Ɔkɔnwɛlɔ wa mpota y’oma lo ta

ABRAHAM aki ɔsɔlayi wa wolo wakalɔ ata l’edja k’ɛnɔnyi 20.a Koko nde amboyotshika awui w’ata ndo hatshɔki nto lo ta pondjo. Kakianɛ, atunyi ande amɔtshi w’edjedja waya angɛnyi ande wa mamba. Kakɔna kakokimanyiya dia sala otshikitanu ɔsɔ na? Bible mbakokimanyiya. Tɔ kakasha Abraham elongamelo ndo yimba yakokimanyiya dia nde mɛna akambo w’anto oko awaɛna Nzambi. Bible akanya omposaposa ande wa ta, ndo nde akatatɛ la shidiya ɔkɛyi, shɔkɔ, lohetsho, ndo tokumbɛkumbɛ taki lande. Nde akayoshola dia Bible kekɔ l’okanga wa mamba wakɔnɔla mpota ya l’asolo.

Bible ngande wakimanyiyatɔ onto dia kɔnɔla mpota yande ya lo yimba na? Tɔ kokoka tshikitanya akambo wakakomɛ Abraham. Koko, wadielo w’Ɔtɛkɛta waki Nzambi ndo woho wakandakanaka la wɔ yimba akakimanyiya Abraham dia nde monga l’ekanelo kele oko kaki Otungi. Kakianɛ nde aya l’elongamelo ka lɔsɛnɔ la lo nshi yayaye, ndo aya l’akambo w’eyoyo wahombande mbetsha lo dihole dia ntondo lo lɔsɛnɔ lande. Akambo wele ohomba le Nzambi mbaya ohomba le nde. Kam’akatatɛ dikambo sɔ salema mbakatatɛ nkɔnɔ mpota yande ya l’asolo. Ngasɔ mbakakimanyiyama Abraham dia tshikitanya lɔsɛnɔ lande.

Akayatambiya lo ta dia wodja

Abraham akotɔ l’Afrika l’ɛnɔnyi wa 1930. L’ɔkɔngɔ wa ta dia hende di’andja w’otondo, wodja ande wakalɔmbwama oma le wodja okina wakasukana la wɔ waki la wolo efula, koko anto efula wa lo wodja waki Abraham wakalangaka kondja dipanda. L’ɔnɔnyi wa 1961, Abraham akayɔtɔka l’olui w’anto wakayangaka dipanda, ndo wakayɔlɔsha wodja wa wolo wakasukana la wɔ wakâlɔmbɔlaka.

Abraham ate: “Vɔ waki atunyi aso. Vɔ wakɔtɔ sheke dia todiaka, ɔnkɔnɛ, sho lawɔ takayange woho wa mbadiaka.”

Mbala efula lɔsɛnɔ laki Abraham laki lo wâle, ɔnkɔnɛ l’ɔnɔnyi wa 1982, l’ɔkɔngɔ wa nde mbetsha ɛnɔnyi 20 lo talɔka ata, nde akalawɔ otsha l’Erɔpɛ. L’etena kɛsɔ nde aki l’ɛnɔnyi 40 l’ɛmɔtshi, ndo akɛnyi dia nde êke l’etena ka kanyiya woho wahombande nɔmbɔla lɔsɛnɔ lande. Naa eyango wakayongaka lande na? Kakɔna kakokongɛka lo nshi yayaye na? Abraham akahomana l’Ɛmɛnyi ɛmɔtshi wa Jehowa ndo akamɛ tshɔ lo nsanganya yawɔ. Nde akohɔ dia lam’akinde l’Afrika, ɛnɔnyi ɛmɔtshi la ntondo ka nde ndjônɔ, nde akadia traktɛ kɛmɔtshi kakawosha Ɔmɛnyi ɔmɔtshi wa Jehowa. Traktɛ kakɔ kakatɛkɛtaka dia paradiso kayonga lanɛ la nkɛtɛ ndo dia lowandji la l’olongo layolɛ anto. Onde dikambo sɔ diakakoke monga mɛtɛ?

