“Wɛ . . . ambowashola le ana w’akɛnda”

Onde wɛ kombolaka mbeya akambo wa mɛtɛ wendana la Nzambi, mbuta ate ende, kɛnɛ kalangande ndo kɛnɛ kahandalange? Jehowa Nzambi tosholɛka akambo wa mɛtɛ wendana la nde l’Ɔtɛkɛta ande Bible. Koko aha onto tshɛ mbakoka mbadia Bible ko nshihodia akambo wa mɛtɛ asɔ. Lande na? Nɛ dia aha onto tshɛ mbalongola diɛsɛ dia nshihodia akambo wa mɛtɛ. Ɛsɔ tɔsɛdingole kɛnɛ kakate Yeso lo kɛnɛ kendana la dui sɔ.​—Adia Mateo 11:25.

Divɛsa sɔ tatɛka l’ɛtɛkɛta wayela ɛnɛ: “L’etena kɛsɔ, Yeso akate ate.” Ɔnkɔnɛ, okadimwelo wakalange Yeso mbisha lo divɛsa nɛ wakendanaka l’akambo waki oma la mbeta. Nde aki oma la mpangwɛ anto wakadjasɛka lo esomba esato wa la Ngalileya lɛnɛ akandasale ahindo efula, koko ndoko onto laketawɔ nkoma ombeki ande. (Mateo 11:20-24) Wɛ mbeyaka ndjambola ɔnɛ: ‘Ngande wakoka anto mɛna Yeso asala ahindo efula ngasɔ ko ndoko kaanga onto ɔtɔi lakakome ombeki ande?’ Nɛ dia anto asɔ wakatetemala nkeketsha etema awɔ.​—Mateo 13:10-15.

Yeso akeyaka ɔnɛ dia sho nshihodia akambo wa mɛtɛ wendana la Nzambi watanema lo Bible, akambo ahende anɛ wekɔ ohomba: Nyanga ekimanyielo kaki Nzambi ndo monga l’otema wosembwe. Nde akate ate: “Papa, wɛ Owandji w’olongo la nkɛtɛ, lambokotombola lo sɛkɛ, nɛ dia wɛ akashɛ akambo anɛ le akanga wa tomba ndo le ambeyi wa mukanda ko ambowashola le ana w’akɛnda.” Onde wɛ ambolembetɛ ɔnɛ nshihodia akambo wa mɛtɛ watanema lo Bible ekɔ tshondo ya diɛsɛ? Jehowa lele “Owandji w’olongo la nkɛtɛ” mbeyaka mbishɛ kana mbishola akambo wa mɛtɛ lo ndjela lolango lande oko wende Nkum’Olongo. Koko kɛnɛ kele mɛtɛ ele, onto tshɛ koka mbeya akambo wa mɛtɛ nɛ dia Nzambi kema la shɔnɔdi. L’ɔtɛ w’ɛkɔkɔ akɔna washolande akambo wa mɛtɛ watanema lo Bible paka le anto amɔtshi ato?

Jehowa mbetawɔka akanga w’okitshakitsha ndo petshaka akanga w’otako. (Jakɔba 4:6) Nde akashɛ akambo wa mɛtɛ le “akanga wa tomba ndo le ambeyi wa mukanda,” mbuta ate anto wele la yimba ya l’andja ɔnɛ ndo wakeke mukanda efula ndo wafɔnya dia vɔ kema l’ohomba w’ekimanyielo kaki Nzambi l’ɔtɛ w’otako awɔ. (1 Kɔrɛtɔ 1:19-21) Koko nde akashola akambo wa mɛtɛ le “ana w’akɛnda,” mbuta ate anto wele l’okitshakitsha oko ana w’akɛnda. (Mateo 18:1-4; 1 Kɔrɛtɔ 1:26-28) Yeso Ɔna Nzambi akeyaka weho w’anto asɔ tshɛ. Ewandji w’ɛtɛmwɛlɔ waki l’otako ndo wakeke mukanda efula koshihodia losango laki Yeso, koko amundji wa nse waki l’okitshakitsha wakalishihodia. (Mateo 4:18-22; 23:1-5; Etsha 4:13) L’etena kakɔ kaamɛ, akanga w’ɛngɔnyi ndo ambeyi wa mukanda amɔtshi wakɛnya okitshakitsha w’oma k’ɛse otema lo nkoma ambeki waki Yeso.​—Luka 19:1, 2, 8; Etsha 22:1-3.

Aya sho kadimolaka dimbola diakatoki l’etatelo ka sawo diata ɔnɛ: Onde wɛ kombolaka mbeya akambo wa mɛtɛ wendana la Nzambi? Naka eelo, kete wɛ ayɔngɛnangɛna dia mbeya ɔnɛ Nzambi hetawɔ wanɛ wayaɔsa oko akanga a tomba. Lo wedi okina, nde mbetawɔka wanɛ wɔnywama oma le akanga a tomba wa l’andja ɔnɛ. Naka wɛ ekɔ lo mbeka Bible l’okitshakitsha, kete wɛ mbeyaka monga l’atei w’anto wakimanyiya Jehowa dia nshihodia akambo wa mɛtɛ wendana la nde. Naka wɛ nshihodia akambo wa mɛtɛ, kete wɛ ayonga la lɔsɛnɔ l’ɔngɛnɔngɛnɔ oma ko kakianɛ ndo dui sɔ diayokokimanyiya dia wɛ ndjokondja “lɔsɛnɔ l’oshika”, mbuta ate lɔsɛnɔ lahakomɛ l’andja w’oyoyo wa losembwe watolakiya Nzambi wayanga ndja kem’edja.a​—1 Timɔte 6:12, 19; 2 Petero 3:13.