SAWO DIA WEKELO 46
Woho watokimanyiya Jehowa dia mbikikɛ l’ɔngɛnɔngɛnɔ
“Jehowa ekɔ lo nkonga la solo dia lotutsha dia nyosalɛ ɔlɔlɔ, ndo nde ayemala dia nyoka kɛtshi.”—ISA. 30:18.
OSAMBO 3 Wolo aso, elongamelo kaso, wɛkamu aso
AWUI WAYƆTƐKƐTAMAa
1-2. a) Ambola akɔna wayotɔsɛdingola? b) Kakɔna kɛnya dia Jehowa ekɔ la nsaki k’efula ka tokimanyiya?
JEHOWA kokaka tokimanyiya dia sho ntondoya ekakatanu wa lo lɔsɛnɔ laso ndo nkondja ɔngɛnɔngɛnɔ l’olimu aso w’ekila. Lo toho takɔna tatokimanyiyande? Ndo ngande wakokaso nkondja wahɔ tshɛ lo tshɛ oma lo ekimanyelo katosha Jehowa kɛsɔ? Ambola asɔ wayokadimɔma lo sawo nɛ. Koko, la ntondo ka sho nsɛdingola ekadimwelo wa ambola asɔ, nyɛsɔ tɔsɛdingole dimbola nɛ: Onde Jehowa mɛtɛ nangaka tokimanyiya?
2 Tshɛkɛta yakakambe l’ɔpɔstɔlɔ Pɔɔlɔ lo mukanda ande w’otsha le ase Hɛbɛru koka tokimanyiya dia sho ntana okadimwelo. Pɔɔlɔ akafunde ate: “Jehowa kele okimanyedi ami, dimi hantoka wɔma. Kakɔna kakoka onto salɛmi?” (Hɛb. 13:6) Dibuku dimɔtshi dialembetshiya Bible mbutaka dia tshɛkɛta “okimanyedi,” oko wokambiwɔ la yɔ lo divɛsa nɛ, nembetshiyaka onto lasala esadi dia nkimanyiya onto ɔmɔtshi layanga ekimanyelo. Wɛ koka mɛna oko Jehowa ekɔ lo nsala esadi dia nkimanyiya onto ɔmɔtshi lele la paa. Aha la tamu wɛ mbetawɔka dia elembetshielo ɛsɔ mbikaka epole ɔsɛkɛ lo woho wele Jehowa la nsaki ndo l’asolo wa lomɔlomɔ dia monga okimanyedi aso. La Jehowa lo lokondo laso, sho koka mbikikɛ ehemba l’ɔngɛnɔngɛnɔ.
3. Naa toho tosato tatokimanyiya Jehowa dia mbikikɛ ehemba aso l’ɔngɛnɔngɛnɔ?
3 Naa toho tɔmɔtshi tatokimanyiya Jehowa dia mbikikɛ ehemba aso l’ɔngɛnɔngɛnɔ? Dia nkadimola lo dimbola sɔ, nyɛsɔ tɔsɛdingole etenyi ka dibuku dia Isaya. Lande na? Nɛ dia prɔfɛsiya yakɛnya Nzambi Isaya yekɔ ohomba l’ekambi wa Nzambi ɛlɔ kɛnɛ. Ndo nto, Isaya tɛkɛtaka dikambo dia Jehowa la tɔtɛkɛta ta wɔdu efula takokaso mana mfundo. Tɔshi ɛnyɛlɔ kɛmɔtshi lo Isaya tshapita 30. Lo tshapita shɔ Isaya kambaka la bɛnyɛlɔ di’amɛna efula diɛnya woho wakimanyiya Jehowa ekambi ande, lo 1) tohokamɛ la yambalo tshɛ ndo lo nkadimola alɔmbɛlɔ aso, 2) lo tosha ɛlɔmbwɛlɔ ndo 3) lo tosha ɛtshɔkɔ kakianɛ ndo lo nshi yayaye. Nyɛsɔ tɔsɛdingole la yambalo tshɛ toho tosato tatokimanyiya Jehowa tɔsɔ.
