛma. Ɛtɛmwɛlɔ watshininala paka l’awui w’ashidi ato ndjâtshutshuyaka tena efula dia nembetshiya akambo wele bu lo Bible ko mbutaka ɔnɛ oma lɔkɔ mbowaɔshiwɔ​—⁠vɔ toyatshutshuyaka dia shikikɛ lushi la wonya wayoya ekomelo k’andja ɔnɛ. (Enda lo Mateu 24:36.) Afundji wa jurunalɛ nyɛ ndekaka nanga tshika Bible tɔ twamɛ ndjâlembetshiya. Ondo wɛ ayamba dia mboka ɔnɛ Bible tɛkɛtaka awui wa lo nshi y’ekomelo lo yoho yasungana ndo awui akɔ mɛtɛ wekɔ lo salema. Ndo nto, Bible hakome paka lo mɛnya lande na kaya awui kɔlɔ efula nganɛ. Tɔ toshaka ndo elongamelo ka lo nshi yayaye, elongamelo katokeketsha mɛtɛ. Tambokɔlɔmba dia wɛ mbadia asawo wahɔnyi la nɛ dia wɛ mɛna ɔnɛ dikambo sɔ diekɔ mɛtɛ.

[Caption on page 3]

[Caption on page 3]

Jobard/Sipa Press