Ngande watoyoshanaka alako?

Onde wɛ amboshaka onto ɔmɔtshi dako? Ko onde wambokombolaka ambola wayela anɛ: ‘Onde dimi kokaka ntshɔ lo losanganya lɔnɛ? Onde dimi kokaka ntetemala nkamba olimu ɔnɛ? Onde dimi kokaka membwana l’onto kapanda?’

Anto amɔtshi wele l’eyango w’amɛna mbeyaka kɔlɔmba dia wɛ mbakimanyiya dia vɔ mbɔsa tɛdikɔ takoka monga la shɛngiya lo diɔtɔnganelo diasawɔ l’angɛnyi awɔ, l’ase nkumbo kawɔ ndo la Jehowa. Oma lende ayoyɔsa okadimwelo wayoyowasha? Ngande watoyoshaka anto akina alako? Oyadi dako diakɔ mendanaka l’akambo wa weke kana wa totshitshɛ, Tukedi 15:28 mbutaka ɔnɛ: “Kanga utema w’ololo atukanaka yimba dia nkaluya diui.” Tende woho wele nkamba l’atɔndɔ atanu wa lo Bibe anɛ kokaka kokimanyiya dia mbisha anto akina alako.

1 Tokoteyi otondo a dikambo.

“Le untu latukadimulaka diui ntundu ndi atuki dikambu, ekadimwelu kandi katuweteka enginya ndu katuwutshaka sonyi.”—TUK. 18:13.

Dia mbisha anto akina alako w’amɛna, sho pombaka teyi otondo a dikambo ndo kanyi yele la ɔnɛ layanga dako. Tɔshi di’onto ɔmɔtshi ambokotelefɔnɛ ndo ambokombola woho wakokande nkoma lakayɛ. Ahombayɛ teyi dia mbôkimanyiya? Onde wɛ kokaka mbôlakanya mboka ka nde mbidjɛ aha la wɛ teyi dihole diende? Ndooko. Woho akɔ wâmɛ mbele, dia mbisha anto alako w’amɛna, paka wɛ monga la shɛnɔdi, mbuta ate mbeya otondo a dikambo ndo kanyi yele la ɔnɛ loye dia ndjoyanga dako. Onde ekɔ akambo amɔtshi wakoka kotshutshuya dia ntshikitanya okadimwelo ayɛ lo yɛdikɔ mɔtshi? Naka wɛ hateyi otondo a dikambo, kete wɛ mbeyaka ndjosha onto dako diakoka mbêla ekakatanu.—Luka 6:39.

Mbolande kana nde akasale eyangelo lo dui diakɔ. Ekɔ ohomba mboka ɔnɛ layanga dako ambola anɛ: “Oko le yɛ, tɔndɔ diakɔna dia lo Bible diendana la dikambo nɛ?” “Naa etombelo w’ɛlɔlɔ ndo wa kɔlɔ wakoka ndja oma lo yɛdikɔ yayoyɔsa?” “Naa eyangelo wakayasale?” “Ngande wakakokimanyiya dikumanyi dia l’etshumanelo, ambutshi ayɛ kana ombetsha ayɛ wa Bible?”

Ekadimwelo wayondokosha koka kokimanyiya dia wɛ mbeya welo wakandadje dia nkondja dako. Ndo nto, ayonga dimɛna wɛ nkamba ndo la tokanyi takawosha anto asɔ. Wɛ kokaka menda dia kana onto akɔ nangaka mboka alako ‘wayɔngɛnyangɛnya atui ande.’—2 Tim. 4:3.

2 Tosasɛke dia nkadimola.

“Onto tshɛ pombaka monga suke dia mpokamɛ, ɔkɔkɛ dia ntɛkɛta.” —JAK. 1:19, NW.

Ondo wɛ mbeyaka nsasɛ dia nkadimola, koko dui sɔ bu dimɛna, djekoleko naka wɛ atasalaka eyangelo wendana la dui dioyewɔ ndjokombola. Tukedi 29:20 mbutaka ɔnɛ: “We atenaka untu lahakani yimba lu aui andi? Uleki nungamela le kanga enginya uleki le ndi.”

