“Lakayokondja lotshungɔ la mɛtɛ”

NSHI YAMI YAKETE:

Lakotɔ la Moundsville, osomba waki komonga l’akambo wa ngala wele l’omamu wa ndjale ka Ohio lo nɔrdɛ ka Virginie-Occidentale lo wodja w’États-Unis. Takotɔ ana anɛi, apami asato la womoto ɔtɔi ndo dimi laki ɔna la hende. Lam’ele taki ana efula, lofunge lakongaka wonya tshɛ la ngelo. Ambutshi ami wakakambaka olimu efula ndo waki anto w’ɛlɔlɔ wakokaka anto akina ngandji. Sho komonga l’ekondjelo k’efula, koko takakondjaka nshi tshɛ kɛnɛ kaki la so ohomba. Lam’ele vɔ waki Ɛmɛnyi wa Jehowa, ambutshi ami wakasalaka la wolo dia tetsha atɔndɔ wa lo Bible oma ko tɔkɛndakɛnda taso.

Koko, lamakamakotsha ɛnɔnyi dikumu l’ɛmɔtshi, mbala tshɛ otema ami wakatshutshuyaka dia ntona akambo wakawambetshaka. Lakayambola dia kana onto lasɛna lo ndjela atɔndɔ wa lo Bible koka monga l’ɔngɛnɔngɛnɔ. Lakafɔnyaka ɔnɛ di’onto monga l’ɔngɛnɔngɛnɔ wa mɛtɛ, nde pombaka nsala kɛnɛ tshɛ kahombande nsala. Ɔtɛkɛta kele edja, ekanelo ka kɔlɔ kɛsɔ kakakonya dia dimi ntshika dia mbɔtɔ lo nsanganya y’Akristo. Enondo ami la pami ndo kosɛmi ka womoto wakayele lokolo lami. Ambutshi aso wakasale kɛnɛ tshɛ kakawakoke nsala dia tokimanyiya, koko welo awɔ tshɛ wakɔtɔ l’ashi.

Dimi kɔfɔnyaka ɔnɛ lotshungɔ lakamatayangaka lakahombe ndjokonya mfumbe ka didjoyadjoya. Lushi lɔmɔtshi l’ɔkɔngɔ wa sho ntomba oma lo kalasa tatatshu otsha la ngelo, ɔngɛnyi ami ɔmɔtshi akambisha otamba wa mfɔka dia dimi nnɔ ko lakalongola. Oma ko lushi lɔsɔ, lakatatɛ nsala akambo akina efula wa kɔlɔ. L’edjedja ka wonya, lakayokomaka mfumbe ka didjoyadjoya, omunga a wanu ndo lakayashaka lo dieyanelo dia mindo. L’edja k’ɛnɔnyi efula, lakayoyasha l’awui wa didjoyadjoya dia wolo ndo lakayongaka mfumbe kadiɔ. Dia ndjasha tshavu l’awui wendana la didjoyadjoya, lakatatɛ disondja dia ndjasɛnya.

Kaanga mbakamasalaka la wolo diaha mpokamɛ kɛnɛ kakambutɛka nkum’otema kami, tɔ kakamboholaka mbala tshɛ dia lakasɛnaka yoho ya lɔsɛnɔ ya kɔlɔ. Koko lakafɔnyaka ɔnɛ ashi wambotshulɔ, hayeyama ntɔngɔna. Kaanga mbakimi l’angɛnyi efula lo waa fɛtɛ ndo lo ahole wakatahomaka mishiki, lakayaokaka opoko mbala efula ndo laki l’ɔkɔmwɛlɔ. Lakayoshihodiaka dia ambutshi ami waki anto w’ɛlɔlɔ ndo lakayambolaka lande na kakamatakɔ mboka.

WOHO WAKATSHIKITANYA BIBLE LƆSƐNƆ LAMI:

Kaanga mbakamafɔnyaka ɔnɛ ashi wambotshulɔ hayeyama ntɔngɔna, aha ndo ambutshi ami mbakafɔnyaka ngasɔ. Ɛnyɛlɔ, vɔ wakambelɛ dia dimi tɔtɔ lo Losanganya la distrikɛ lakahombe salema lo ɔnɔnyi wa 2000. Koko, lakatshu l’etema ehende. Ndjaka oko kashi, enondo ami la pami la koshɛmi ka womoto wanɛ wakatɔmbɔkɔ ndo vɔ lawɔ wakɔtɔ lo losanganya lakɔ.

