Onde wɛ âkohɔ?

Onde wɛ akangɛnangɛna wadielo wa numɛlɔ ya Tshoto y’Etangelo yeke katomba? Naka ngasɔ, kete enda dia kana wɛ kokaka nkadimola ambola wayela anɛ:

Lo woho wakɔna wele Sɔlɔmɔna ɛnyɛlɔ k’ɔhɛmwɛlɔ le so?

Nzambi akatshɔkɔla nkumekanga Sɔlɔmɔna. Lonyangu ko, nde akayotakɔka mboka etena kakandolɛka l’Isariyɛlɛ. Ɛnyɛlɔ, nde akatshuke ɔna womoto laki Farawɔ, akatshuke wamato efula ndo vɔ wayôtakoyaka ɔtɛmwɛlɔ wa mɛtɛ. Ɔnkɔnɛ, sho pombaka mbewɔ dia tashishaka waonga ndo mbekelo y’amɛna yema yema. (Euh. 7:1-4; 17:17; 1 Khum. 11:4-8)—12/15, lɛkɛ 10-12.

Lande na ndjela atɔndɔ wa lo Bible?

Wanɛ wasɛna lo yoho yɔtɔnɛ l’atɔndɔ wa lo Bible wekɔ la nkum’otema ka pudipudi ndo la diokanelo dia ma ma l’ase nkumbo yawɔ. (Osam. 19:8, 11) Wanɛ wɔnyɔla atɔndɔ wa lo Bible diɛnɛka mbala efula la pâ ya lo yimba.—1/1, lɛkɛ 8-9.

Lande na kakokaso mbuta ɔnɛ oma ko ntambe ka ntondo polo ndo ɛlɔ kɛnɛ Akristo w’akitami wôkongaka la nkɛtɛ?

Lo wɛɛla wa Yeso wa “epunga” la “kangaka,” “wuhu w’ololo” nembetshiyaka “ana wa diulelu.” (Mat. 13:24-30, 38) Kangaka l’eponga wakahombe mbola kâmɛ polo l’etena ka dinela. Ɔnkɔnɛ, kânga mbahatakoke mbuta waa na waki Akristo w’akitami asɔ, tekɔ l’eshikikelo ɔnɛ vɔ wôkongaka la nkɛtɛ oma ko ntambe ka ntondo.—1/15, lɛkɛ 7.

Ngande wakokaso ndɔshana la kandjema?

Ele lo nsala akambo wayela anɛ: Mboka anangɛso ndo akadiyɛso ngandji k’onto l’ɔnango, mbokana la wanɛ woka Nzambi wɔma, nsala kɛnɛ kele ɔlɔlɔ ndo ‘ngɛnangɛna la wanɛ wangɛnangɛna.’ (Romo 12:15)—2/15, lɛkɛ 16-17.

Awui akɔna wahombayɛ nama lo yimba etena kashayɛ alako?

Tokoteyi otondo a dikambo. Tosasɛke dia nkadimola. Kamba l’Ɔtɛkɛta waki Nzambi l’okitshakitsha tshɛ. Naka kokaka, kamba l’ekanda aso ekina. Ewɔ dia mbɔsa yɛdikɔ lo dihole di’onto.—3/15, lɛkɛ 7-9.

Anasi latɛkɛtawɔ l’ɛkɔndɔ wa l’Evanjiliɔ wendana la kilombo ka Yeso akinde?

L’etena kakawalomboshaka Yeso, Anasi aki ‘ɔlɔmbɛdi wa lâdiko.’ (Luka 3:2) Nde akakambaka oko ɔlɔmbɛdi wa lâdiko oma lo ntambe 6 kana 7 T.D. polo lo ntambe ka 15 T.D., ndo nde akatetemala monga la shɛngiya ya wolo l’Isariyɛlɛ.—4/1, lɛkɛ 9.

Kakɔna kakalange Yeso mbuta etena kakandate ate kotshu la nde kilɔmɛtɛlɛ hiende? (Mat. 5:41)

L’etena kɛmɔtshi l’Isariyɛlɛ, ase Rɔma wakayodjasɛ lɛkɔ lo tshanda mɔtshi wakâkandjaka elimu la wolo. Ɔnkɔnɛ, lo nkeketsha ampokami ande dia vɔ nkɛndakɛnda kilɔmɛtɛlɛ ka hende, Yeso akalangaka mbatɛ dia vɔ mbetawɔ la lolango elimu wakawâkandjaka ɛsɔ nɛ dia ɔsɔ aki didjango di’ewandji wa lɛɛta.—4/1, lɛkɛ 9.

Lande na kabatizama Akristo ndo ngande wakoka onto nkotsha kɛnɛ kalɔmbama dia nsala dui sɔ?

Batismu ekɔ yoho ya nɔmba Nzambi dia monga la diɔtɔnganelo dia dimɛna la nde. (1 Pet. 3:21) Lo nsala dɔmbɛlɔ dia woshɛshɛ, sho ndjakimɔka le Jehowa lo ntshika dɔkɔlɔkɔ dia salaka lolango lande lo lɔsɛnɔ laso l’otondo. L’ɔkɔngɔ wa sho ndjakimɔ lo dɔmbɛlɔ lo woshɛshɛ, sho mɛnyaka ndjakimɔ kɛsɔ lo sɛkɛ lo batizama.—4/1, lɛkɛ 16-17.

Onto akɔna akatome ‘yɔɔtɔ’ dia nɔmbɔla waa astrɔlɔgɛ?

Ele ɔnɛ laki la nsaki ka mɛna ɔna dikɛnda Yeso adiakema, mbuta ate Satana Diabolo. Nde nyangaka dia minganyiya anto, keketshaka awui wa kashi, wa ngala ndo nyangaka dia ntshulola dikila. Ɔnkɔnɛ, hatokoke mamba l’ɔtɛ wakawelɛ Yeso ndamɛ ɔnɛ “kanga kashi . . . ndu shi kashi” ndo wakandate lo dikambo diande ɔnɛ: “Uma l’etatelu ndi aki undjakanyi.” (Joa. 8:44)—4/1, lɛkɛ 29.