Tosambeme ndo tosambe anto akina

Dui dimɔtshi di’ohomba efula diakoka tokimanyiya ele, esambelo kakokaso nkondja oma le ase nkumbo yaso, angɛnyi ndo asekaso ambetawudi.

Ɛtɛkɛta wa la ngandji tshɛ w’oma le ɔngɛnyi aso koka monga oko sosanga watɔkɔnɔyaka hemɔ ndo watokeketshaka. (Tuk. 16:24; 18:24; 25:11) Koko, Akristo wa mɛtɛ hawoyange dia paka anto akina ato mbasambaka. Vɔ mbɔsaka tɛdikɔ tahombama dia “monga l’akoka wa nsamba anto akina lo weho tshɛ w’asui la esambelo [kakawasambema oma le] Nzambi.” (2 Kɔr. 1:4; Luka 6:31) Antonio, omendji ɔmɔtshi wa distrikɛ wa lo wodja wa Mexique akɛnyi mɛtɛ ka dikambo sɔ.

Etena kakawawotɛ la lopitadi l’ɔkɔngɔ wa mbosala ɛgzamɛ ɔnɛ nde ekɔ la hemɔ ka cancer ka lo dikila, Antonio akandama la lɔkɔnyɔ l’efula. Koko, kaanga mbakidiɔ ngasɔ, nde akasalaka la wolo dia mbahemɛ tokanyi ta kɔlɔ takoyɛka. Lo nsala na? Nde akatatɛ mbohɔ esambo wa Diolelo, akawahokamɛka, akawaembaka ndo akakanaka yimba l’ɛtɛkɛta wa lɔkɔ. Nde akasambema nto lo salaka alɔmbɛlɔ wa la dui dia wolo ndo oma lo wadielo wa Bible.

Koko, Antonio mbetawɔka nshi nyɛ dia esambelo koleki tshɛ kakaye oma le asekande ambetawudi. Nde mbutaka ate: “Etena kakatayakiyanyaka efula dimi la wadɛmi, takalɔmbaka ekumanyi kɛmɔtshi ka l’etshumanelo dia nde ndja ndo ndjɔlɔmba kaamɛ la so. Dui sɔ diakatokeketsha ndo diakatosha woladi wa lo yimba.” Koko, nde kotshɛka ate: “Dimi kaloyaka ase nkumbo kaso ndo anangɛso l’akadiyɛso wa lo nyuma tshɛ losaka efula lo woho wakawatosukɛ etena kakiso l’okakatanu dia mbahemɛ tokanyi ta kɔlɔ takatoyɛka.” Ande ɔngɛnɔngɛnɔ waki la nde dia monga l’angɛnyi wakawoke ngandji ndo wakayakiyanya lo dikambo dia nde lee!

Ɛngɔ kekina kakoka tokimanyiya lo tena di’asui ele nyuma k’ekila katolaka Nzambi. Ɔpɔstɔlɔ Petero akate dia nyuma k’ekika kaki Nzambi ekɔ “woshasha.” (Etsha 2:38) Akristo w’akitami efula wakakondja woshasha ɔsɔ lo Pɛntɛkɔsta 33 T.D. Koko, onto tshɛ la l’atei aso kokaka nkondja woshasha akɔ. Nyuma k’ekila toshaka osukɔ waha l’ekomelo, laasɔ shi wɛ kokaka nɔmbaka Nzambi mbala la mbala dia nde koshatɔ?​—Is. 40:28-31.

TOYASHA EFULA LE WANƐ WASOWA

Ɔpɔstɔlɔ Pɔɔlɔ akakikɛ weho w’asui efula wa wolo ndo lo diaaso dimɔtshi nde akahande nyɔi. (2 Kɔr. 1:8-10) Koko, Pɔɔlɔ kondjakiyanya amboleka lo kɛnɛ kendana la nyɔi. Nde akatane esambelo lo mbeya dia Nzambi aki kaamɛ la nde. Nde akafunde ate: “Lotombo layale le Nzambi She Nkumɛso Yeso Kristo, Shɛso ka kɛtshi ndo Nzambi k’esambelo tshɛ, ɔnɛ latosamba lo asui aso tshɛ.” (2 Kɔr. 1:3, 4) Pɔɔlɔ kombetawɔ di’ekakatanu waki la nde mbɔkɔmɔla. Koko, woho wakandakikɛ ehemba wakokomɛ, akokimanyiya dia nde nkɛnɛmɔla kɛtshi l’oyango wa nde ndeka nsamba anto akina wakadiɛnɛka l’asui ndo waki l’ohomba w’esambelo.

L’ɔkɔngɔ wa hemɔ kande nkɔnɔ, Antonio akayokalola l’olimu ande w’omendji. Etena kakinde la hemɔ, nde akasambemaka mbala la mbala oma le asekande ambetawudi, ndo kakianɛ nde la wadɛnde wosala la wolo tshɛ dia membola ndo nkeketsha wanɛ wele la hemɔ. Ɛnyɛlɔ, l’ɔkɔngɔ wa nde membola Okristo ɔmɔtshi waki la hemɔ ka wolo, Antonio akayeya di’ɔnangɛso akɔ konangaka ntshɔ lo nsanganya ya l’etshumanelo nto. Antonio mbutaka ate: “Aha ɔnɛ ɔnangɛso akɔ kombokaka Jehowa kana anangɛso l’akadiyɛso wa lo nyuma ngandji, koko hemɔ kaki la nde ka lo yimba mbakokonya dia ndjaoka oko onto l’anyanya.”

Dikambo dimɔtshi diakasale Antonio dia nkeketsha ɔnangɛso laki la hemɔ ɔsɔ etena kakandatshu dia towenda ele, mbɔlɔmba dia nde nsala dɔmbɛlɔ. Kaanga mbakayaokaka ɔnangɛso akɔ dia nde bu l’akoka wa nsala dɔmbɛlɔ, nde aketawɔ disala. Antonio mbutaka ate: “Nde akasale dɔmbɛlɔ dia dimɛna efula ndo l’ɔkɔngɔ diko nde akayoyaokaka oko aha nde. Nde kondjoyaoka nto oko onto l’anyanya.”

Lo mɛtɛ, sho tshɛ diɛnɛka l’asui wotshikitanyi oyadi wa totshitshɛ kana wa wolo. Koko oko wakadite Pɔɔlɔ, akambo asɔ tokimanyiyaka dia sho nsamba anto akina etena kewɔ l’asui. Ɔnkɔnɛ, nyɛsɔ tongake suke dia nsamba asekaso Akristo ndo tokoya Jehowa Nzambi kaso, lo monga kiɔkɔ y’esambelo le anto akina.