Ambola w’oma le ambadi

Onde kɛnɛ kata Ezekiyele 18:20 ɔnɛ “ona hembe wutshu wa kolo ka shi” hɔtɔnɛ la kɛnɛ kata Etumbelu 20:5 ɔnɛ Jehowa sɔmbɔyaka “kolo ka washi le an’awo”?

Ndoko, tokanyi tɔsɔ mbɔtɔnɛka. Divɛsa dia ntondo mbikaka epole ɔsɛkɛ lo onongo w’onto lo nde ndamɛ, ndo divɛsa dia hende mɛnyaka dia munga k’onto kokaka monga l’etombelo wa kɔlɔ le tokanula tande.

Avɛsa wele lo Ezekiyele tshapita 18 mbikaka epole ɔsɛkɛ lo kanyi y’ɔnɛ onto ayoyokoya la Nzambi lo nde ndamɛ. Divɛsa 4 mbutaka ɔnɛ “[anima] watutshaka kolo, mbayuvo.” Kayotota lo dikambo dia ‘onto ɔlɔlɔ lasala akambo wosembwe ndo w’ɔlɔlɔ’? Divɛsa 9 kadimolaka ɔnɛ: “Ndi ayulumba.” (Ezek. 18:5, 9) Ɔnkɔnɛ, l’ɔkɔngɔ wa nde nkotsha ɛnɔnyi wakokawɔ ndjokoya la nde, onto l’onto ayolomboshama “uku etsha andi.”—Ezek. 18:30.

Mɛtɛ ka tɔndɔ nɛ mɛnyama lo kɛnɛ kakakomɛ ose Lɛwi lelɛwɔ Kɔra. L’etena kakatekekɔka ase Isariyɛlɛ l’oswe wa shɛnga, Kɔra kondjɔngɛnangɛna waɛsɛ w’olimu waki la nde. Dia nde mɛmba ndo ɛkɛndɛ w’ɔlɔmbɛdi, Kɔra l’anto amɔtshi wakatɔmbɔkwɛ Mɔsɛ nde la Arɔna wanɛ waki enyimpala waki Jehowa. Lam’ele nde akakombola la lotamanya tshɛ dia monga la diɛsɛ di’ɔlɔmbɛdi diakinde komonga la lotshungɔ, Jehowa akadiake Kɔra la wanɛ wakatɔmbɔkɔ kâmɛ la nde. (Wal. 16:8-11, 31-33) Koko, ana w’apami wa Kɔra kɔtɔmbɔkɔ kâmɛ la nde. Nzambi kombaɛndja onongo wa pɛkato kakasale shɛwɔ. Etombelo waki la kɔlamelo yawɔ otsha le Jehowa ele, vɔ wakatshikala la lɔsɛnɔ.—Wal. 26:10, 11.

Ko kayotota dia ɔhɛmwɛlɔ wele lo Etumbelu 20:5, wele ɔlɛmbɛ ɔmɔtshi wa lo Ɛlɛmbɛ dikumi? Nyɛsɔ tɔsɛdingole nto avɛsa wele lo tshapita nyɛ. Jehowa mbakadje sheke y’Ɛlɛmbɛ kâmɛ la wodja wa Isariyɛlɛ. L’ɔkɔngɔ wa vɔ mboka akambo waki lo sheke yakɔ, ase Isariyɛlɛ wakate lo sɛkɛ vɔate: “Shu tayutsha akambu aso tshe wakati [Jehowa].” (Etum. 19:5-8) Woho ɔsɔ mbakonge wodja lo tshɛ kawɔ la diɔtɔnganelo dia lânde vɔ la Jehowa. Ɔnkɔnɛ, ɛtɛkɛta wele lo Etumbelu 20:5 wakendanaka ntondotondo la wodja w’otondo.