Abraham ate: “L’ekimanyielo ka Bible, lakayeyaka dia ɛnɔnyi tshɛ wakametsha lo talɔka ata wakete olongo swa. Lakayeya dia lowandji lâmɛ layotshela anto tshɛ akambo la losembwe ko Diolelo diaki Nzambi.”

Yema tshitshɛ l’ɔkɔngɔ w’Abraham batizama ndo koma Ɔmɛnyi ɔmɔtshi wa Jehowa, pami kakawelɛka Robert akalawɔ oma l’Afrika otsha l’osomba wa l’Erɔpɛ lɛnɛ aki Abraham. Robert nde la Abraham wakalɔ lo ta diakɔ diamɛ koko waki lo bɛkɛ diotshikitanyi, mbut’ate waki atunyi. Robert akayambolaka mbala efula lo kɛnɛ kendana l’oyango mɛtɛ wa lɔsɛnɔ. Nde akayashaka l’awui w’ɔtɛmwɛlɔ, ndo akadia tenyi dimɔtshi dia Bible, ndo nde akeyaka dia Jehowa mbele lokombo laki Nzambi. Lam’akɔ̂lɔmbɛ Ɛmɛnyi wa Jehowa w’oma l’etshumanelo kaki Abraham dia vɔ mbokimanyiya dia nde shihodia Bible dimɛna, nde aketawɔ mbala kakɔ kâmɛ.

Robert ate: “Oma k’etatelo, dimi lakambe heyama lo menda yoho yakakambaka Ɛmɛnyi wa Jehowa la lokombo laki Nzambi ndo laki Yeso, lo mbetawɔ dia vɔ wekɔ anto ahende wotshikitanyi. Dikambo sɔ diakɔtɔnɛka la kɛnɛ kakameyaka edja efula oma l’ekimanyielo ka Bible. Ɛmɛnyi ɛsɔ vɔ lawɔ wakalɔtɛ dimɛna, ndo wakokaka anto tshɛ ngandji oyadi ose wodja akɔna. Akambo asɔ wakonge la shɛngiya ya wolo le mi.”

Atunyi waya angɛnyi

Robert nde la Abraham, wanɛ waki atunyi waya kakianɛ angɛnyi w’eshika. Vɔ akɔ ahende wokamba oko ekambi wa lo tena tshɛ l’etshumanelo kâmɛ k’Ɛmɛnyi wa Jehowa. Abraham ate: “Lo nshi yakalɔmaka ta, dimi lakayambolaka mbala efula bonde kakahetshanaka anto wele lo wedja wosukanyi, wele efula ka l’atei awɔ wekɔ l’ɔtɛmwɛlɔ ɔtɔi. Dimi la Robert taki l’ɔtɛmwɛlɔ ɔtɔi, koko takatshu dia tɔlɔshana. Kakianɛ, dimi la nde taya Ɛmɛnyi wa Jehowa ndo mbetawɔ kaso kambotokakatanya.”

Robert ambokotsha ate: “Otshikitanu vɔ ɔnɛ. Kakianɛ taya la mbetawɔ kâmɛ kambotokonya anto wa lo nkumbo ka mɛtɛ k’anto l’ɔnango. Hatotshɔki nto pondjo lo ta.” Awui wa lo Bible wakonge la shɛngiya ya wolo l’etema w’anto asɔ waki ntondo atunyi. Lohetsho la tokumbɛkumbɛ takayatshikɛka wɛkamu la lɔngɛnyi dihole yema yema.

L’etena kakɔ kamɛ kaki Abraham nde la Robert lo ta, ɛlɔngɔlɔngɔ ekina ehende waki lo bɛkɛ dihende diotshikitanyi dia ta diakalɔka wedja ehende wosukanyi. Lo tshenyi ya wonya Bible kakakambe olimu oko okanga ɔmɔtshi dia kɔnɔya mpota yaki l’asolo awɔ ndo vɔ. Lo yoho yakɔna na?

