Ambola w’oma le ambadi aso . . .

Lande na kakalɔmbɛ Nzambi Abarahama dia mbolambola ɔnande?

▪ Oko wɛnyamidiɔ lo dibuku dia lo Bible di’Etatelu, Jehowa Nzambi akalɔmbɛ Abarahama dia nde mbolambola Isaka w’ɔnande. (Etatelu 22:2) Ambadi amɔtshi wa Bible hawoshihodia ɔkɔndɔ ɔsɔ. Prɔfɛsɛrɛ Carol Delaney mbutaka ate: “Mbala ka ntondo kakamoke ɔkɔndɔ ɔnɛ etena kakimi dikɛnda, lakanyange ndo lakate nte naa woho wa Nzambi kalɔmba dia vɔ mbolambola tshondo y’onto?” Kânga mbakoka anto amɔtshi mbuta ɔnɛ kɛnɛ kakandate kɛsɔ kekɔ mɛtɛ, ekɔ akambo ahende wahombaso nama lo yimba.

Ntondotondo, tende kɛnɛ kaki Jehowa kôsala. Nde kombetawɔ di’Abarama nkoma polo ndo lo nkimɔ ɔnande oko olambo kânga mbaki Abarahama suke dia nsala dui sɔ ndo Nzambi kɔnɔmba onto okina dia nde nsala dui sɔ. Jehowa nangaka di’ekambi ande tshɛ mbidja ndo ana dia vɔ monga l’ɔngɛnɔngɛnɔ ndo nsɛna pondjo pondjo.

Dui dia hende ele, Bible mɛnyaka dia Jehowa aki l’ɔkɔkɔ w’oshika wa nɔmba Abarahama dia nde mbolambola Isaka. Nzambi akeyaka dia ntambe efula l’ɔkɔngɔ, nde ayoyokimɔ Ɔnande,a mbuta ate Yeso dia nde ndjovɔ lo wahɔ aso. (Mateu 20:28) Jehowa akalange tɛnya woho wakandakoke ndjaoka etena kakandakimɔ ɔnande ɔsɔ oko olambo. Nde akalange tɛnya nto kɛnɛ kayosalema lo nshi y’otsha la ntondo oma lo kɛnɛ kakandalɔmbɛ Abarahama dia nsala. Lo ngande?

Jehowa akatɛ Abarahama ate: “Ose etoi kaye k’ona, Isaka, lalekaye mbuka ngandji . . . kutûlambuli ulambu wa lutshumba.” (Etatelu 22:2) Lembetɛ dia Jehowa akatɛ Abarahama ate Isaka ekɔ ɔna “lalekaye mbuka ngandji.” Jehowa akeyaka ngandji k’efula kakokaka Abarahama Isaka. Woho akɔ wâmɛ mbele, Nzambi akokaka Yeso y’Ɔnande ngandji k’efula. Jehowa akalangaka Yeso lo yedikɔ y’efula diakɔ diakandate mbala hiende y’etondo oma l’olongo ate ɔnɛ ekɔ “On’ami la ngandji.”—Mako 1:11; 9:7.

Lembetɛ nto dia Jehowa akambe l’ɛtɛkɛta wa dilɛmiɛlɔ etena kakandalɔmbɛ Abarahama dia nde mbolambola ɔnande. Ombewi ɔmɔtshi wa Bible mbutaka ɔnɛ ɛtɛkɛta wakambe la Nzambi lanɛ mɛnyaka dia “NKUMADIƆNDJƆ akeyaka woho wakakoke Abarahama ndjaoka etena kakandɔlɔmbɛ dia nde mbolambola ɔnande.” Ohokanyiya yema kandji kaki la Abarahama etena kakawɔlɔmbɛ ɔnande; ndo pâ k’efula kakonge la Jehowa etena kakandendaka Ɔnande la ngandji asunyasunya dia mvɔ. Aha la tâmu, ɔsɔ aki dui diakaleke mbisha Jehowa pâ ndo ɔsɔ mbaki mbala ka ntondo ka nde mpomana la dui dia ngasɔ ndo ondo nde hahomanaki la diɔ nto pondjo.

Lo mɛtɛ, kânga mbakokaso mɛna oko kɛnɛ kakalɔmbɛ Jehowa Abarahama dia nde nsala bu dimɛna, ekɔ ohomba sho mbeya dia Jehowa kombetawɔ di’Abarahama kanga kɔlamelo nkoma polo ndo lo nkimɔ olambo akɔ. Nde akôshimbe diaha nde nsala dui diakakoke mbonyangiya efula sɔ, mbuta ate nde akakokɛ Isaka diaha nde mvɔ. Koko Jehowa “kumpandja On’andi hita, keli akukimo dikambu diasu.” (Romo 8:32) Ko lande na kaketawɔ Jehowa dia nsala dui diakawosha pâ efula ngasɔ? Nde akasale dui sɔ “dia shu ndjala la lumu.” (1 Joani 4:9) Ande ngandji k’efula kakatoke Nzambi lee! Onde hatotshutshuyama dia sho lawɔ mbôka ngandji?b

[Nɔte ya l’ɛse ka dikatshi]