Ɔsa etena ndo yashikikɛ dia kanyi yalangayɛ mbisha onto loye ndjoyanga dako mbɔtɔnɛka tshɛ lo tshɛ la lolango laki Nzambi. Yambola wate: ‘Onde yimba y’andja ɔnɛ yakasɔsɔme lo dako diami lo yoho mɔtshi?’ (1 Kor. 2:12, 13) Ohɔ ɔnɛ aha eyango w’amɛna eto mbata dikambo. L’ɔkɔngɔ wa nde mbeya kɛnɛ kaki suke la komɛ Yeso, ɔpɔstɔlɔ Petero akôlake ate: “[Nzambi] ashimbi dikambu so, we Khumadiondjo. Dikambu diako tadiuyalaki pundju leye.” Wetshelo akɔna wakokaso nkondja oma lo kɛnɛ kakasale Petero? Naka hatendji ɔlɔlɔ, kânga anto wele l’eyango w’amɛna kokaka tosha ‘alako wakɛnɛmɔla tokanyi t’anto, koko aha taki Nzambi.’ (Mat. 16:21-23) Ekɔ mɛtɛ ohomba efula nkana yimba la ntondo ka ntɛkɛta nɛ dia Nzambi toleka lomba etale.—Jobo 38:1-4; Tuk. 11:2.

3 Kamba l’Ɔtɛkɛta wa Nzambi l’okitshakitsha tshɛ.

“Dimi dime halatshi dikambu, keli latutaka akambu wakambetsha Papa.”—JOA. 8:28.

Onde wɛ kokaka mbuta wate: “Otondonga dimi mbele wɛ, tshike . . .”? Kânga naka okadimwelo mbokɛmaka oma lo ambola wawokayɛ, ayoleka dimena wɛ mbohɔ ɔnɛ wɛ pombaka monga l’okitshakitsha l’ɛnyɛlɔ ka Yeso. Kânga mbakandaleke anto tshɛ lomba ndo ewo la fwa, nde akate ate: “Dimi kundjata dime. Keli Papa lakantumi, kakambisha olembe uku ayumuta ndu wuhu wayumoteketa.” (Joa. 12:49, 50) Wetshelo ndo alako waki Yeso wakɔtɔnɛka mbala tshɛ la lolango laki She.

Ɛnyɛlɔ lo ndjela Luka 22:49, ambeki ande wakawombola dia kana vɔ kokaka ndɔshana l’asɔlayi wakaye ndjowonda. Simɔna Petero akasɛkɛ ɔsɔlayi ɔmɔtshi tui la yɔɔmbɔ. Koko lo ndjela Mateu 26:52-54, Yeso akɔshi etena ka nkana l’ambeki ande yimba lo kɛnɛ kendana la lolango la Jehowa kânga mbakinde l’atei w’akambo wa wolo asɔ. Lam’ele nde akeyaka atɔndɔ wele lo Etatelu 9:6 ndo prɔfɛsiya yele l’⁠Osambu 22 ndo l’​Isaya 53, nde akawasha alako w’amɛna wakashimbɛ nsɛnɔ yawɔ ndo wakangɛnyangɛnya Jehowa.

4 Kamba l’ekanda aso ekina.

“Ukambi akona weli la kolamelu la yimba, wakakitsha khumendi ladiku dia antu wa luudu landi, dia mbashaka mbu ya nde yawo lu tena diayo?”—MAT. 24:45.

Yeso akasɔnɛ olui w’ɔhɔmbɔ dia mbishaka ekambi ande mbo ya ndɛ ya lo nyuma. Etena kashayɛ dako lo kɛnɛ kendana l’awui amɔtshi w’ohomba, onde wɛ salaka eyangelo lo mikanda aso walembetshiya Bible?

Index des publications Watch Tower ndo Watchtower Librarya wekɔ l’akambo efula w’amɛna ndo wokɛma hwe wakoka tokimanyiya. Shi ayonga tshondo ya munga naka hatoyangi awui asɔ lo mikanda aso? Dibuku sɔ diekɔ l’ɛtɛ w’awui efula ndo l’asawo watokimanyiya dia nkondja alako wele la so ohomba. Onde wɛ salaka la wolo dia monga l’akoka wa nkimanyiya anto akina dia vɔ nyanga atɔndɔ wa lo Bible lo nkana yimba l’ekimanyielo k’Ɔtɛkɛta waki Nzambi? Oko watowosangɛka onto mboka naka nde heye lɛnɛ atandatshu, mbakoka ndo osalelo w’eyangelo tokimanyiya dia menda kana tekɔ lo tatetemala nkɛndakɛnda lo mboka ka lɔsɛnɔ.