Ndjaka​—Oma lâsɔ ko wɛ mvwela wodja

Waketsha Ngabriyɛlɛ, ɔnɛ lakole lo nkumbo kɛmɔtshi kakayashaka efula l’awui wa nzambi, dia wodja ande waki lo ndɔ ta di’ekila. Ɔnkɔnɛ, lam’akandakotsha ɛnɔnyi 19 nde akayakimɔ la lolango lande l’olimu w’ɔsɔlayi ndo akalɔmbɛ dia vɔ mbotoma lɛnɛ akalɔmaka ta. L’edja ka ngɔndɔ 13 nde akayatshuhe mɛtɛ lo ta, ndo kilɔmɛtɛrɛ ɔtɔi l’etenyi keto mbakawanganya l’atunyi ande. Nde ate: “Dimi mbohɔka dia mbala kɛmɔtshi, kɔmanda kaso akatotɛ ate atunyi aso wayotɔtwɛ l’otsho ɔnɛ. Wɛɔngɔ wakiso wakatshimbe ko takɔtɔ lo nɔngɔsɔla ekoma wakiso otsho w’otondo.” Nde akɔsaka anto w’oma lo wodja wakasukana lawɔ oko atunyi ande, wanɛ wasungana mɛtɛ ndjakema. “Kanyi yami aki ya ndjaka anto efula lo ndjela akoka ami. Ɔnkɔnɛ, l’ɛnyɛlɔ k’efula k’angɛnyi ami, dimi lakalangaka vwela wodja ami.”

Koko, l’edjedja ka wonya, Ngabriyɛlɛ akayoshishaka elongamelo tshɛ. Nde akalawɔ l’akona, atakula ɔkɔkɛ ndo la yewo tshɛ dia tenyanya otsha lo wodja okina lo wedi wa wodja ɔmɔtshi l’atei wa wedja ehende ɛnɛ wakalɔshanaka, oma lâsɔ nde akande lɔkɛndɔ otsha l’Erɔpɛ. Nde akatetemala la nɔmbaka Nzambi dia mbeya bonde kambolola lɔsɛnɔ l’ekakatanu nganɛ, afɔnya dia kana ekakatanu ɛsɔ waki dilanya di’oma le Nzambi. Nde akayɛnanaka l’Ɛmɛnyi wa Jehowa, ko vɔ wakayowɛnya l’ekimanyielo ka Bible bonde kambolola lɔsɛnɔ l’ekakatanu ɛlɔ kɛnɛ.​—Mateu 24:3-14; 2 Timote 3:1-5.

Lam’akatalekaka Ngabriyɛlɛ mbeka awui w’oma lo Bible, mbakandatalekaka shihodia dia tɔ kekɔ l’awui wa mɛtɛ. “Lakeke dia sho kokaka sɛna pondjo pondjo lo paradiso ka lanɛ la nkɛtɛ. Lakashola la diambo di’efula kɛnɛ kakamakombolaka heyama oma ko dikɛnda diami.” Bible akakimanyiya Ngabriyɛlɛ ndo akawɔ̂ladja asolo. Mpota yande yoleki tshɛ ya l’asolo yakamɛ nkɔnɔ. Ɔnkɔnɛ, lushi lakandayɛnana la Danyɛlɛ ɔnɛ laki otunyi ande w’edjedja nde komonga nto la lohetsho otsha le nde kânga yema. Ko kakɔna kakatshutshuya Danyɛlɛ dia tshɔ otsha l’Erɔpɛ na?

“Naka mɛtɛ wɛ ekɔ, kete okimanyiya!”

Danyɛlɛ akodiama lo nkumbo k’aseka Mupɛ ndo lam’akinde l’ɛnɔnyi 18, wakawɔshi l’olimu w’ɔsɔlayi. Lo ta diakɔ diamɛ diakawatome Ngabriyɛlɛ mbakalɔ ndo Danyɛlɛ, koko vɔ akɔ ahende waki lo bɛkɛ diotshikitanyi, mbut’ate, nɛ diakalɔshanaka. Lam’akawonge suke l’atunyi, lâsɔ ko Danyɛlɛ atakɛndjakɛndja mutuka waki l’ashi wakawatanɔka, atunyi wakokande. Anyande wakavu, ndo nde akahomɔ wolo ko atunyi wakawonde ndo wakawombe lo shasa. Nde akasale ngɔndɔ efula lo lopitadi lo pango k’ase lokanu la ntondo ka vɔ ndjɔtɔla otsha lo wodja ɔmɔtshi waki kɔmbɔtɔ lo ta sɔ. Nde akalange ndjadiaka lo menda woho wakinde ndamɛ ndo aha l’ekimanyielo. Danyɛlɛ akalɔmbɛ Nzambi ate: “Naka mɛtɛ wɛ ekɔ, kete okimanyiya!” La wedi a pindju, Ɛmɛnyi wa Jehowa wakaye dia ndjowenda ndo wakokadimola lo efula ka wembola waki lande. L’ekomelo, nde akayolawɔka otsha l’Erɔpɛ. Ndo lɛkɔ, Danyɛlɛ akɛnana nto l’Ɛmɛnyi wa Jehowa ndo akamɛ mbeka Bible. Awui wakandeke oma lo Bible wakotshungola oma l’ekiyanu ndo ɔkɛyi waki lande.

