Kɛnɛ kaketsha Yeso lo dikambo diande ndamɛ

OFUNDJI HERBERT LOCKYER akate ate: “Yeso akeyaka dimɛna woho w’onto wakinde, oma lɛnɛ akandaye, bonde kakandaye la nkɛtɛ ndo kɛnɛ kaki la ntondo kande.”

LA NTONDO ka sho mbetawɔ kɛnɛ kaketsha Yeso ndo monga la mbetawɔ lɔkɔ, sho pombaka mbeya dui dimɔtshi lo dikambo diande. Yeso akinde mɛtɛ? Oma lende akandaye? Oyango akɔna waki la nde lo lɔsɛnɔ? Ɛtɛkɛta wakate Yeso ndamɛ wele lo Evanjiliɔ wa Mateu, wa Mako, wa Luka ndo wa Joani kokaka tosha okadimwelo.

Nde aki la lɔsɛnɔ la ntondo ka nde ndjôtɔ la nkɛtɛ Mbala kɛmɔtshi, Yeso akate ate: ‘Dimi laki la lɔsɛnɔ la ntondo ka Abarahama mbotɔ.’ (Joani 8:58) Abarahama akôtɔ ɛnɔnyi oko 2 000 la ntondo ka Yeso ndjôtɔ. Koko Yeso aki la lɔsɛnɔ la ntondo ka owandji wa nkumbo waki la kɔlamelo ɔsɔ ndjôtɔ. Ko lende akandasɛnaka ntondo? Nde akate ate: “Dimi lakayi uma l’ulungu.”—Joani 6:38.

Ɔna Nzambi Jehowa ekɔ la ana efula welɛwɔ andjelo. Koko Yeso ntshikitana la wɔ vɔ tshɛ. Nde akayaelɛ ɔnɛ: ‘Ɔna ɛtɔi laki Nzambi lakandote.’ (Joani 3:18) Etelo kɛsɔ nembetshiyaka ɔnɛ paka Yeso mbakatongama oma le Nzambi ndamɛ. Lo tshimbo ya Ɔnande ɛtɔi lakandote mbakatonge Nzambi diangɔ dikina tshɛ.—Kolosai 1:16.

“On’a untu” Etelo kɛsɔ mbakaleke nkamba la Yeso lo dikambo diande ndamɛ. (Mateu 8:20) Lo yoho shɔ mbakandɛnya dia nde komonga etongami ka lo nyuma kakalɔtɛ demba di’onto kana edimu. Nde aki onto la mɛtɛ mɛtɛ. Lo tshimbo ya nyuma kande k’ekila, Nzambi akasangola lɔsɛnɔ l’Ɔnande l’otema waki Mariya laki osekaseka w’emuma ko nde akatshu diemi. Ngasɔ mbakotɔ Yeso oko onto la kokele ndo laha la pɛkato.—Mateu 1:18; Luka 1:35; Joani 8:46.

Mɛsiya wakalakema Womoto ɔmɔtshi l’ose Samariya akatɛ Yeso ate: “Dimi mbeyaka nti: Mesiya lundjayi.” Nde akawotɛ ate: “Dimi ako one, lateketa la ye.” (Joani 4:25, 26) Tshɛkɛta “Mɛsiya” la “Kristo” nembetshiyaka “Okitami.” Yeso akakitama kana akasɔnama oma le Nzambi dia mɛmba ɔkɛndɛ wa lânde l’okotshamelo w’alaka waki Nzambi.

Ɔkɛndɛ ande wa ntondo Mbala kɛmɔtshi, Yeso akate ate: “Dieli la mi dia nsambisha lukumu l’ololo la diulelu dia [Nzambi] . . . ne dia dimi lakatumama dia dikambu diako.” (Luka 4:43) Kânga mbakandakimanyiyaka anto efula waki lo dihombo, esambishelo ka Diolelo diaki Nzambi mbaketaka la ntondo lo lɔsɛnɔ lande. Tayɔtɛkɛta l’ɔkɔngɔ dia kɛnɛ kakandetsha lo dikambo dia Diolelo sɔ.

Mbokɛmaka hwe dia Yeso komonga onto k’onto.a Oko wayotodiɛna, lɔsɛnɔ laki la nde l’olongo lakɛnya dia ɛtɛkɛta wakandate etena kakinde la nkɛtɛ waki mɛtɛ. Hatohombe mamba dia mboka ɔnɛ nde akasambisha losango lakahombe ndjonga la shɛngiya ya wolo lo nsɛnɔ ya miliyɔ y’anto wa l’andja w’otondo.

[Nɔtɛ ka l’ɛse ka dikatshi]