Anto wekɔ l’oyangelo w’ekadimwelo

“Suke l’onto tshɛ ekɔ la kanyi mɔtshi lo kɛnɛ kendana la woho w’onto waki [Yeso]. Oyadi tekɔ la mbetawɔ kana bu, sho ndjambolaka ɔnɛ: ‘Onto ɔsɔ akinde?’” —OFUNDJI STAN GUTHRIE.

ANTO kombolaka dia mbeya akambo wendana la Yeso. Abuku watɛkɛta dikambo dia nde wamboleka nangema le anto. Filmɛ yendana la nde yamboleka nangema le anto. Koko anto efula wekɔ lo ntetemala ndjaoka ambola lo dikambo dia Yeso. Vɔ wekɔ la tokanyi totshikitanyi lo dikambo dia woho w’onto shikaa waki Yeso.

Ambeta ɛnɔnyi ɛmɔ, tojurnalistɛ tohende wakalɔmbɛ anto dia vɔ mbisha okadimwelo lo dimbola di’ɔnɛ: “Yeso akinde?” Anto wakasha ekadimwelo wayela ɛnɛ:

● “Ondo nde aki ombetsha wakakambe la lɔsɛnɔ lande oko ɛnyɛlɔ k’onto lokana kɛtshi.”

● “Nde aki onto k’onto lakasɛnɛ lɔsɛnɔ lotshikitanyi l’anto akina.”

● “Ndoko djembetelo yɛnya ɔnɛ Yeso aki la lɔsɛnɔ.”

● “Yeso ekɔ Ɔnaki Nzambi lakotɔ, lakavu ndo lakolwama oma lo nyɔi dia toshimbɛ oma lo pɛkato yaso. Nde ekɔ la lɔsɛnɔ ɛlɔ kɛnɛ ndo ayokalola la nkɛtɛ nto.”

● “Dimi mbetawɔka dia Yeso Kristo ekɔ tshɔi y’ɔna Nzambi, lele la demba di’onto ndo dia lo nyuma.”

● “Yeso ekɔ ɔna la lɔfɔnya lakayahamaka.”

Mbokɛmaka hwe dia aha tokanyi tɔsɔ tshɛ mbele mɛtɛ. Onde ekɔ kiɔkɔ mɔ ya waewoyelo yakoka tosha ekadimwelo wa shikaa lo ambola aso wendana la Yeso? Afundji wa jurnalɛ nyɛ mbetawɔka dia Bible ekɔ Ɔtɛkɛta waki Nzambi ndo paka tɔamɛ mbatotɛ akambo wa mɛtɛ tshɛ wendana la Yeso.a—2 Timote 3:16.

Lo sawo diayela, tayɔsɛdingola ekadimwelo washa Bible lo ambola amɔtshi wendana la Yeso. Ndamɛ akate ɔnɛ “untu tshe lawetawo” ayoshimbamɛ. (Joani 3:16) Tambokɔlɔmba dia wɛ nsɛdingola ekadimwelo ɛsɔ ndo oma lâsɔ, ɔsa yɛdikɔ dia mbeya akambo efula wendana la Yeso ndo monga la mbetawɔ le nde.

[Nɔte ka l’ɛse ka dikatshi]