JEHOWA TOHOKAMƐKA
4. a) Kakɔna kakate Jehowa lo kɛnɛ kendana l’ase Juda wakasɛnaka lo nshi ya Isaya, ndo kakɔna kakandayetawɔka dia mbakomɛ? b) Elongamelo kakɔna kakasha Jehowa wanɛ waki la kɔlamelo? (Isaya 30:18, 19)
4 L’ɛtɛkɛta wa mbɔtwɛlɔ wa lo Isaya tshapita 30, Jehowa mbɔsaka ase Juda oko “ana w’ɛtɛ wolo,” wanɛ “[wa]kotsha pɛkato laadiko dia pɛkato.” Nde tetemalaka mbuta ate: “Vɔ wekɔ wodja wa atɔmbɔki, . . . wahalange mpokamɛ ɛlɛmbɛ wa Jehowa.” (Isa. 30:1, 9) Lam’ele vɔ wakatone mpokamɛ, Isaya akatatshi dia Jehowa ayetawɔ dia vɔ mpomana la mpokoso. (Isa. 30:5, 17; Jɛr. 25:8-11) Lo mɛtɛ, vɔ wakandama otsha lo lɔhɔmbɔ oma le ase Babilɔna. Koko, amɔtshi l’atei awɔ waki la kɔlamelo ndo Isaya aki la losango l’elongamelo otsha le wɔ. Nde akawatɛ dia lushi lɔmɔtshi Jehowa ayowakaloya otsha la Jerusalɛma nto. (Adia Isaya 30:18, 19.) Ndo kɛsɔ mɛtɛ mbakasalema. Jehowa akaatshungola oma la Babilɔna. Koko, ɛnɔnyi efula wakete la ntondo ka Jehowa mbatshungola. Ɛtɛkɛta w’ɔnɛ “Jehowa ekɔ lo nkonga la solo dia lotutsha dia nyosalɛ ɔlɔlɔ” akɛnyaka dia yema y’etena yakahombe mbeta la ntondo k’anto w’ɛlɔlɔ ndjotshungwama. Lo mɛtɛ, ase Isariyɛlɛ waketsha ɛnɔnyi 70 lo lɔhɔmbɔ la Babilɔna la ntondo k’amɔtshi l’atei awɔ ndjokondja lotshungɔ la nkalola la Jɛrusalɛma. (Isa. 10:21; Jɛr. 29:10) Etena kakakalola anto lo nkɛtɛ yawɔ ya lootɔ, asɔyi w’ɔkɛyi wakawakɛdiaka etena kakawandama wakahɛnyama l’asɔyi w’ɔngɛnɔngɛnɔ.
5. Eshikikelo kakɔna katosha Isaya 30:19?
5 Ɛlɔ kɛnɛ sho lawɔ koka keketshama l’ɛtɛkɛta w’ɔnɛ: “Nde ayokooka kɛtshi etena kayondokooka wɛ alela dia nyanga ekimanyielo.” (Isa. 30:19) Isaya toshikikɛka dia Jehowa ayotohokamɛ la yambalo tshɛ etena kolelɛso, ndo aha la ntshimbatshimba nde ayotokadimola l’ɛsɛngɔsɛngɔ aso. Isaya kotshaka ɔnɛ: “Nde ayokokadimola kam’ayondoka.” Ɛtɛkɛta w’ekeketshelo ɛsɔ toholaka dia Shɛso lele l’olongo ekɔ la nsaki k’efula ndo nde nomɔlomɔka l’otema dia nkimanyiya wanɛ wooyanga. Mbeya dui sɔ tokimanyiyaka dia mbikikɛ l’ɔngɛnɔngɛnɔ.
