‘Nyuma nyangiayangiaka akambo woshami etale waki Nzambi’
‘Nyuma nyangiayangiaka akambo tshɛ, kânga akambo woshami etale waki Nzambi.’—1 KOR. 2:10.
1. Ɔkɛndɛ akɔna wele la nyuma k’ekila wakatɛkɛta Paulo lo 1 Koreto 2:10, ndo ambola akɔna wambwama?
TEKƆ mɛtɛ la lowando efula lo woho wakamba nyuma k’ekila kaki Jehowa olimu! Afundelo tɛkɛtaka dikambo dia nyuma oko okimanyedi, woshasha, ɔmɛnyi ndo vɔ mbutaka dia nyuma tɔtɛkɛtɛka. (Joa. 14:16; Etsha 2:38; Romo 8:16, 26, 27) Ɔpɔstɔlɔ Paulo akatɛkɛta dikambo di’ɔkɛndɛ okina w’ohomba wele la nyuma k’ekila etena kakandate ɔnɛ: ‘Nyuma nyangiayangiaka akambo tshɛ, kânga akambo woshami etale waki Nzambi.’ (1 Kor. 2:10) Lo mɛtɛ, Jehowa kambaka la nyuma kande k’ekila dia tosholɛ akambo wa mɛtɛ wa lo nyuma woshami etale. Aha l’ekimanyielo kɛsɔ, ngande wototeya sangwelo diaki Jehowa? (Adia 1 Koreto 2:9-12.) Koko, ambola efula mumbɔmaka: Ngande wayangiayangia nyuma ‘akambo woshami etale waki Nzambi’? Lo tshimbo ya na yakashola Jehowa akambo asɔ lo ntambe ka ntondo T.D.? Ngande ndo lo tshimbo ya na yayangiayangia nyuma akambo asɔ woshami etale lo nshi yaso nyɛ?
2. Lo toho takɔna tohende takahombe nyuma nkamba olimu?
2 Yeso akɛnya toho tohende takahombe nyuma nkamba olimu. Yema tshitshɛ la ntondo ka nde mvɔ, nde akatɛ apɔstɔlɔ ande ate: “Ukimanyidi, nyuma k’[ekila], layutuma Papa lu lukumbu lami, ndi ayunyetsha akambu tshe, ayunyuhula aui tshe wakamanyutelaka.” (Joa. 14:26) Ɔnkɔnɛ, nyuma k’ekila kakahombe nkamba oko ombetsha ndo oko ombohodi. Oko ombetsha, tɔ kakahombe nkimanyiya Akristo dia vɔ nshihodia akambo wakiwɔ koshihodiaka ntondo. Oko ombohodi, tɔ kakahombe mbakimanyiya dia vɔ mbohɔ ndo nkamba dimɛna la kɛnɛ kakâlembetshiya Yeso.
Lo ntambe ka ntondo
3. Ɛtɛkɛta akɔna waki Yeso wɛnya dia ‘akambo woshami etale waki Nzambi’ wakahombe ndjashɔmaka yema yema?
3 Yeso ndamɛ aketsha ambeki ande akambo wa mɛtɛ efula waki eyoyo le wɔ. Koko polo l’etena kɛsɔ, vɔ waki l’akambo efula wa nyomeka. Yeso akatɛ apɔstɔlɔ ate: “Dimi la akambu akina efula wa nyutela, keli nyu hanyeyi mbalungula kakiane. Keli lam’ayuya nyuma ka mete, ndi ayunyolombola lu akambu wa mete tshe.” (Joa. 16:12, 13) Ɔnkɔnɛ, Yeso akɛnya dia lo tshimbo ya nyuma k’ekila, akambo woshami etale wakahombe ndjashɔmaka yema yema.