Ngabriyɛlɛ nde la Danyɛlɛ waya kakianɛ angɛnyi wa mamba, waya Ɛmɛnyi wa Jehowa wambobatizama ndo wele kâmɛ l’atei wa nkumbo kaso ka lo nyuma k’anto l’ɔnango. Ngabriyɛlɛ ate: “Ngandji kokami Jehowa ndo ewo k’oma lo Bible akakimanyiya dia mɛna akambo oko awaɛnande. Danyɛlɛ aya bu nto otunyi ami. Ɛnɔnyi efula wambeta lam’akamalangaka mbodiaka. Bible amboyombetsha kɛnɛ kotshikitanyi la kɛnɛ kaki lo wɔɔngɔ ami, dikambo diakɔ ko: monga suke dia mvɔ dikambo diande.”

Danyɛlɛ ate: “Dimi lakɛnyi nganɛ wakadiakanaka anto wa l’ɛtɛmwɛlɔ efula ndo w’oma lo wedja wotshikitanyi. Ndo anto wa l’ɔtɛmwɛlɔ wamɛ waki lo bɛkɛ diotshikitanyi wakadiakanaka lam’asawɔ. Lam’akamɛnyi dikambo sɔ, dimi lakafɔnya nte Nzambi mbele l’ɔtɛ w’akambo akɔ. Ɛlɔ kɛnɛ, dimi lambeya dia Satana mbele lo kiɔkɔ y’ata tshɛ walɔma. Kakianɛ, dimi la Ngabriyɛlɛ taya atɛmɔdi. Hatɔlɔshanaki nto pondjo!”

‘Ɔtɛkɛta waki Nzambi wekɔ la lɔsɛnɔ ndo la nkudu’

Lande na kakatshikitanya Abraham, Robert, Ngabriyɛlɛ, la Danyɛlɛ lɔkɛwɔ lawɔ lo yoho ya diambo ngasɔ na? Ngande wakawakoke minya lohetsho ndo ɔkɛyi waki l’etema awɔ na?

Vɔ tshɛ wakadia Bible, wakakane yimba l’awui akɔ, ndo wakeke akambo wa mɛtɛ w’oma lo Bible wele la ‘lɔsɛnɔ ndo la nkudu.’ (Heberu 4:12) Ɔnɛ lele Kiɔkɔ ya Bible mbele Otungi w’anto. Nde mbeyaka woho wa sɛngiya lo yoho ya dimɛna otema w’onto lalanga mpokamɛ ndo mbeka. ‘Afundelo tshɛ wakasambiyama oma le Nzambi ndo wekɔ ɔlɔlɔ dia mbetsha, dia mingola, dia mbidja akambo l’ɔnɔngɔ, ndo dia ndowanya lo losembwe.’ Lam’etawɔ ombadi dia Bible mbɔlɔmbɔla, nde mongaka l’ɛlɛmbɛ ndo la wadjango w’eyoyo wa nde ndjela. Nde tatɛka mbeka dia mbeya woho wɛna Jehowa akambo. Dikambo sɔ mbelaka onto ɛlɔlɔ efula, mbidja ndo ɔkɔnwɛlɔ wa mpota y’oma l’ata.​—2 Timote 3:16.