6. Ngande wɛnya ɛtɛkɛta wa Isaya dia Jehowa pokamɛka alɔmbɛlɔ w’ɔmɔmɔ la l’atei w’ekambi ande?
6 Eshikikelo kakɔna nto kakokaso nkondja lo divɛsa nɛ lo kɛnɛ kendana l’alɔmbɛlɔ aso? Jehowa pokamɛka la yambalo tshɛ alɔmbɛlɔ w’ɔmɔmɔ la l’atei aso. Lande na kakokaso mbuta ngasɔ? L’etenyi ka ntondo ka Isaya tshapita 30, okitɔ w’ɔnɛ “nyu” kambemaka l’efula nɛ dia Jehowa ekɔ lo mbutɛ ekambi ande l’olui. Koko, lo divɛsa dia 19 okitɔ w’ɔnɛ “wɛ” ekɔ okitɔ w’ɔtɔi, lanɛ wekɔ lo ntɛkɛta dikambo di’onto l’onto. Isaya akafunde ate: “Ndooko onyake wɛ ayolela”; “Nde ayokooka kɛtshi”; “nde ayokokadimola.” Oko wende Shɛso ka ngandji, Jehowa hatɛ ɔnande la pami kana la womoto ɔnɛ: “Wɛ pombaka monga la dihonga oko ɔnanyɔ kana kadiyɛyɛ.” Koko, nde ndjakinyaka lo dikambo di’aso ndo nde pokamɛka alɔmbɛlɔ aso l’onto ndo l’onto la yambalo.—Os. 116:1; Isa. 57:15.
Kakɔna kakalange Isaya mbuta etena kakandate ate: ‘Tanyoshake Jehowa kaanga yema ya momuya’? (Enda odingɔ 7)
7. Ngande wele Isaya ndo Yeso mbikaka epole ɔsɛkɛ l’ohomba wa dɔmbɛlɔ dia l’etete?
7 Etena kalɔmbaso Nzambi lo dui dimɔtshi diendana laso, aha la ntshimbatshimba Jehowa koka tokadimola ndo tosha wolo wa sho mbikikɛ okakatanu akɔ. Ndo naka okakatanu aso hashidi esadi eto oko wakatakombolaka, kete sho koka ntetemala nɔmba Jehowa l’etete dia nde tosha wolo wa sho mbikikɛ okakatanu akɔ. Nde tɔlɔmbaka dia nsala dui sɔ. Dui sɔ mbɔtɔnɛka l’ɛtɛkɛta wa Isaya ɛnɛ: ‘Tanyoshake Jehowa kaanga yema ya momuya.’ (Isa. 62:7) Kakɔna kalembetshiya dui sɔ? Sho pombaka nɔmbaka Jehowa l’etete oko hatowosha kaanga yema ya momuya. Ɛtɛkɛta w’Isaya toholaka bɛnyɛlɔ dia Yeso diendana la dɔmbɛlɔ diatanema lo Luka 11:8-10, 13. Lawɔ Yeso tokeketshaka dia sho nɔmbaka la “wembiya” ndo dia sho ‘ntetemala nɔmba’ nyuma k’ekila. Sho kokaka nto nɔmba Jehowa dia nde tosha ɛlɔmbwɛlɔ kele laso ohomba l’oyango wa mbɔsa tɛdikɔ t’amɛna.
