Onde tekɔ l’ohomba wa Mɛsiya?

WƐ MBEYAKA ndjambola wate: “Onde tekɔ l’ohomba wa Mɛsiya?” Eelo, kokaka di’onto ndjambola kana Mɛsiya ayonga la shɛngiya ya mɛtɛ le nde.

Anto amɔtshi wele la tokanyi tele oko tayɛ wayokoshikikɛ dia okadimwelo wekɔ hwe ndo mɛtɛ ɔnɛ: Wɛ ekɔ mɛtɛ l’ohomba wa Mɛsiya, oko wele anto akina wekɔ l’ohomba ande. Ombewi ɔmɔtshi w’ɛlɛmbɛ w’ose Juda wa lo ntambe ka ntondo akafunde lo dikambo dia Mɛsiya ate: “Oyadi efula ka ngande kele alaka waki Nzambi, vɔ wekɔ lo kotshama lo tshimbo yande.” Ɔnkɔnɛ, ombewi w’ɛlɛmbɛ ɔsɔ akake epole ɔsɛkɛ l’ɔkɛndɛ w’ohomba efula wele la Mɛsiya lo sangwelo dia Otungi aso dia tshɔkɔla wedja tshɛ wa la nkɛtɛ. (2 Koreto 1:20) Ɔkɛndɛ waki Mɛsiya wekɔ ohomba efula diakɔ diele oyelo ndo lɔsɛnɔ lande lanɛ la nkɛtɛ ekɔ dikambo dialeka tɛkɛtama lo prɔfɛsiya ya lo Bible. Henry H. Halley, ombewi w’ɛkɔndɔ wa lo Bible akate lo dibuku dimɔtshi diakakambe l’anto efula l’edja kolekanyi ɛnɔnyi 70, ate: “Daka di’edjedja diakafundama dia mbisha elongamelo ndo dia nɔngɔsɔla mboka dikambo dia Oyelo wa [Mɛsiya].” Ko onde oyelo ande wekɔ ohomba? Lande na kendanayɛ la oyelo ande?

Tshɛkɛta “Mɛsiya” nembetshiyaka “Okitami” ndo yɔ mbɔtɔnɛka la tshɛkɛta “Kristo” yeyama dimɛna. Onto ɔsɔ mbelɛ dibuku dimɔtshi (Encyclopædia Britannica), diakatombe lo 1970 ɔnɛ “otshungodi woleki tshɛ” wakahombe ndja l’ɔtɛ w’ɔtɔmbɔkwɛlɔ waki Adama la Eva, mbuta ate ambutshi wa ntondo w’anto. Vɔ wakatongama kokele la elongamelo ka dimɛna efula ka nsɛna pondjo pondjo lo Paradiso, koko vɔ wakashisha elongamelo kakɔ. Ondjelo wakatɔmbɔkɔ, lakayeyamaka ɔnɛ Satana Diabolo, akawatɛ dia Otungi awɔ akikɔ awui wolo ndo ɔnɛ vɔ wayoleka monga dimɛna naka vɔamɛ shikikɛ kɛnɛ kele ɔlɔlɔ la kɛnɛ kele kɔlɔ.​—Etatelu 3:1-5.

Eva akakesama ndo aketawɔ kashi kɛsɔ. Akɛnama dia Adama akalangaka wadɛnde efula ndeka kɔlamelo yande otsha le Nzambi ndo akayoyatambiyaka l’ɔtɔmbɔkwɛlɔ wakahɔhɔla Diabolo ɔsɔ. (Etatelu 3:6; 1 Timote 2:14) Oma lo ditshelo diawɔ, vɔ kokomɛ tsho lo shisha elongamelo kawɔ ka nsɛna pondjo lo Paradiso. Vɔ wakatshikɛ tokanulo tawɔ takahombe ndjotɔ pɛkato ndo nyɔi.​—Romo 5:12

Jehowa Otungi aso, akashikikɛ aha la tshimbatshimba ehomɔ kakahombe ndjonya awui wa kɔlɔ wakatombe oma l’ɔtɔmbɔkwɛlɔ. Nde akahombe ndjokaloya diokanelo nto oma lo kɛnɛ kakayonga tɔndɔ dietawɔma dia lo Ɛlɛmbɛ wa Mɔsɛ, mbuta ate: wɛdinyelo. (Euhwelu k’Elembe 19:21; 1 Joani 3:8) Tɔndɔ dietawɔma sɔ diakahombe kotshama otondonga kanula mɔtshi l’atei wa tokanula ta Adama la Eva akahombe nsɛna pondjo pondjo lo Paradiso ka la nkɛtɛ oko waki sangwelo diaki Otungi dikambo dia nkumbo k’anto. Kɛsɔ mbakatɔlɔmbɔla otsha le Mɛsiya.

Etena kakandahembola onongo waki Diabolo, Jehowa Nzambi akate prɔfɛsiya ka ntondo ka lo Bible ɔnɛ: “Dimi layudja luhetshu l’asaye la umuntu, ndu l’asa tukanula taye la tukanula tandi. Ndi ayuko[kɔmɔla] l’ote, ku we ayûluma[ta] lu etshindji.” (Etatelu 3:15) Nomb’ewo kɛmɔtshi k’akambo wa lo Bible akate dia “ɔkɔndɔ wendana la daka dia Mɛsiya oko wadiɛnya Afundelo wakatatɛ oma l’ɛtɛkɛta [ɛsɔ].” Nomb’ewo kekina akate dia Mɛsiya ekɔ ehomɔ kaki Nzambi “kayonya weho tshɛ w’asui w’oma lo pɛkato kaki ambutshi wa ntondo” ndo mbela anto ɛtshɔkɔ.​—Heberu 2:14,15.

Koko, aha la tâmu wɛ mɛnaka dia anto watatshɔkwama polo ndo kakianɛ. Lo dihole dia ɔtshɔkɔ, anto bu kânga la yema y’elongamelo. Ɔnkɔnɛ, dibuku The World Book Encyclopedia mbutaka dia “ase Juda efula wakalongamɛka oyelo wa Mɛsiya” ndo di’ɔnɛ nde “ayoyonya kɔlɔ ndo ayɔlɛndja atunyi waki anto.” Koko, Bible mbutaka dia Mɛsiya amboshilaka la ndja.