Sawo kâmɛ l’osukanyi ɔmɔtshi—Onde Yeso ekɔ Nzambi?

ƐMƐNYI WA JEHOWA ngɛnangɛnaka dia nsawola kâmɛ l’asukanyi awɔ akambo wa lo Bible. Onde wɛ toyambolaka dia dikambo dimɔtshi dia lo Bible? Onde wɛ nangaka mbeya awui amɔtshi wendana la waetawɔ kana la ditshelo dia l’ɔtɛmwɛlɔ wa Ɛmɛnyi wa Jehowa? Naka eelo, kete tengengake dia mbutɛ Ɔmɛnyi wa Jehowa ɔmɔtshi dui diele la yɛ mbala kekina kayonyɛnana. Nde ayɔngɛnangɛna dia nsawola la yɛ akambo asɔ.

Awui wayela anɛ wekɔ sawo diakoka Ɔmɛnyi wa Jehowa ɔmɔtshi nsawola nde l’osukanyi ande. Tende woho wasawola Karen, Ɔmɛnyi wa Jehowa ɔmɔtshi wamboya laka womoto ɔmɔtshi lelɛwɔ Samantha.

Onde ekɔ mɛtɛ dia nyu bu la mbetawɔ le Yeso?

Samantha: Pastɛrɛ kaso mbutaka dia Ɛmɛnyi wa Jehowa bu la mbetawɔ le Yeso. Onde ngasɔ mbediɔ?

Karen: Lambokoshikikɛ dia tekɔ la mbetawɔ le Yeso. Lo mɛtɛ, sho mbetawɔka ɔnɛ monga la mbetawɔ le Yeso ekɔ ohomba efula di’onto nkondja panda.

Samantha: Dimi lawɔ mbetawɔka ngasɔ.

Karen: Ɔsɔ ekɔ dui dimɔtshi dietawɔso sho ahende. Lokombo lami Karen, onde dimi koka mbeya lokombo layɛ?

Samantha: Lokombo lami Samantha. Lambɔngɛnangɛna dia nsawola la yɛ.

Karen: Dimi lawɔ lambɔngɛnangɛna dia nsawola la yɛ Samantha. Ondo wɛ ndjambolaka ɔnɛ: ‘Naka Ɛmɛnyi wa Jehowa wekɔ la mbetawɔ le Yeso, lande na kata anto ɔnɛ vɔ bu la tɔ?’

Samantha: Eelo, dimi nangaka mbeya dui sɔ.

Karen: Ekɔ akambo efula wakokaso mbuta Samantha, koko lânga kolembetshiya lo tshena pe. Tekɔ la mbetawɔ ka wolo le Yeso, koko sho hatetawɔ kɛnɛ tshɛ kata anto lo dikambo diande.

Samantha: Kakɔna kahanyetawɔ lo dikambo dia Yeso?

Karen: Eelo, anto efula mbutaka dia Yeso aki tsho onto ɔlɔlɔ. Koko, sho hatetawɔ kanyi shɔ.

Samantha: Ndo dimi lawɔ haletawɔ.

Karen: Ɔsɔ ekɔ dui dikina dietawɔso sho ahende. Ɛnyɛlɔ ka hende ele, Ɛmɛnyi wa Jehowa hawetawɔ wetshelo walɔshana la kɛnɛ kakate Yeso ndamɛ lo dikambo dia diɔtɔnganelo diele lam’asande la She.

Samantha: Kakɔna kalangayɛ mbuta?

Karen: Ɛtɛmwɛlɔ efula mbetshaka ɔnɛ Yeso ekɔ Nzambi. Shi kɛsɔ mbakawaketsha?

Samantha: Eelo, pastɛrɛ kaso mbutaka ɔnɛ Nzambi nde la Yeso wekɔ onto ɔtɔi.

Karen: Ko onde wɛ ayetawɔ dia yoho ya dimɛna ya mbeya kɛnɛ kele mɛtɛ lo dikambo dia Yeso ele nsɛdingola kɛnɛ kakandate ndamɛ lo dikambo diande?

Samantha: Eelo, layetawɔ.

Kakɔna kakate Yeso?

Karen: Ɛsɔ tɔsɛdingole divɛsa dia lo Bible diatokimanyiya dia sho nshihodia dui sɔ. Lam’alangɛ, lembetɛ kɛnɛ kadiaso lo Joani 6:38. Yeso akate ate: “Ne dia dimi lakayi uma l’ulungu, aha dia ndjutsha lulangu lami, keli lulangu la one lakantumi.” Ɛtɛkɛta ɛsɔ totowomanema mfundo otondonga Yeso mbele Nzambi.

Samantha: Kakɔna kalangayɛ mbuta?

Karen: Eelo, lembetɛ dia Yeso akate ate nde kondja oma l’olongo dia ndjosala lolango lande ndamɛ.

Samantha: Eelo, nde akate dia nde akaye dia ndjosala lolango la Ɔnɛ lakôtome.

Karen: Ko naka Yeso mbele Nzambi, onto akɔna lakôtome oya la nkɛtɛ? Ndo lande na kaketawɔ Yeso dia nsala lolango laki Onto ɔsɔ?