4. Lo lushi la Pɛntɛkɔsta ka lo 33 T.D., ngande wakakambe nyuma k’ekila oko ombetsha ndo oko ombohodi?
4 Lo lushi la Pɛntɛkɔsta ka lo 33 T.D., “nyuma ka mete” kakaye le ambeki oko 120 wakatshumana la Jerusalɛma. Lo diaaso sɔ, anto wakoke ndo wakɛnyi tolembetelo ta dikambo sɔ. (Etsha 1:4, 5, 15; 2:1-4) Ambeki wakatɛkɛta “etsha a wulu wa [Nzambi]” lo ɛtɛkɛta wotshikitanyi. (Etsha 2:5-11) Etena kakakoke ka dui dimɔtshi di’oyoyo mbishɔma. Ɔprɔfɛta Jɔɛlɛ akatewoyisha di’otshulwelo ɔsɔ wa nyuma k’ekila. (Joe. 2:28-32) Anto wakɛnyi ekotshamelo kɛsɔ lo yoho yakiwɔ konongamɛka ndo ɔpɔstɔlɔ Petero akalembetshiya dikambo sɔ. (Adia Etsha 2:14-18.) Nyuma k’ekila kakakambe oko ombetsha dia nembetshiya Petero dia kɛnɛ kakakomɛ ambeki kɛsɔ kaki okotshamelo wa prɔfɛsiya k’edjedja. Nyuma kakakambe nto oko ombohodi nɛ dia Petero koshila tsho prɔfɛsiya ka Jɔɛlɛ koko nde akashile nto esambo ehende waki Davidi. (Osam. 16:8-11; 110:1; Etsha 2:25-28, 34, 35) Kɛnɛ kakɛnyi ndo kakoke olui w’anto wakatshumana aki mɛtɛ akambo woshami etale waki Nzambi.
5, 6. a) L’ɔkɔngɔ wa Pɛntɛkɔsta ka lo 33 T.D., naa ambola w’ohomba wendana la sheke y’oyoyo wakahombe kadimɔma? b) Waa na wakonyiyaka ambola asɔ, ndo ngande wakɔsama yɛdikɔ?
5 Koko, Akristo wa lo ntambe ka ntondo wakikɔ l’akambo efula wakahombe nembetshiyama. Oko ɛnyɛlɔ, ambola wendana la sheke y’oyoyo yakatatɛ nkamba olimu lo lushi la Pɛntɛkɔsta lɔsɔ. Onde paka ase Juda ndo ambetawudi w’ase Juda ato mbakahombe monga lo sheke y’oyoyo? Onde ase Wedja vɔ lawɔ wakakoke mbetawɔma lo sheke y’oyoyo ndo kitama nyuma k’ekila? (Etsha 10:45) Onde apami w’ase Wedja wakahombe ntondo mbahenyama ohekele ndo nkitanyiya Ɛlɛmbɛ wa Mɔsɛ? (Etsha 15:1, 5) Ɔsɔ aki ambola w’ohomba efula. Vɔ waki l’ohomba wa nyuma kaki Jehowa dia nyangiayangia akambo woshami etale asɔ. Ko lo tshimbo ya na yakahombe nyuma nkamba olimu?
6 Anangɛso waki l’ɛkɛndɛ mbakonyiyaka ambola asɔ dia vɔ sɛdingwama. Petero, Paulo ndo Baranaba waki lo losanganya lɔsɔ l’olui-walɔmbɔla ndo wakate woho wakadje Jehowa yambalo le ase Wedja waki kombahema ohekele. (Etsha 15:7-12) L’ɔkɔngɔ w’ɔsɛdingwelo wa djembetelo shɔ l’ekimanyielo k’Afundelo wa Hɛbɛru ndo ka nyuma k’ekila, olui-walɔmbɔla wakɔshi yɛdikɔ. Oma lâsɔ, vɔ wakafundɛ tshumanelo dia mbaewoya yɛdikɔ shɔ.—Adia Etsha 15:25-30; 16:4, 5; Ef. 3:5, 6.
7. La ekimanyielo ka na kakashɔma akambo wa mɛtɛ woshami etale?
7 Akambo akina efula wakayolembetshiyamaka lo efundelo wakasmbiyama waki Joani, Petero, Jakɔba ndo Paulo. Koko, lo yɛdikɔ mɔtshi l’ɔkɔngɔ w’Afundelo w’Akristo wa lo Grɛkɛ fundama tshɛ, woshasha wa mbuta awui wahataye ndo woshwelo wa lo dihindo wa bewo wakahombe nkomɛ. (1 Kor. 13:8) Onde nyuma kakahombe ntetemala nkamba oko ombetsha ndo oko ombohodi? Onde tɔ kakahombe nkimanyiya Akristo dia nyangiayangia akambo woshami etale waki Nzambi? Prɔfɛsiya mɛnyaka dia ngasɔ mbakadiahombe monga.