JEHOWA TƆLƆMBƆLAKA
8. Lo nshi y’edjedja, ngande wakakotshama ɛtɛkɛta wa lo Isaya 30:20, 21?
8 Adia Isaya 30:20, 21. Etena kakakitsha asɔlayi w’ase Babilɔna pango suke la Jɛrusalɛma l’edja k’ɔnɔnyi l’etenyi, anto wakasowe lo yɛdikɔ y’efula polo ndo ndjokoma oko wambekesanɛ la sui diakɔ. Koko, lo ndjela divɛsa dia 20 ndo 21, Jehowa akalake ase Juda dia naka vɔ ndjatshumoya ndo ntshikitanya nkɛwɔ yawɔ, kete nde ayowashimbɛ. Lo mbɔsa Jehowa oko ‘Ombetsha awɔ wa Woke,’ Isaya akalake anto dia Jehowa ayowaetsha woho wakokawɔ mbɔɔtɛmɔlaka lo woho wetawɔnde. Ɛtɛkɛta ɛsɔ wakakotshama etena kakatshungɔ ase Juda oma lo lɔhɔmbɔ. Jehowa akɛnya dia nde mbele Ombetsha awɔ wa Woke ndo l’ɛse k’ɛlɔmbwɛlɔ kande, atɛmɔdi ande wakatondoya okaloyelo w’ɔtɛmwɛlɔ wa pudipudi. Tekɔ la diɛsɛ lo woho wele Jehowa Ombetsha aso wa Woke ɛlɔ kɛnɛ.
9. Naa yoho mɔtshi yalongolaso ɛlɔmbwɛlɔ oma le Jehowa ɛlɔ kɛnɛ?
9 Lo avɛsa anɛ, Isaya tɛdikaka l’ambeki wetshama oma le Jehowa lo toho tohende. Yoho ya ntondo, Isaya mbutaka ɔnɛ: “Wɛ ayɛna Ombetsha ayɛ wa Woke la washo ayɛ hita.” L’ɛnyɛlɔ kɛsɔ, Isaya mbutaka dia Ombetsha memala la ntondo k’ambeki ande. Ekɔ tshondo ya diɛsɛ le so lo woho watetsha Jehowa ɛlɔ kɛnɛ. Ngande watetsha Jehowa? Nde salaka dui sɔ lo tshimbo y’okongamelo ande. Tekɔ la lowando l’efula oma lo ɛlɔmbwɛlɔ kalongolaso oma le okongamelo wa Jehowa! Sho nongolaka olowanyelo ɔsɔ lo tshimbo ya nsangaya yaso ya l’etshumanelo, nsanganya ya weke, lo tshimbo y’ekanda aso, ya waa emisiɔ wa JW Televiziɔ ndo lo toho tokina efula tatokimanyiya dia mbikikɛ ntena dia paa nɛ l’ɔngɛnɔngɛnɔ.
10. Lo woho akɔna wokaso “dui oma l’ɔkɔngɔ aso”?
10 Isaya shilaka yoho ya hende yatetsha Jehowa lo mbuta ate: “Atoyi ayɛ wayoka dui oma l’ɔkɔngɔ ayɛ.” Lanɛ omvutshi mbɛdikaka Jehowa l’ombetsha wele la yambalo watakɛndakɛnda l’ɔkɔngɔ w’ambeki ande lo mbatɛ mboka kakɔna kahombawɔ ntshɔ dia mbalɔmbɔla. Ɛlɔ kɛnɛ sho mbokaka dui dia Nzambi oma l’ɔkɔngɔ aso. Lo woho akɔna? Ɛtɛkɛta wa Nzambi wakasambiyama wakafundama lo Bible edja efula la ntondo. Ɔnkɔnɛ, etena kadiaso Bible ekɔ oko tekɔ lo mpokamɛ dui dia Nzambi diaya oma l’ɔkɔngɔ aso.—Isa. 51:4.
11. Dia mbikikɛ l’ɔngɛnɔngɛnɔ, awui akɔna wahombaso nsala ndo lande na?
11 Ngande wakokaso nkondja wahɔ tshɛ lo tshɛ lo ɛlɔmbwɛlɔ katosha Jehowa oma lo tshimbo y’okongamelo ande ndo y’Ɔtɛkɛta ande? Tolembete dia Isaya shilaka toho tohende. Yoho ya ntondo, “mboka tɔ kɛnɛ.” Yoho ya hende, “nyɔkɛndɛkɛndɛ lɔkɔ.” (Isa. 30:21) Hatohombe nkomɛ tsho lo mbeya “mboka.” Sho pombaka nto ‘nkɛndankɛnda lɔkɔ.’ Lo tshimbo y’Ɔtɛkɛta wa Jehowa, oko walembetshiya okongamelo ande, sho mbekaka kɛnɛ katɔlɔmba Jehowa. Sho mbekaka nto woho wa nkamba la kɛnɛ kekaso. Dia mbikikɛ l’ɔngɛnɔngɛnɔ l’olimu wakambɛso Jehowa, sho pombaka nsala akambo akɔ ahende. Paka sho mbeki ndo mbokambi la kɛnɛ kekaso, mbakokaso monga l’eshikikelo dia Jehowa ayotofuta.