Ɔtɛkɛta waki Nzambi nembetshiyaka dia ndoko wodja, lokoho la demba, kana dioho dimɔtshi dioleki dikina. “[Nzambi] kema la shonodi y’antu. Keli ndi mbetawoka wa lu wedja tshe, wane wawuka woma la watsha akambu w’ololo.” Ombadi wetawɔ dikambo sɔ kimanyiyamaka yema yema dia ntondoya lohetsho lele lam’asa wanɛ wele bu lokoho ɔtɔi la demba kana wodja ɔtɔi.​—Etsha 10:34, 35.

Prɔfɛsiya ya lo Bible mɛnyaka dia kema edja Nzambi ayanga minya dikongɛ diaso nɛ di’akambo ko mbela Diolelo diande diayɔlɔmbɔla Mɛsiya. Lo tshimbo ya lowandji lɔsɔ, Nzambi ‘ayokomiya ata lo tokoma tshɛ ta nkɛtɛ.’ Atshunda watshutshuya akambo w’ata ndo watshutshuya anto dia ndɔshana wayolanyema. Wanɛ wakavu l’ata wayolɔ ndo wayowasha diɛsɛ dia ndjɔsɛna pondjo lo paradiso ka lanɛ la nkɛtɛ. Ndoko onto layolawɔ nto l’ɔtɛ w’ɔnɛ wamɔmbɔtwɛ la ta kana ndawɔ onto ɔmɔtshi lele lo mbosoya.​—Osambu 46:9; Danyele 2:44; Etsha 24:15.

Lo dikambo di’anto wayɔsɛna l’etena kɛsɔ, Bible mbutaka ɔnɛ: “Vo wayuhika mvudu, wayudjaseka loko. . . . Vo hawukamba ukambakamba, kuyanga mbuta ana, dia vo ndjakema shashimuya.” Ndoko wâle kana mpota kayohomɔ onto kahatɔkɔnɔ. Monga la mbetawɔ lo elongamelo ka ngasɔ kimanyiyaka onto dia shidiya okiyanu ndo ɔkɛyi yema yema oma l’otema.​—Isaya 65:21-23.

Bible ekɔ mɛtɛ okanga wa wolo wa mpota ya l’asolo. Wetshelo wa lɔkɔ wambotatatɛka kɔnɔya mpota y’oma l’ata. Wanɛ waki ntondo atunyi wekɔ lo tonge kâmɛ lo nkumbo k’anto l’ɔnango ka l’andja w’otondo. Ɔkɔnwɛlɔ ɔsɔ wayotetemala polo ndo l’andja w’oyoyo edja ndo lohetsho, shɔkɔ, ndo ɔkɛyi wele l’etema w’anto aya bu. Otungi ndakaka ɔnɛ “akambu wa ntundu wayuhamamela, hawuyuhwama ntu.”​—Isaya 65:17.

[Nɔtɛ ka l’ɛse ka dikatshi]

[Efundelo wa l’etei w’odingɔ wa lo lɛkɛ 3]

“L’ekimanyielo ka Bible lamboyeka di’ɛnɔnyi ɛsɔ shɛ wakametsha lo talɔka ata wakete olongo swa”

[Efundelo wa l’etei w’odingɔ wa lo lɛkɛ 4]

Awui wa lo Bible koka monga la shɛngiya ya wolo l’etema wa wanɛ waki ntondo atunyi

[Efundelo wa l’etei w’odingɔ wa lo lɛkɛ 5]

Lohetsho la tokumbɛkumbɛ wakayotshikɛka lɔngɛnyi ndo diokanelo dihole yema yema

[Efundelo wa l’etei w’odingɔ wa lo lɛkɛ 5]

Kam’etawɔ onto dia Bible monga ɔnɔmbɔdi ande, nde mongaka l’ɛlɛmbɛ ndo la adjango w’eyoyo wahombande ndjela

[Osato wa lo lɛkɛ 6]

Wanɛ waki atunyi ntondo waya wony’ɔnɛ kamɛ lo nkumbo k’anto l’ɔnango ka l’andja w’otondo

[Efundelo wɛnya kanga osato wa lo lɛkɛ 3]

Pango ka dawo: FƆTƆ KA O.N.U 186811/J. Isaac