Lo nshi y’ekomelo
8, 9. Waa na wakahombe ‘mpɛta’ lo nyuma lo nshi y’ekomelo?
8 Lo ntɛkɛta dikambo dia nshi y’ekomelo, ondjelo ɔmɔtshi akatatshi ate: “Akanga a yimba wayohetaka uku ngaingai k’ulungu. Ndu wane watukadimulaka antu efula utsha lu akambu w’ololo, wayohetaka ngaingai nshi tshe pundju uku toto. . . . Ewu [ka mɛtɛ] kayuyala efula.” (Dan. 12:3, 4) Waa na wakahombe monga akanga a timba ndo waa na wakahombe mpɛta? Yeso akate dui dimɔtshi di’ohomba efula lo wɛɛla ande wa eponga la kangaka. Lo ntɛkɛta dikambo dia “ekumelu ka etena kene,” nde akate ate: “Ku antu w’ololo wayoheta uku unya lu diulelu dia Shewo.” (Mat. 13:39, 43) Lo elembetshiyelo ande, Yeso akɛnya dia “antu w’ololo” wekɔ “ana wa diulelu,” mbuta ate Akristo w’akitami.—Mat. 13:38.
9 Onde Akristo w’akitami tshɛ mbakahombe ‘mpɛta’? Lo yoho mɔtshi eelo, nɛ dia Akristo tshɛ wakahombe ndjasha l’olimu w’esambishelo, wa mbetɛ anto ambeki ndo lo keketshana lo nsanganya. Akitami wakahombe mbisha ɛnyɛlɔ. (Zek. 8:23) Koko lâdiko dia lâsɔ, akambo woshami etale wakahombe ndjoshɔma lo nshi y’ekomelo. Prɔfɛsiya kaki Danyɛlɛ ‘kakadihama’ edja ndo lo nshi y’ekomelo. (Dan. 12:9) Ngande ndo lo tshimbo ya na yakahombe nyuma nyangiayangia akambo woshami etale asɔ?
10. a) Lo tshimbo ya na yashola nyuma akambo woshami etale lo nshi y’ekomelo? b) Lembetshiya woho wakalembetshiyama akambo wa mɛtɛ wendana la tɛmpɛlɔ ka woke ka lo nyuma kaki Jehowa.
10 Lam’akoka etena ka nembetshiya dikambo dimɔtshi dia lo nyuma lo nshi yaso nyɛ, nyuma k’ekila kimanyiyaka anangɛso wele enyimpala wa ‘ɔhɔmbɔ wa kɔlamelo ndo wa kɛsɔ’ wele lo mbalasa kalɔmbɔla olimu wa l’andja w’otondo dia vɔ nshihodia akambo wa mɛtɛ woshami etale wakiso koshihodiaka ntondo. (Mat. 24:45; 1 Kor. 2:13) Olui-walɔmbɔla lo tshɛ kawɔ sɛdingolaka elembetshiyelo w’eyoyo dia ndjashikikɛ mɛtɛ kawɔ. (Etsha 15:6) Kɛnɛ kekawɔ, vɔ kitondjaka dia wahɔ w’anto tshɛ. (Mat. 10:27) Lam’atete nshi, elembetshiyelo ekina mbeyaka monga ohomba ndo vɔ nembetshiyamaka la losembwe tshɛ.—Enda kiombo yele l’ɔtɛ a dui ɔnɛ: “Woho wakashola nyuma kitshimudi ya tɛmpɛlɔ ka lo nyuma.”
Tokondja wahɔ oma l’ɔkɛndɛ wele la nyuma ɛlɔ kɛnɛ
11. Ɛlɔ kɛnɛ, ngande wakondja Akristo tshɛ wahɔ oma lo ɔkɛndɛ wele la nyuma k’ekila wa mbishola akambo woshami etale wa Nzambi?