Etena kakatshikalaka ase Isariyɛlɛ la kɔlamelo otsha le Jehowa, wodja w’otondo wakakondjaka ɛtshɔkɔ efula. (Lew. 26:3-8) Koko akambo wakakokaka nsalema lo yoho yotshikitanyi. Etena kakokaka wodja w’Isariyɛlɛ Jehowa ɔkɔngɔ ndo kakawatɛmɔlaka tozambizambi ta kashi, nde kombatshɔlaka ndo kombakokɛka. Wodja wakahomɔka mpokoso. (Emb. 2:11-18) Lo mɛtɛ, kânga mbakayasha wodja lo tshɛ kawɔ l’ɔtɛmwɛlɔ wa dikishi, ase Isariyɛlɛ amɔtshi wakalamaka olowanyi awɔ ndo wadjango waki Nzambi. (1 Khum. 19:14, 18) Wanɛ waki la kɔlamelo vɔ lawɔ wakadiɛnɛka l’ekakatanu ɛmɔtshi l’ɔtɛ wa kɔlɔ yakasalaka wodja w’otondo, koko Jehowa akawaokaka ngandji ka lɔsɛngɔ.

Koko etena kakasekolaka wodja w’Isariyɛlɛ atɔndɔ waki Jehowa polo lo lokombo lande mɔnywama l’atei wa wedja, Jehowa akayashikikɛka dia mbasha dilanya etena kakandetawɔ dia vɔ ntɔlama lo lɔhɔmbɔ la Babilɔna. Lo mɛtɛ, dilanya sɔ diakendanaka la ɔmɔmɔ la l’atei awɔ ndo la wodja w’otondo. (Jer. 52:3-11, 27) Bible mɛnyaka dia onongo waki la wodja w’Isariyɛlɛ w’otondo waki woke efula woho ɔnɛ wele nɔnga shato, nyɛi kana ndekana yakadisowɛka l’ɔtɛ wa awui wa kɔlɔ wakasalaka watshɛwɔ oko wadita Etumbelu 20:5.

Ndo nto, Ɔtɛkɛta waki Nzambi wekɔ la ɛkɔndɔ wɛnya woho wakasowe nkumbo mɔtshi l’ɔtɛ wa lɔkɛwɔ la kɔlɔ laki ambutshi awɔ. Ɔlɔmbɛdi wa lâdiko Eli akanyangiya Jehowa lo mbetawɔ dia anande w’apami waki “antu wa kolo” ntetemala monga ɛlɔmbɛdi. (1 Sam. 2:12-16, 22-25) Lam’ele Eli akalɛmiyaka anande oleki Jehowa, Nzambi akate dia nkumbo kaki Eli kayonyɛma oma lo dioho dia ɛlɔmbɛdi. Dui sɔ diakayosalemaka ntatɛ oma le Abiyatara laki tshule yande (arrière-arrière-petit-fils). (1 Sam. 2:29-36; 1 Khum. 2:27) Ndo ɛnyɛlɔ ka Ngɛhazi mbɛnya mɛtɛ ka tɔndɔ diele lo Etumbelu 20:5. Nde akakambe la dihole di’okambi w’Elisha diaki la nde lo yoho ya kɔlɔ lo nyanga dia nkondja diangɔ dia l’emunyi oma lo ɔkɔnwɛlɔ w’owandji w’alembe w’ose Suriya wakawelɛka Namana. Lo tshimbo ya Elisha, Jehowa akawanya lo mbuta ate: “Sudi ka Namana kayukumamema we la tukanula taye pundju.” (2 Khum. 5:20-27) Ɔnkɔnɛ, tokanula taki Ngɛhazi takadiɛnɛ la etombelo w’oma lo kɔlɔ kande.

Oko wende Otungi ndo Ombishi wa lɔsɛnɔ, Jehowa ekɔ la lotshungɔ la mbɔsa yɛdikɔ yendana la dilanya diakoka onto nongola. Bɛnyɛlɔ diele la diko ndo mɛnyaka dia ana kana tokanula kokaka diɛnɛ la etombelo wa kɔlɔ w’oma lo pɛkato ya watshɛwɔ. Koko, Jehowa “[mbokaka] alelu w’amenyi fono,” ndo wanɛ tshɛ wɛlɛ otsha le nde la otema ɔtɔi kokaka mbetawɔma oma le nde ndo nkondja yema y’ekeketshelo.—Jobo 34:28.

[Osato wa lo lɛkɛ 29]

Nzambi akayokoya la Kɔra ndo la wanɛ wakatɔmbɔkɔ kâmɛ la nde l’ɔtɛ w’etsha awɔ