JEHOWA TƆTSHƆKƆLAKA
12. Lo ndjela Isaya 30:23-26, ngande wakoka Jehowa ntshɔkɔla ekambi ande?
12 Adia Isaya 30:23-26. Ngande wakakotshama prɔfɛsiya kendana l’ase Juda wakakalola l’Isariyɛlɛ l’ɔkɔngɔ wa lɔhɔmbɔ la la Babilɔna? Vɔ wakalongola ɛtshɔkɔ efula, wa lo demba ndo wa lo nyuma. Jehowa akatshɔkɔla ekambi ande lo mbasha mbo ya ndɛ ya lo demba tshavutshavu. Koko, kɛnɛ kakaleke ohomba ele, nde akawasha kɛnɛ tshɛ kaki lawɔ ohomba dia vɔ ndeka ndjasukanya la nde ndo ntatɛ mbɔtɛmɔla nto lo yoho yasungana. Ɛtshɔkɔ wa lo nyuma wakakondja ekambi waki Nzambi wa l’etena kɛsɔ wakaleke la fwa wɛnɛ wakawakondja ntondo. Oko wotamidiɔ lo divɛsa dia 26, Jehowa akaafudiyɛ osase wa lo nyuma wakawakimanyiya dia vɔ ndeka nshihodia Ɔtɛkɛta ande. (Isa. 60:2) Ɛtshɔkɔ wa Jehowa akakimanyiya ekambi ande dia vɔ ntetemala mbokambɛ la ɔngɛnɔngɛnɔ ndo la wolo wa l’etei k’otema “l’ɔtɛ wa eongelo k’ɔlɔlɔ k’otema.”—Isa. 65:14.
13. Ngande wakotshama prɔfɛsiya kendana la okaloyelo w’ɔtɛmwɛlɔ wa pudipudi ɛlɔ kɛnɛ?
13 Onde prɔfɛsiya kendana l’okaloyelo w’ɔtɛmwɛlɔ wa pudipudi mendanaka la so ɛlɔ kɛnɛ? Eelo! Lo woho akɔna? Oma lo 1919 T.D., miliyɔ y’anto wambotshungɔka oma lo lɔhɔmbɔ la Babilɔna ka Woke, tshunda di’ɛtɛmwɛlɔ wa kashi wa l’andja w’otondo. Vɔ wekɔ lo nɔmbwama otsha lo dihole dia dimɛna dioleki Nkɛtɛ ya Daka y’ase Isariyɛlɛ. Vɔ wekɔ lo nɔmbwama otsha lo Paradiso ka lo nyuma. (Isa. 51:3; 66:8) Paradiso ka lo nyuma kɛdikɛdi na?
14. Paradiso ka lo nyuma kɛdikɛdi na ndo waa na wasɛna lɔkɔ ɛlɔ kɛnɛ? (Enda elembetshiyelo w’awui amɔtshi.)
14 Ntatɛ oma lo 1919 T.D., akitami wekɔ lo nsɛna lo paradiso ka lo nyuma.b L’ɔkɔngɔ diko, wanɛ wele l’elongamelo ka nsɛna lanɛ la nkɛtɛ, mbuta ate “ɛkɔkɔ ekina” wakayɔtɔ lo paradiso ka lo nyuma ndo wekɔ lo ngɛnangɛna l’ɛtshɔkɔ w’efula waki Jehowa.—Jni. 10:16; Isa. 25:6; 65:13.
