ASAWO WƆTƆNƐ L’ƆTƐ A DUI WA LO LOHOSO | LOSANGO LAKƆNA LELE LO BIBLE?
“Tambɛna Mɛsiya”!
Ntambe oko nyɛi l’ɔkɔngɔ wa dibuku di’ekomelo dia lo Bible dia l’afundelo wa lo Hɛbɛru fundama, daka dia Mika diendana la Mɛsiya diakakotshama: Yeso akotɔ la Bɛtɛlɛhɛma. Ɛnɔnyi oko 30 l’ɔkɔngɔ, lo ɔnɔnyi wa 29 T.D., etenyi ka ntondo ka daka dia Danyɛlɛ diendana l’oyelo wa Mɛsiya diakakotshama. Yeso akabatizama ndo Nzambi akokite nyuma k’ekila. L’etena kakashikikɛma kɛsɔ, mbakɛnama Mɛsiya kana Kanula yakakongaka anto edja efula shɔ.
Aha la ntshimbatshimba, Yeso akatatɛ olimu ande “atasambisha lokumu l’ɔlɔlɔ la Diolelo dia Nzambi.” (Luka 8:1) Oko wakadiatatami, Yeso aki onto ɔlɔlɔ, akadjaka anto lo demba ndo akayakiyanyaka lo dikambo di’anto akina. Wetshelo ande wakokɛmaka hwe, wakɛnyaka dia nde mbokaka anto ngandji ndo nde akakɔnɔlaka “weho tshɛ wa dikɔmɔ,” kɛsɔ akɛnyaka dia Nzambi aki kaamɛ la nde. (Mateo 4:23) Anto tshɛ, epalanga ndo akɛnda wakatshumanaka lale Yeso, diakɔ diakawayota ɔnɛ: “Tambɛna Mɛsiya”!—Joani 1:41.
Yeso akatatshi ɔnɛ la ntondo ka Diolelo diande ntatɛ nɔmbɔla awui tshɛ wa la nkɛtɛ, ata, adidimu wa nkɛtɛ ndo efukutanu ekina wayoyala l’andja ɔnɛ. Diakɔ diakandakeketsha anto tshɛ ate: “Nyosungukalake.”—Makɔ 13:37.
Etena kakinde la nkɛtɛ, Yeso aki onto la kokele lakakitanyiyaka Nzambi, koko nde aki l’atunyi wakayokoma lo mbodiaka. Nyɔi ka Yeso mbaki olambo wa kokele wakakimɔma dia tokaloyɛ kɛnɛ kakashisha Adama la Eva, mbuta ate lɔsɛnɔ la pondjo lo paradiso.
Nyɔi ka Yeso kakakotsha daka diakalake Nzambi dia nde ayowolola l’ɔkɔngɔ wa nshi shato oko etongami ka lo nyuma ka wolo efula. L’ɔkɔngɔ wa nde mbolɔ, Yeso akɛnama le ambeki ande ndekana 500. La ntondo ka nde mbudɛ l’olongo, Yeso akasha ambeki ande ɔkɛndɛ wa mbewoya “anto wa lo wedja tshɛ” lokumu l’ɔlɔlɔ lendana la nde ndo la Diolelo diande. (Mateo 28:19) Ko ngande wakawakoke nkotsha ɔkɛndɛ ɔsɔ?