Samantha: Lambotatɛ nshihodia kɛnɛ katayɛ. Koko haletawɔ dia divɛsa ɔtɔi nɛ to mbashikikɛ ɔnɛ Yeso bu Nzambi.

Karen: Ɛsɔ tɔsɛdingole kɛnɛ kakate Yeso lo diaaso dikina. Nde akate ɛtɛkɛta wa ngasɔ lo tshapita yahɔnyi ya lo Joani. Lam’alangɛ, onde wɛ kokaka mbadia Joani 7:16?

Samantha: Eelo, lambadia ɔnɛ: “Jesu akâkaluya diui ati: Wetshelu ami aha wami, keli wa one lakantumi.”

Karen: Losaka efula. Lo ndjela divɛsa nɛ, onde Yeso aketshaka akambo ande hita?

Samantha: Ndoko, nde akate dia nde aketshaka akambo waki Ɔnɛ lakôtome.

Karen: Ngasɔ mbediɔ, dikambo sɔ monyiyaka ambola akina: ‘Onto akɔna lakatome Yeso? Ndo onto akɔna lakawosha akambo wa mɛtɛ wakandetshaka?’ Shi ayonga Ɔnɛ loleki Yeso woke? Ndo nto, onto latoma ndeka onto latomande.

Samantha: Ekɔ dimɛna. Taladiaka divɛsa sɔ.

Karen: Tɔsɛdingole nto ɛtɛkɛta waki Yeso wele lo Joani 14:28 wata ɔnɛ: “Nyu nyakuki diui diakamanyutela nti: Dimi layutsho, ku layukalula le nyu. Utunduyala nyu nyakanangi, tshiki nyutongenangena, ne dia dimi layutsho le Papa, ne dia Papa ambundeka.” Lo ndjela divɛsa nɛ, ngande wakokayɛ mbuta woho wakayaɔsaka Yeso lo diɔtɔnangelo diasande la She?

Samantha: Nde akate ate She mboleka. Lâsɔ lamboka dia nde akɔsaka dia Nzambi mboleka.

Karen: Ngasɔ mbediɔ. Ɛnyɛlɔ kekina tɔ kɛnɛ, lembetɛ kɛnɛ kakatɛ Yeso ambeki ande oko wofundamidiɔ lo Mateu 28:18. Divɛsa diakɔ mbutaka ɔnɛ: “Wakambisha wulu tshe ndu l’ulungu ndu la kete.” Ko onde Yeso akate dia nde mbaki la lowandji loleki tshɛ?

Samantha: Ndoko, nde akate dia wakawosha lɔ.

Karen: Ko naka Yeso mbele Nzambi, ngande wakokawɔ nyomoyowosha lowandji nto? Ndo onto akɔna lakawosha lɔ?

Samantha: Layotokana yimba lo dimbola sɔ.

Nde l’onto akɔna lakasawolaka?

Karen: Ekɔ dikambo dikina di’ehekesa naka Yeso mɛtɛ mbele Nzambi.

Samantha: Naa dikambo diakɔ?

Karen: Kɛnɛ kakete etena kakabatizama Yeso. Lembetɛ ɔkɔndɔ wofundami lo Luka 3:21, 22. Onde wɛ kokaka mbadia avɛsa asɔ lam’alangɛ?

Samantha: Lambadia ɔnɛ: “Lam’akabatizama antu tshe, kakabatizama ndu Jesu. Lam’akandalombaka, ulungu akadiho. Ku nyuma k’ololo akûhulwela l’utundu uku fudu ka inga. Diui diakayi uma l’ulungu ati: On’ami la ngandji keye! we ambongenyangenya.”

Karen: Onde wɛ akalembete kɛnɛ kakasalaka Yeso etena kakawobatizaka?

Samantha: Nde akalɔmbaka.

Karen: Eelo, ngasɔ mbediɔ. Wɛ kokaka ndjambola wate: ‘Naka Yeso ekɔ Nzambi, onto akɔna akandalɔmbaka?’

Samantha: Ɔsɔ ekɔ dimbola dia dimɛna. Layotombola pastɛrɛ kaso.

Karen: Dikambo dikina diahombaso nkana la diɔ yimba ele, etena kakatombe Yeso oma l’ashi, onto ɔmɔtshi akatɛkɛta oma l’olongo. Onde wɛ akalembete kɛnɛ kakate Onto akɔ?

Samantha: Nde akate ate: Yeso ekɔ Ɔnande, Nde mbokaka ngandji ndo Nde atɔngɛnangɛnaka.

Karen: Ngasɔ mbediɔ. Ko naka Yeso mbele Nzambi, onto akɔna akate akambo asɔ oma l’olongo?

Samantha: Latakanyiyaka dia dikambo sɔ.

Bonde kele diɔtɔnganelo diele l’asa Nzambi la Yeso diekɔ oko nɛ diele l’asa “Papa” la “Ona”?