11 Akristo tshɛ wa kɔlamelo kondjaka wahɔ oma lo ɔkɛndɛ wele la nyuma k’ekila wa mbishola akambo woshami etale wa Nzambi. Oko wakidiɔ le Akristo wa lo ntambe ka ntondo, ɛlɔ kɛnɛ, sho mbekaka, mbohɔka ndo kambaka l’awui watokimanyiya nyuma k’ekila dia sho nshihodia. (Luka 12:11, 12) Sho bu l’ohomba wa paka mbɔtɔ kalasa y’efula dia nshihodia akambo woshami etale wa lo nyuma watondja ɔhɔmbɔ. (Etsha 4:13) Ngande wakokaso mfudia eokelo kaso k’akambo woshami etale wa Nzambi? Tɔsɛdingole alako amɔtshi.
12. Etena kakɔna kahombaso nɔmba dia nkondja nyuma k’ekila?
12 Tɔlɔmbɛ dia nkondja nyuma k’ekila. Etena kalangaso nsɛdingola Afundelo, sho pombaka ntondotondo nɔmba dia nyuma k’ekila tɔlɔmbɔla. Sho pombaka nsala ngasɔ oyadi tekɔ shoamɛ kana sho bu l’etena k’otale. Aha la tâmu, alɔmbɛlɔ wa l’okitshakitsha asɔ wayɔngɛnyangɛnya Shɛso lele l’olongo. Oko wakɛnya Yeso, Jehowa mbishaka la lokaho tshɛ anto wawɔlɔmba l’otema ɔtɔi nyuma kande k’ekila.—Luka 11:13.
13, 14. Ngande watokimanyiya ɔlɔngɔswɛlɔ wa nsanganya dia sho nshihodia akambo woshami etale waki Nzambi?
13 Tɔlɔngɔsɔlake nsanganya. Tekɔ lo nongola ‘mbo ya ndɛ lo tena diahombama’ lo tshimbo y’olui w’ɔhɔmbɔ. ‘Ɔhɔmbɔ’ kotshaka ɛkɛndɛ ande lo totondjɛ ekanda walembetshiya Afundelo ndo lo nɔngɔsɔla dikongelo dia wekelo ndo dia nsanganya. Vɔ wekɔ l’ɛkɔkɔ w’eshika wa nɔmba ‘tshunda di’otondo di’anangɛso’ dia nsɛdingola awui amɔtshi. (1 Pet. 2:17; Kol. 4:16; Jude 3) Sho kambaka kâmɛ la nyuma k’ekila etena kasalaso tshɛ dia ndjela alako watoshawɔ.—Eny. 2:29.
14 Etena kalɔngɔsɔlaso nsanganya y’Akristo, sho pombaka mbadia avɛsa woshilami ndo nyanga dia nshihodia woho wɔtɔnɛwɔ la sawo diatatasɛdingola. Tshelo shɔ yayotahamiaka yema yema eokelo kaso ka Bible. (Etsha 17:11, 12) Nyangiayangia avɛsa asɔ ayotokimanyiya dia mbadja lo yimba ndo nyuma kokaka ndjotokimanyiya dia sho mbaohɔka. Ndo nto, naka sho nyanga divɛsa lo tshondo ya Bible, kete tayodikimɛ lo yimba ndo tayokoka diohɔ etena kayotonga l’ohomba adiɔ.
15. Lande na kahombaso ntetemala mbadia ekanda watondjama, ndo ngande wakokayɛ nsala dikambo sɔ?
15 Totetemale mbadiaka ekanda aso. Aha akambo tshɛ wele lo ekanda aso mbasɛdingɔma lo nsanganya yaso, koko vɔ wakalɔngɔswama dia wahɔ aso. Kânga periodikɛ yakahɛso anto yakalɔngɔswama ndo dia wahɔ aso. L’andja ɔnɛ weso la wesanu efula, tena efula sho kongaka onto ɔmɔtshi kana ɛngɔ kɛmɔtshi. Naka tekɔ l’ekanda aso weso tatadia kana wakatadia yema tsho, kete sho mbeyaka nkamba la waaso asɔ dia mbadia etenyi kɛmɔtshi. Amɔtshi tetemalaka mbadia ekanda aso lo mpokamɛ wadielo lo kasɛtɛ etena katawakɛndakɛnda kana kewɔ lo mutuka. Eyangelo w’efula wakasalema ndo ekanda akɔ wakafundama lo yoho yangɛnyangɛnya ambadi ndo vɔ tshɛ pamiaka lowando lele laso lo akambo wa lo nyuma.—Hab. 2:2.
