Awui wambetaka
Lande na kombama awui wambetaka l’okongamelo aso?
ƐMƐNYI WA JEHOWA wekɔ l’ɔkɔndɔ w’otale ndo wa dimɛna wendana l’olimu wôkambɛwɔ. Sho kokaka ntana ɔkɔndɔ ɔsɔ aha paka l’ekanda aso eto, koko ndo lo waa foto, mikanda, ɛkɔndɔ wa nsɛnɔ y’Ɛmɛnyi wa Jehowa ɛmɔtshi ndo lo tshulatshula diendana l’ɔtɛmwɛlɔ aso ndo l’olimu w’esambishelo. Ko lande na kele ekɔ ohomba momba diangɔ sɔ ndo ntɛkɛta di’awui wambetaka l’okongamelo aso? Ewandji wa nkumbo wa l’Isariyɛlɛ wakalɔmbamaka dia mbetshaka anawɔ ɛlɛmbɛ ndo etsha wa diambo waki Jehowa dia vɔ “mbekama le [Nzambi].”—Osam. 78:1-7.
Wadielo wa wɛɔmbɔ wa nkumi ya dikanga dia mbishola awui wambetaka wakakimanyiya dia sangwelo diaki Jehowa kotshama. Ɛnyɛlɔ, etena kakahembe atunyi w’ase Isariyɛlɛ dia nshimba wokelo wa tɛmpɛlɔ la Jerusalɛma, nkumekanga Dariyo akadjangɛ anto ande dia vɔ nyanga mukanda wɛnya dia nkumekanga Kurɔ akasha ase Isariyɛlɛ lotshungɔ la mbika tɛmpɛlɔ. (Ez. 6:1-4, 12) L’ɔkɔngɔ wa mukanda ɔsɔ mbishɔma, tɛmpɛlɔ kakakama lo yoho yɔtɔnɛ la lolango laki Nzambi. Ofundji w’Evanjiliɔ Luka nde lawɔ akasale eyangelo lo efundelo w’edjedja nɛ dia nde akafunde akambo tshɛ “l’onondji w’ololo.”—Luka 1:1-4.
Olui-walɔmbɔla mbidjaka yimba efula l’ɔkɔndɔ w’okongamelo aso. Etena kakandatɛkɛtaka di’ohomba wa momba, mfunda ndo mbeya ɔkɔndɔ w’okongamelo aso, ɔnangɛso ɔmɔtshi la l’Olui-walɔmbɔla akate ate: “Dia mbeya lɛnɛ atatatshu, sho pombaka mbeya oma lɛnɛ ayataye.” Dia nkotsha oyango ɔsɔ, Departɛma diomba awui wambetaka l’okongamelo aso diakatema atete edja lo Bɛtɛlɛ ka la Brooklyn, New York ndo diekɔ lo nɔmbwama oma le Kɔmite k’ofundelo.
FOTO NDO DIANGƆ DIASO DIA NƐMƆ
Lam’atete nshi mbatete ndo ɛnɔnyi ndo ondo efula l’atei aso kombolaka momba awui efula weta lo nkumbo kaso. Ase Departɛma diomba awui wambetaka l’okongamelo aso wekɔ lo nsala kɛnɛ kahombama dia momba diangɔ ndo ekanda wendana l’okongamelo aso. Foto mombamaka dimɛna ndo yɔ koka mbɔsama oko diangɔ dia nɛmɔ efula. Ekanda aso wedjedja, ɛkɔndɔ wakɔndɔla Ɛmɛnyi wa Jehowa vɔamɛ ndo awui wa mbohɔka tanemaka lo departɛma sɔ. Diangɔ sɔ mbɔsamaka oko awui wa mbohɔka watokimanyiya dia mbeya ɔkɔndɔ w’okongamelo aso ndo kongɛ nshi yayaye l’eshikikelo.
Wɛ kokaka mbeya olimu wakambema lo Departɛma diomba awui wambetaka l’okongamelo aso lo mbadiaka sawo di’oyoyo diayotombaka mbala la mbala lo Tshoto y’Etangelo ya wekelo diele l’ɔtɛ a dui ɔnɛ: “Awui wambetaka.” Ɛnyɛlɔ lo numɛlɔ kayaye, tayotondja sawo diayokadimola ambola anɛ: Valizɛ y’etatelo kɛdikɛdi na? Waa na wakakambaka la yɔ? Etena kakɔna kakawakambaka la yɔ ndo l’oyango akɔna?
