Oyangelo wa ekadimwelo wa mɛtɛ

Ngande wakokami kokɛ yônge yami?

Akokami sala dia nkumbo kami ndeka monga la lɔsɛnɔ l’ɔngɛnɔngɛnɔ?

Akokami sala diaha dimi shisha olimu ami?

ONDE wɛ atayaokaka ambola asɔ? Onde wɛ akatane ekadimwelo wa mɛtɛ wakakokimanyiya? Yɛdikɔ y’abuku oko 2 000 washa alako lo akambo asɔ ndo lo akambo akina w’ohomba wekɔ lo tondjama ɔnɔnyi tshɛ. Lo wodja wa Grande-Bretagne oto, ambadi shishaka yɛdikɔ ya miliyɔ 150 ya dɔlara di’ase Amɛrikɛ l’ɔnɔnyi dia somba abuku washa alako wɛnya woho wa ndɔshana la ekakatanu wa lo lɔsɛnɔ. Lo wodja wa États-Unis, ahole wasondjawɔ abuku washa anto alako mbɔtshiyaka yɛdikɔ ya miliyɔ oko 600 ya dɔlara l’ɔnɔnyi. Mɛtɛ aha wɛmɛ oto mbayanga alako w’ɛlɔlɔ wendana la woho wa kandola ekakatanu wa lo lɔsɛnɔ la lushi la lushi.

Lo kɛnɛ kendana la alako watanema lo nyemba y’ekanda ɛsɔ, ofundji ɔmɔtshi akate ate: “Abuku efula w’eyoyo kalolɛka paka kɛnɛ kamboshilaka fundama.” Lo mɛtɛ, alako efula watanema lo abuku asɔ wekɔ lo kalolɛ paka tokanyi takafundama lo dibuku dimɔtshi dioleki edja l’andja ɔnɛ. Aha la tâmu, dibuku sɔ diekɔ dibuku diamboleka kahanyema lo andja w’otondo. Diɔ diambokadimɔma tshɛ kana lo tenyi dia diɔ lo ɛtɛkɛta oko 2 400. Lo tshɛtshɛ, ndekana kɔpi miliyara 4,6 ya dibuku sɔ yambofundama. Dibuku diakɔ ko Bible.

Bible mbutaka hwe ɔnɛ: “Efundelu tshe k’uma le [Nzambi] keko ololo mbetsha antu, la mbalaka, la mbaewula, la mbaekiya lu akambu w’ololo.” (2 Timote 3:16) Lo mɛtɛ, Bible kofundama dia ndjonga oko dibuku di’anto ndjakimanyiyaka. Oyango atɔ woleki ele wa mbewoya anto lolango laki Nzambi. Kânga mbediɔ ngasɔ, Bible kekɔ la akambo efula wɛnya woho wa ndɔshana la ekakatanu watokomɛ sho tshɛ ndo tɔ ndakaka dia wanɛ wakitanyiya akambo wa lɔkɔ wayeya woho wa ndjakondjɛ ɛlɔlɔ. (Isaya 48:17, 18) Etena kakamba onto la alako w’eshika wa lɔkɔ, nde kondjaka etombelo w’ɛlɔlɔ oyadi dioho diakɔna diende, oyadi mbekelo yande kana kalasa yakandɔtɔ.