15. Lende atanema paradiso ka lo nyuma?
15 Lende atanema paradiso ka lo nyuma ɛlɔ kɛnɛ? Atɛmɔdi wa Jehowa koka ntanema lo bɛtshi dia nkɛtɛ tshɛ. Koko, paradiso ka lo nyuma kasɛnawɔ tanemaka nto l’andja w’otondo. Ɔnkɔnɛ, ɛlɔ kɛnɛ, oyadi lɛnɛ atanemaso, sho koka monga lo paradiso ka lo nyuma l’edja tshɛ katetemalaso nsukɛ ɔtɛmwɛlɔ wa mɛtɛ.
Ngande wakoka ɔmɔmɔ la l’atei aso mbisha lonya l’olangala wa paradiso ka lo nyuma? (Enda odingɔ 16-17)
16. Ngande wakokaso ntetemala mɛna olangala wa paradiso ka lo nyuma?
16 L’atei w’awui walɔmbama dia sho ntshikala lo paradiso ka lo nyuma, mbele ndo ntetemala monga la lowando lo nkumbo k’Akristo ka l’andja w’otondo. Ngande wakokaso nsala dui sɔ? Ele lo mbika washo lo waonga w’amɛna w’anangɛso l’akadiyɛso koko aha lo wandja awɔ. (Jni. 17:20, 21) Lande na kele dui sɔ diekɔ ohomba? Tende ɛnyɛlɔ kayela kɛnɛ. Sho koka mɛna esongo w’amɛna wotshikitanyi wa lo parkɛ kana wa lo jardɛ. Woho akɔ waamɛ mbele, paradiso ka lo nyuma katanema lo tshumanelo ɛlɔ kɛnɛ ndola la weho w’anto wele oko esongo. (Isa. 44:4; 61:3) Sho pombaka ndjashikikɛ dia ntetemala mbika washo lo dimɛna dia “okonda” koko aha mbika washo l’ɛkɔmɔ kele “l’osongo l’osongo” wele suke la so. Hatokoke mbetawɔ dia wandja aso kana w’anto akina tekola wɔɔngɔ oma lo nkumbo k’Akristo k’olangala kele kaamɛ l’andja w’otondo.
17. Kakɔna kakoka ɔmɔmɔ la l’atei aso nsala dia mbisha lonya lo kaamɛ ka l’etshumanelo?
17 Kakɔna kakoka ɔmɔmɔ la l’atei aso nsala dia nama kaamɛ ka l’etshumanelo kɛsɔ? Lo monga wanɛ wadja wɔladi. (Mat. 5:9; Rɔmɔ 12:18) L’etena tshɛ kasalaso la wolo dia mbidja wɔladi lam’asaso l’anto akina l’etshumanelo, sho mbishaka lonya lo olangala wa paradiso ka lo nyuma. Sho mbeyaka dia Jehowa ekɔ lo nkotola ɔmɔmɔ la l’atei aso lele lo paradiso ka lo nyuma otsha lo ɔtɛmwɛlɔ wa pudipudi. (Jni. 6:44) Ohokanyiya ɔngɛnɔngɛnɔ wonga la Jehowa etena katɛnande tasala la wolo dia mbidja ki ndo nkeketsha kaamɛ ka lam’asa wanɛ wɔsande la nɛmɔ, mbuta ate ekambi ande!—Isa. 26:3; Han. 2:7.