Dikumanyi efula wambolowanya apandjudi lo woho wa nyanga asawo lo nkamba l’Index kana Watchtower Library lo mbakimanyiya dia mbɔsaka tɛdikɔ lo ndjela Afundelo. Olowanyelo ɔsɔ mbakimanyiyaka dia vɔ nkondja ekadimwelo lo ambola awɔ ndo dia monga la mbekelo ka salaka eyangelo l’ekanda watondja ɔhɔmbɔ. Naka vɔ nsala ngasɔ, kete ‘wayekiya akoka awɔ w’ekanelo ka yimba dia ntshikitanya ɔlɔlɔ la kɔlɔ.’—Heb. 5:14.

5 Ewɔ dia mbɔsa yɛdikɔ lo dihole diande.

“Untu l’untu ayemba wutshu andi ndame.”—NGAL. 6:5.

L’ekomelo, onto ndamɛ mbahomba nsɔna dako diahombande nkamba la diɔ. Jehowa mbishaka ɔmɔmɔ a l’atei aso lotshungɔ la mbetawɔ nɔmbwama l’atɔndɔ ande kana ntona. (Euh. 30:19, 20) Onto koka mpomana la dui dimɔtshi dialɔmba dia nkamba l’atɔndɔ wa lo Bible efula koko kotamba kolembɔ paka ndamɛ mbahomba mbɔsa yɛdikɔ. Dimbola kana ɛnɔnyi wele l’ɔnɛ latombola kanyi mbeyaka tokonya dia ndjambola ɔnɛ: ‘Onde lekɔ mɛtɛ la lotshungɔ la nkadimola dimbola diande?’ Teye di’ekɔ ambola amɔtshi wele paka dikumanyi dia l’etshumanelo mbele la lotshungɔ la nkadimola. Ko naka ɔnɛ layanga dako eke dikɛnda, kete nde pombaka mumbola ambutshi ande.

[Nɔte ka l’ɛse ka dikatshi]

[Kiombo/​Osato wa lo lɛkɛ 8]

Woho wa nsala Ɔtɛmwɛlɔ wa lo nkumbo

Etena kasalanyu Ɔtɛmwɛlɔ wa lo nkumbo, lande na kahanyayadjɛ oyango wa nsala eyangelo lo ambola wakawanyoke atete edja? Shi nyu koka nyanga asawo ndo atɔndɔ wa lo Bible wakoka nkimanyiya ɔnɛ lakanyoke ambola asɔ? Ɛnyɛlɔ, tɔshi di’ɔnangɛso kana kadiyɛso kɛmɔtshi akakombola kanyi dia mbeya kana nde koka ntshuka kana tshukama l’onto kapanda. Etena kakambayɛ la Index kana Watchtower Library, yanga tokanyi tasembɔ tɔɔ lo dikambo sɔ. Ɛnyɛlɔ, wɛ mbeyaka nyanga tshɛkɛta “Diembwanelo” kana “Diwala.” Oma lâsɔ ko wɛ nsɔna ɔtɛ a dui wayangayɛ. L’ɔkɔngɔ diko, ko wɛ menda tshɛ ya dui kina yata ɔnɛ “Enda nto lo” dia wɛ nyanga asawo akina wɔtɔnɛ la kɛnɛ katayayange.

[Kiombo ya lo lɛkɛ 9]

Ekanda watotondjɛ okongamelo waki Jehowa toshaka alako woleki amɛna ndo tɛnyaka woho wakokaso ndaka anto akina. Undaki 12:11 mbutaka ɔnɛ: ‘Ɛtɛkɛta wa kanga lomba wekɔ oko difufɔ ndo wanɛ wafunda abuku wele la dombwelo wekɔ oko sɛti yɔkɔkɔmadi wolo. Olami w’ɛkɔkɔ ɔtɔi mbakayisha.’ L’ɛnyɛlɔ ka ‘difufɔ’ diatowɔkɔmɔlaka nyama dia tɔ ntetemala nsembɔ lo mboka, alako w’amɛna kimanyiyaka ekambi waki Jehowa dia vɔ mbɔsa tɛdikɔ t’amɛna. Oko watokimanyiyaka ‘sɛti yɔkɔkɔmadi wolo’ l’esembe dia nsambe ka luudu nshikimala, mbatokimanyiya alako w’amɛna dia sho nkoma etshundju w’anto. Akanga wa tomba ngɛnangɛnaka efula etena kadjawɔ yimba lo lokaka la ditelo loludi tɔ la lomba la Jehowa lele ‘olami w’ɛkɔkɔ.’

Tohokamɛke olami w’ɛkɔkɔ etena katoshande alako. Ande diɛsɛ diele la so dia mbohokamɛ etena tshɛ kalangaso lee! Naka sho nkamba l’atɔndɔ wa lo Bible, kete wanɛ walakaso wayonga l’ɔngɛnɔngɛnɔ wa pondjo.