Yasukanya la Nzambi
“Dimi keli [Jehowa Nzambi k]aye latukukimelaka lu lunya laye la pami”
ETENA kakawalangaka ntenyanya otadimbo weteta mituka efula, ombutshi ɔmɔtshi wa pami akatɛ ɔnande ate: “Okime lo lonya.” Etena kôkime she lo lonya, ɔna ɔsɔ bu la wɔma ndo nde ndjaokaka l’ekokelo. Onde wɛ atakombolaka di’onto ɔmɔtshi kokokɛ oma lo wâle ɔmɔtshi? Naka eelo, kete wɛ koka ntana esambelo l’ɛtɛkɛta wakafunde Isaya.—Adia Isaya 41:10, 13.
Ɛtɛkɛta waki Isaya wakendanaka l’ase Isariyɛlɛ. Kânga mbele Nzambi akɔsaka Isariyɛlɛ oko ‘wodja ande wa lânde,’ vɔ wakadingama l’atunyi. (Etumbelu 19:5) Onde vɔ wakahombe mboka wɔma? Jehowa akakambe l’ɔprɔfɛta Isaya dia mbaewoya ɔnɛ nde ayowakokɛ. Etena katatasɛdingola ɛtɛkɛta ɛsɔ, tatohɛke dia vɔ mendanaka ndo l’atɛmɔdi waki Nzambi wa nshi nyɛ.—Romo 15:4.
Jehowa akâkeketsha ɔnɛ: ‘Tanyokake wɔma.’ (Divɛsa 10) Nde aki l’ɛkɔkɔ w’eshika wa mbutɛ ekambi ande ɛtɛkɛta ɛsɔ. Jehowa akâlembetshiya lande na kahawahombe mboka wɔma lo mbatɛ ɔnɛ: ‘Dimi lekɔ lanyu.’ Nde aki suke dia mbakimanyiya, lo mbalaka ɔnɛ nde ayoyaka esadi dia ndjakimanyiya etena kewɔ l’ohomba w’ekimanyielo. Jehowa nangaka di’ekambi ande mbeya dia nde ekɔ kâmɛ lawɔ, mbuta ate nde ekɔ lo wedi awɔ dia mbakimanyiya. Onde dui sɔ bu tshondo y’esambelo le so?
Lâdiko dia lâsɔ, Jehowa akashikikɛ ekambi ande lo mbatɛ ɔnɛ: ‘Tanyoyakiyanyake.’ (Divɛsa 10) Vɛrbɛ ya lo Hɛbɛru yokambemi lanɛ koka mendana “la wanɛ washishima ahole tshɛ dia mɛna kana wâle ɔmɔtshi koka mbakomɛ.” Jehowa akalembetshiya lande na kahahombe ekambi ande mboka wɔma lo mbatɛ ɔnɛ: ‘Dimi kele Nzambi kanyu.’ Shi ɛtɛkɛta ɛsɔ tokeketshaka? Jehowa ekɔ “Khum’Ulungu,” “Kanga-Wulu-Tshe.” (Osambu 91:1) Shi takawahombe mboka wɔma lam’ele Jehowa Nzambi Kanga-Wolo-Tshɛ aki kâmɛ lawɔ?
Ko kakɔna kakalongamɛka ekambi wa Jehowa oma le nde? Nde akâlake ɔnɛ: “Dimi layu[ny]usukela ololo la lunya lami la pami.” (Divɛsa 10) Nde akakotsha ate: “Dimi keli [Jehowa Nzambi k]aye latukukimelaka lu lunya laye la pami.” (Divɛsa 13) Oko le yɛ, ngande wayoyoyaoka naka Nzambi kotɛ ɛtɛkɛta wa ngasɔ? Dibuku dimɔtshi mbutaka ɔnɛ: “Avɛsa anɛ ahende mɛnyaka woho watongaka ombutshi l’ɔna. [Ombutshi wa pami] honge tsho lale ɔnande dia mbokokɛ, koko nde nangaka mongaka kâmɛ la nde lo demba; nde hakombola ntshika ɔnande ndamɛ.” Ohokanyiya yema, Jehowa hatotshika pondjo ekambi ande oyadi l’etena kewɔ l’ekakatanu.—Heberu 13:5, 6.
Ekambi waki Jehowa wa nshi nyɛ kokaka ntana esambelo k’efula oma l’ɛtɛkɛta wele lo Isaya. Lo ‘tena dia wolo mbikikɛ diasɛnaso nɛ,’ sho mbeyaka ndjaoka lo tena dimɔtshi dia tambɔkɔmɔ l’ɔtɛ w’ekakatanu wa lo lɔsɛnɔ. (2 Timote 3:1) Koko, teye dia hatotokoka nkandola ekakatanu ɛsɔ l’akoka aso hita nɛ dia Jehowa ekɔ suke dia tokimɛ lo lonya, mbuta ate dia tokimanyiya. Oko watɛkɛka ɔna otema le ombutshi ande, mbakokaso ndjaɛkɛ lo lonya lande la wolo tele l’eshikikelo ɔnɛ nde ayotɔlɔmbɔla ndo ayotokimanyiya etena keso lo dihombo.—Osambu 63:7, 8.