16. Wahɔ akɔna wakokaso nkondja lo mfunda ndo ndjosala eyangelo wa ambola wakoka toyɛ lo yimba?
16 Kanaka yimba. Etena kadiayɛ Bible kana ekanda wakilembetshiya ɔsaka etena ka nkana yimba. Etena katayayele dimɛna dimɛna woho wɔlɔngami tokanyi, ambola amɔtshi mbeyaka koyɛ lo yimba. Wɛ mbeyaka mfunda ambola akɔ ndo ndjowasɛdingola l’ɔkɔngɔ. Tena efula, etena kayangiayangiaso ambola wakatoye lo yimba mbasalaso eyangelo wa lotshimola. Eokelo konga laso ndjokomaka ɛngɔ ka nɛmɔ kakokaso nkamba la tɔ etena kayotonga l’ohomba.—Mat. 13:52.
17. Ekongelo kakɔna kayelanyu lo nkumbo kana lo wekelo w’onto ndamɛ?
17 Tokongɛ etena ka salaka ɔtɛmwɛlɔ wa lo nkumbo. Olui-walɔmbɔla wakatokeketsha sho tshɛ dia ndjatshungwɛ dikɔlɔ dimɔtshi kana etena kekina lomingu tshɛ dia salaka wekelo w’onto ndamɛ kana wa lo nkumbo. Woho wakatshikitanyema ekongelo ka nsanganya yaso toshaka diaaso dia nkamba la dako sɔ. Kakɔna kasɛdingolanyu l’Ɔtɛmwɛlɔ anyu wa lo nkumbo wa la dikɔlɔ? Nkumbo mɔtshi mbadiaka Bible, salaka eyangelo l’avɛsa wonyiya ambola amɔtshi lo timba tawɔ ndo fundaka elembetshiyelo wa lo tshena pe lo Bible yawɔ. Nkumbo efula mbɔsaka etena ka menda woho wakoka ase nkumbo nkamba l’awui wekama. Ewandji ɛmɔtshi wa nkumbo sɔnaka awui amɔtshi wɛnawɔ ohomba lo nkumbo yawɔ kana ambola wakoka ase nkumbo monyiya l’akambo amɔtshi. Aha la tâmu, nyu kokaka nkanyiya nto akambo akina wa nsɛdingola l’edjedja ka wonya.a
18. Lande na kahatahombe ntshika dia mbeka akambo wa mɛtɛ woshami etale wa l’Ɔtɛkɛta wa Nzambi?
18 Yeso akate dia nyuma ayokamba oko okimanyedi. Ɔnkɔnɛ, hatohombe ntshika dia mbeka akambo wa mɛtɛ woshami etale wele l’Ɔtɛkɛta wa Nzambi. Akambo wa mɛtɛ asɔ wekɔ l’atei wa ‘ewo ka Nzambi’ k’oshika ndo sho nɔmbamaka dia mbayangiayangia. (Adia Tukedi 2:1-5.) Vɔ mɛnyaka akambo efula lo kɛnɛ kendana la “akambu wakalongoswela [Nzambi] wane wûlanga.” Etena kasalaso la wolo dia nyomeka akambo wendana l’Ɔtɛkɛta wa Jehowa, nyuma k’ekila kayotokimanyiya nɛ dia ‘nyuma nyangiayangiaka akambo tshɛ, kânga akambo woshami etale waki Nzambi.’—1 Kor. 2:9, 10.
[Nɔtɛ ka l’ɛse ka dikatshi]
Ngande wayoyokadimola?
• Lo toho takɔna tohende tatokimanyiya nyuma k’ekila dia nyangiayangia ‘akambo woshami etale waki Nzambi’?
• Lo tshimbo ya na yakashola nyuma k’ekila akambo wa mɛtɛ woshami etale lo ntambe ka ntondo?
• Ngande wakamba nyuma k’ekila dia tolembetshiya akambo amɔtshi lo nshi yaso nyɛ?