Karen: Dikambo dikina diangaso nsɛdingola diɔ nɛ: Takadisha dia Yeso akelɛ Nzambi ɔnɛ She lele l’olongo. Ndo etena kakabatizama Yeso, dui diakokɛma oma l’olongo diata ɔnɛ Yeso ekɔ Ɔnami. Lo mɛtɛ, Yeso ndamɛ akayaelɛ Ɔna Nzambi. Lâsɔ, naka wɛ nangaka mbutɛmi ɔnɛ anto ahende wekɔ popo, diɔtɔnganelo dia ngande dia lo nkumbo diakokayɛ nkamba la diɔ dia mɛnya dikambo sɔ?

Samantha: Dimi kokaka mbuta dikambo di’ana w’otema ɔtɔi.

Karen: Ekɔ ngasɔ, mbuta ate wɛ kokaka mbaelɛ ɔnɛ ana a waasa. Koko Yeso akate dia Nzambi ekɔ She ndo nde ekɔ Ɔna. Lâsɔ, kakɔna kafɔnyayɛ kakalange Yeso mbuta?

Samantha: Lamboka kɛnɛ kalangɛ mbuta. Yeso akate dia ɔmɔtshi ndeka okina ndo onto akɔ ekɔ la lowandji loleki wonyande.

Karen: Ekɔ ngasɔ. Ohokanyiya dikambo nɛ: Wɛ kokaka nkanyiya dikambo dia ɛnyɛlɔ kɛmɔ k’anto wele popo, mbuta ate ana w’otema ɔtɔi kana ana a waasa. Lâsɔ, naka mɛtɛ Yeso mbele Nzambi, onde wɛ fɔnyaka dia Yeso lele Ombetsha a Woke totondokamba l’ɛnyɛlɔ kakɔ kâmɛ kana koleki dimɛna dia mɛnya woho wewɔ popo?

Samantha: Ekɔ ngasɔ.

Karen: Koko, lo dihole dia nsala ngasɔ, nde akakambe la tɔtɛkɛta “Papa” la “Ona” dia mɛnya diɔtɔnganelo diasande la Nzambi.

Samantha: Wɛ ambosha nkanyi ya dimɛna efula.

Kakɔna kakate ambeki wa Yeso wa ntondo?

Karen: La ntondo ka dimi ntshɔ, dimi nangaka nsɛdingola la yɛ dui dikina diendana la sawo diaso naka wɛ ekɔ l’etena.

Samantha: Eelo, lambokosha minitɛ ngana tsho.

Karen: Naka Yeso mɛtɛ mbele Nzambi, shi wɛ nongamɛka di’ambeki ande wotolembetshiya dikambo sɔ dimɛna?

Samantha: Ngasɔ mbediɔ.

Karen: Koko, ndoko dihole diadaso l’Afundelo ɔnɛ vɔ waketsha dikambo sɔ. Lembetɛ kɛnɛ kakafunde ɔpɔstɔlɔ Paulo ombeki wa Yeso ɔmɔtshi wa lo ntambe ka ntondo. Lo Filipi 2:9, nde nembetshiyaka kɛnɛ kakasale Nzambi l’ɔkɔngɔ wa nyɔi ndo wa eolwelo ka Yeso ate: “[Nzambi] akawumbiya otekoya, akawole lukumbu leli ladiku dia kumbu tshe.” Lo ndjela divɛsa nɛ, Nzambi akandasalɛ Yeso?

Samantha: Diɔ mbutaka ɔnɛ Nzambi akawombiya lo dihole dia lâdiko.

Karen: Eelo. Ko naka Yeso aki popo la Nzambi la ntondo ka nde mvɔ ko l’ɔkɔngɔ diko Nzambi ndjowombiya lo dihole dia lâdiko, onde Yeso otoyonga lâdiko dia Nzambi? Ngande wakoka onto ɔmɔtshi ndeka Nzambi?

Samantha: Nde hakoke mboleka. Dui sɔ hakoke salema.

Karen: Ekɔ ngasɔ. Lo ndjela tolembetelo tɔsɔ tshɛ, onde wɛ ayokoka mbuta dia Bible mbetshaka ɔnɛ Yeso ekɔ Nzambi?

Samantha: Ndooko. Bible mbutaka ɔnɛ nde ekɔ Ɔnaki Nzambi.

Karen: Ngasɔ mbediɔ. Samantha, eya dia Ɛmɛnyi wa Jehowa nɛmiyaka Yeso efula. Sho mbetawɔka dia nyɔi kande oko Mɛsiya wakalakema kakadiholɛ anto tshɛ wele la kɔlamelo mboka kotsha lo panda.

Samantha: Dimi lawɔ lambetawɔ dui sɔ.

Karen: Koko, wɛ kokaka ndjambola wate: ‘Ngande wakokaso mɛnya Yeso ɔnɛ sho mandolaka woho wakandakimɔ lɔsɛnɔ lande dikambo diasɔ?’a

Samantha: Latayambolaka dimbola dia ngasɔ.

Karen: Ondo layokoka nkalola dia ndjokɛnya okadimwelo washa Bible lo dimbola sɔ. Onde wɛ ayonga la ngelo lo wenya wa nganɛ lomingu layaye?

Samantha: Eelo, layonga.

Karen: Kawɔ tayoyɛnana.

[Nɔte ka l’ɛse ka dikatshi]