Etena kakimi lo losanganya lakɔ, lakohɔ dia takaye ndjohoma mishiki lo dihole diakɔ diaamɛ ɔnɔnyi wetshi. Woho waki ofukutanu komonga akamambiya efula. Etena kakatatshu lo dihole diakɔ diaamɛ dia tohoma mishiki, mindo ndo edinga wa mfɔka wakikɔ ahole tshɛ. Anto efula wakayaka dia ndjohokamɛ mishiki komonga la loshilambo ndo awui wakatembaka lo mishiki wakashaka ɔkɔmwɛlɔ. Koko, anto waki kaamɛ la mi lo Losanganya waki l’ɔngɛnɔngɛnɔ wa mɛtɛ, wakanongola la waasaso kaanga mbakametshanya la wɔ ɛnɔnyi efula. Dihole diakasalema losanganya lɔsɔ diaki pudipudi ndo asawo tshɛ wakashama wakashaka elongamelo. Etena kakamoke wetshelo wa mɛtɛ watshikitanya nsɛnɔ y’anto, lakayambola lande na kakamatakɔ mboka k’akambo wa mɛtɛ.​—Izaya 48:17, 18.

Kam’akashile losanganya, lakɔshi yɛdikɔ ya nkalola l’etshumanelo k’Akristo. Lam’ele enondo ami la pami la kosɛmi ka womoto vɔ lawɔ wakanandema la wetshelo wakashama lo losanganya lɔsɔ, ndo vɔ wakɔshi yɛdikɔ ya nkalola oma lo mboka k’akambo wa kɔlɔ. Sho akɔ asato takatatɛ mbeka Bible.

Divɛsa diakaleke minandami ko Jakɔba 4:8 diata ɔnɛ: “Nyoyasukanya la Nzambi, ko nde ayoyasukanya la nyu.” Lakashihodia ɔnɛ dia dimi ndjasukanya la Nzambi, lakahombe nsala etshikitanu lo lɔsɛnɔ lami wele oko ntshika nnɔ mfɔka, didjoyadjoya ndo mbidjɔ wanu.​—2 Kɔrɛtɔ 7:1.

Lakahembola losambi l’angɛnyi ami w’edjedja ndo lakɔtɔ lɔngɛnyi l’ekambi wa Jehowa. Ekumanyi kakekaka la mi Bible mbakaleke kimanyiyami. Mbala la mbala nde akambelɛka lo telefɔnɛ ndo akadjɛka la ngelo dia tamendji. Polo ndo nshi nyɛ, nde ekɔ ɔmɔtshi l’atei w’angɛnyi ami w’eshika.

Lo eleko kamɔnga akatshi lo 2001, lakɛnya ndjakimɔ kami le Nzambi etena kakamabatizama ndo enondo ami la pami la kosɛmi ka womoto vɔ lawɔ wakabatizama. Ande ɔngɛnɔngɛnɔ waki l’ambutshi ami ndo kosɛso ka pami kaki la kɔlamelo etena kakonge nkumbo kaso k’otondo kaamɛ l’ɔtɛmwɛlɔ wa Jehowa lee!

WAHƆ WAMBOMOKONDJA:

Lakafɔnyaka dia wanɛ wakitanyiya atɔndɔ wa lo Bible wekɔ lo shasa, koko kakianɛ vɔ wekɔ tshondo y’ekokelo. Bible kakakimanyiya dia ntshika nnɔ ndo nsondja didjoyadjoya ndo lakayokoma onto ɔlɔlɔ.

Laya la diɛsɛ dia monga l’atei wa nkumbo k’onto l’ɔnango k’Ɛmɛnyi wa Jehowa wa l’andja w’otondo wokana ngandji ka mɛtɛ lam’asawɔ ndo wakambɛ Nzambi kaamɛ. (Joani 13:34, 35) Oma lo nkumbo kɛsɔ mbakamayokondja diɛsɛ dia laande dia ntshuka kadiyɛso Adrianne lalangami efula. Diɛsɛ sɔ diakatela ɔngɛnɔngɛnɔ w’efula dia sho kambɛ Otungi aso kaamɛ.

Lo dihole dia ntetemala nnɔ ndo nsondja didjoyadjoya, lamboyakimɔ la lolango dia nkamba olimu wa lo tena tshɛ dia mbetsha anto woho wakokawɔ nkondja wahɔ oma l’Ɔtɛkɛta waki Nzambi. Olimu ɔsɔ mbishakami ɔngɛnɔngɛnɔ waheyama mbɛdika. Lamboshikikɛ dia Bible ambotshikitanya lɔsɛnɔ lami. Lakayokondja lotshungɔ la mɛtɛ.