• Kakɔna kakokayɛ nsala dia nkondja wahɔ oma l’ɔkɛndɛ wa nyuma?
[Kiombo ya lo lɛkɛ 22]
Woho wakashola nyuma kitshimudi ya tɛmpɛlɔ ka lo nyuma
L’atei wa ‘akambo woshami etale wa Nzambi’ wakashɔma lo ntambe ka ntondo mbaki ndo elembetshiyelo w’ɔnɛ tabɛrnakɛlɛ ndo l’ɔkɔngɔ tɛmpɛlɔ yaki didjidji dia dui dimɔtshi dia lo nyuma dia woke diaki mɛtɛ. Paulo akelɛ dui dia mɛtɛ sɔ ɔnɛ “luudu la dipema la mete, lakahiki Khumadiondjo, aha untu.” (Heb. 8:2) Ɔsɔ aki tɛmpɛlɔ ka woke ka lo nyuma, mbuta ate yɛdikɔ ya ndjasukanya la Nzambi lo tshimbo ya olambo waki Yeso Kristo ndo lo woho wakinde ɔlɔmbɛdi.
“Luudu la dipema la mete” lɔsɔ lakatatɛ lo 29 T.D. etena kakabatizama Yeso ndo kakawetawɔ Jehowa dia nde monga olambo wa kokele. (Heb. 10:5-10) L’ɔkɔngɔ wa nyɔi ndo wa eolwelo kande, Yeso akɔtɔ lo Dihole dioleki ekila dia lo tɛmpɛlɔ ka lo nyuma ndo akatokimɔka nɛmɔ di’olambo ande “lu ashu a [Nzambi].”—Heb. 9:11, 12, 24.
Ɔpɔstɔlɔ Paulo akafunde lo divɛsa dikina dia Akristo w’akitami wekɔ ‘lo todiama dia monga tɛmpɛlɔ k’ekila kaki Jehowa.’ (Ef. 2:20-22) Onde tɛmpɛlɔ kɛsɔ mbaki “luudu la dipema la mete” lakandayɔtɛkɛtaka l’ɔkɔngɔ lo mukanda wakandafundɛ ase Hɛbɛru? L’edja k’ɛnɔnyi akumi, ekambi wa Jehowa wakafɔnyaka ngasɔ. Wakafɔnyaka di’Akristo w’akitami wakalɔngɔswamaka la nkɛtɛ dia tonga “ave” lo tɛmpɛlɔ ka l’olongo kaki Jehowa.—1 Pet. 2:5
Koko, oya l’ɔnɔnyi 1971, anangɛso waki l’ɛkɛndɛ l’olui w’ɔhɔmbɔ wakatatɛ nshihodia dia tɛmpɛlɔ kakatɛkɛta Paulo lo Efeso kokoka monga tɛmpɛlɔ ka woke ka lo nyuma kaki Jehowa. Naka “luudu la dipema la mete” lakakengama l’akitami w’Akristo wakolwama, kete lɔ lakahombe ntatɛ l’ɔkɔngɔ wa eolwelo kawɔ ntatɛ lo ‘wôngelo wa Nkumadiɔndjɔ.’ (1 Tes. 4:15-17) Koko, etena kakandatɛkɛtaka lo dikambo dia tabɛrnakɛlɛ, Paulo akafunde ate: “[Luudu la dipɛma] lako leli djimbitelu y’etena kene.”—Heb. 9:9, sho mbɛnganyisha alɛta ango.
Lo mbɛdika dimɛna dimɛna avɛsa asɔ ndo akina, mɛnamaka hwe dia tɛmpɛlɔ ka lo nyuma kɛsɔ hatetemala mbikama ndo di’ɔnɛ Akristo w’akitami kema “ave” walɔngɔswama la nkɛtɛ dia tokenga luudu lakɔ. Koko, Akristo w’akitami wekɔ lo nkamba lo sɛkɛ ndo lo dihole di’Ekila dia lo tɛmpɛlɔ ka lo nyuma lushi la lushi lo nambola Nzambi “ulambu wa mandulaka.”—Heb. 13:15.
[Osato wa lo lɛkɛ 23]
Ngande wakokaso mpamia eokelo kaso ka ‘akambo woshami etale waki Nzambi’?