18. Lo akambo akɔna wahombaso kanaka yimba mbala la mbala ndo lande na?
18 Ngande wakokaso nkondja wahɔ tshɛ lo tshɛ oma lo ɛtshɔkɔ wakondjaso oko weso ekambi wa Nzambi? Sho koka nkana yimba efula la kɛnɛ kekaso oma lo Ɔtɛkɛta wa Nzambi ndo oma lo ekanda aso walembetshiya Bible. Wekelo ndo okanelo wa yimba wa ngasɔ wayotokimanyiya dia nkɛnɛmɔla waonga w’Okriso watotshutshuya dia mɛnya “ngandji k’onto l’ɔnango” ndo ‘mbokana ngandji k’efula k’onto l’ɔnango’ l’etshumanelo. (Rɔmɔ 12:10) Etena kakanaso yimba l’ɛtshɔkɔ aso wa nshi nyɛ, sho keketshaka diɔtɔnganelo diasaso la Jehowa. Ndo nkana yimba l’ɛtshɔkɔ watolaka Jehowa lo nshi yayaye, ayotokimanyiya dia sho ntetemala nama elongamelo ka mbokambɛ pondjo pondjo. Akambo asɔ tshɛ wayotokimanyiya dia sho ntetemala kambɛ Jehowa l’ɔngɛnɔngɛnɔ oma ko kakianɛ.
TAMBOYASHIKIKƐ DIA MBIKIKƐ
19. a) Lo ndjela Isaya 30:18, lo na akokaso ndjashikikɛ? b) Kakɔna kayotokimanyiya dia mbikikɛ l’ɔngɛnɔngɛnɔ?
19 Jehowa “ayemala” lo wedi aso etena kayondolanya andja ɔnɛ wa kɔlɔ. (Isa. 30:18) Tekɔ l’eshikikelo dia Jehowa lele “Nzambi ka losembwe” hotshimbatshimba dia ndanya andja wa Satana l’etena kahombama. (Isa. 25:9) Tekɔ lo nkongɛ le Jehowa la solo dia lotutsha tshɛ dia lushi l’etshungwelo lɔsɔ koka. Lam’akatakonge lushi lɔsɔ, nyɛsɔ toyashikikɛ dia ntetemala nkukutɛ diɛsɛ diele laso dia nɔmba, mbadia ndo nkamba l’Ɔtɛkɛta wa Nzambi ndo nkana yimba l’ɛtshɔkɔ aso. Naka sho nsala ngasɔ, kete Jehowa ayotokimanyiya dia mbikikɛ l’ɔngɛnɔngɛnɔ l’ɔtɛmwɛlɔ aso otsha le nde.
OSAMBO 142 Tokukute elongamelo kaso
a Sawo nɛ diayɛnya toho tosato takimanyiya Jehowa atɛmɔdi ande dia mbikikɛ ekakatanu wa lo lɔsɛnɔ l’ɔngɛnɔngɛnɔ. Tayeka kɛnɛ kendana la toho t’ekimanyelo tɔsɔ lo sɛdingola Isaya tshapita 30. Lam’atatavusola tshapita shɔ, tayolembetɛ ohomba wa nɔmbaka Jehowa, wa mbekaka Ɔtɛkɛta ande ndo kanaka yimba l’ɛtshɔkɔ aso wa nshi nyɛ ndo wa lo nshi yayaye.
b ELEMBETSHIYELO W’AWUI AMƆTSHI: “Paradiso ka lo nyuma” ekɔ dihole di’ekokelo diatɛmɔlaso Jehowa kaamɛ. Lo dihole sɔ, tekɔ la mbo ya ndɛ ya lo nyuma tshavutshavu yatotshungola oma lo nkashi y’ɛtɛmwɛlɔ wa kashi ndo tekɔ l’olimu wa tosha ɔngɛnɔngɛnɔ, mbuta ate esambishelo ka lokumu l’ɔlɔlɔ la Diolelo dia Nzambi. Tekɔ la diɔtɔnganelo dia ma ma la Jehowa ndo tekɔ lo nsɛna lo wɔladi kaamɛ l’anangɛso l’akadiyɛso wa ngandji wanɛ watokimanyiya dia mbikikɛ ekakatanu wa lo lɔsɛnɔ l’ɔngɛnɔngɛnɔ. Sho mbɔtɔka lo Paradiso ka lo nyuma etena katatɛso ntɛmɔla Jehowa lo yoho ya dimɛna ndo etena kasalaso kɛnɛ tshɛ kakokaso nsala dia mbookoya.