L’ɛnyɛlɔ ka foto yomba anto, Departɛma diomba awui wambetaka l’okongamelo aso diekɔ l’ɛkɔndɔ efula wendana l’ɔtɛmwɛlɔ aso, ɛnyɛlɔ oko mbetawɔ ndo dihonga dia wanɛ wakasɛnɛ ntondo kaso, ɛlɔlɔ ndo asui wakondjaso l’olimu wa Shɛso lele l’olongo loludi tɔɔ la ngandji ndo woho walɔmbɔlande ndo watetemalande nsukɛ ekambi ande. (Euh. 33:27) Tambolongamɛ ɔnɛ Jehowa ayɔtshɔkɔla welo watetemalaso mbidja dia nama ɔkɔndɔ aso dia sho ndeka monga kâmɛ ndo keketshama dia nsala lolango lande.
[Kiombo/Osato wa lo lɛkɛ 31]
Woho wakambema olimu wa wombelo
Etena kafunda afundji aso ekanda aso w’Akristo, kasalawɔ waa DVD ndo dihomɔ dikina dialembetshiya Bible, vɔ salaka eyangelo lo Departɛma diomba awui wambetaka l’okongamelo aso. Ɔnkɔnɛ, wanɛ wakamba lo departɛma sɔ salaka kɛnɛ tshɛ kahombama dia ntshumanya ndo momba lokema la diangɔ diendana l’ɔkɔndɔ aso di’oma lo waa Bɛtɛlɛ, adepartɛma wa Bɛtɛlɛ, tshumanelo, anangɛso l’akadiyɛso amɔtshi ndo atshunda amɔtshi wa l’andja ɔnɛ. Olimu akɔ salemaka lo yoho nyɛ:
Woho wakondjaso diangɔ ndo wadisɛdingolaso: Wekɔ lo ntetemala nkotsha diangɔ ɔtɔi l’ɔtɔi lo departɛma sɔ. Diangɔ efula diombawɔ diekɔ weshasha wakimɔ anangɛso l’akadiyɛso la ngandji tshɛ kana anto akina wele lo nkumbo ya wanɛ wambokambɛ Jehowa la kɔlamelo l’edja k’ɛnɔnyi efula. Ɔsɛdingwelo ndo wɛdikelo wa diangɔ sɔ tokimanyiyaka dia ndeka nshihodia ɔkɔndɔ w’okongamelo aso ndo w’anto wakasɛnɛ lɔkɔ.
Woho wombama diangɔ diakɔ: Nunu dia diangɔ, mbidja ndo diangɔ diamboviya ndekana ɛnɔnyi lokama, tanemaka lo Departɛma diomba awui wambetaka l’okongamelo aso. Dimɔtshi diekɔ weke, dikina totshitshɛ, dimɔtshi etale ndo dikina tomondo ndo diɔ pombaka nɔngama dimɛna dia ndjokambema lo nshi yayaye.
Woho walɔngɔswama diangɔ diambolana: Abuku ndo diangɔ diakoka ndana esadi nɔngɔswamaka ndo mombamaka oma le tomanyi. Vɔ mombaka ekanda, foto, akatshi wakawahatola lo tojurnalɛ, filmɛ ndo awui wakawasangola l’ɔrdinatɛrɛ. Anto kokaka ndjokamba la diɔ l’ekimanyielo k’ɔrdinatɛrɛ diaha ndanya etondo wa diangɔ diakɔ.
Wombelo ndo okambelo: Diangɔ diendana l’okongamelo aso mombamaka l’ɔnɔngɔ diaha diɔ ndjoshishɔ, ndjolongola kana ndjɔtɔ lombo. Anangɛso wakamba lo departɛma sɔ wekɔ lo momba lokema l’awui l’ɔrdinatɛrɛ dia mbakimanyiya dia vɔ salaka eyangelo ndo kambaka la wɔ etena kalangawɔ mfunda ɔkɔndɔ ɔmɔtshi.
[Esato wa lo lɛkɛ 32]
1. Osato wa “Photo-Drame de la Création.” 2. Listɛ l’amendji. 3. Vɔatirɛ yaki l’ehomɔ kanunya dui. 4. Lohoso la Tshoto y’Etangelo ya Ngɔndɔ ka nɛi 15, 1912. 5. Mukanda wakawatomɛ Joseph Rutherford dia mbonda lo lokanu. 6. Mikro wa WBBR. 7. Fɔnɔ. 8. Valizɛ yɛmbawɔ abuku. 9. Nɔtɛ y’onto ɔmɔ. 10. Mukanda wakawatomɛ Joseph Rutherford.