Yeso mbele sheke ya lɔsɛnɔ l’ɔngɛnɔngɛnɔ

ONDE Yeso aki mɛtɛ la lɔsɛnɔ l’ɔngɛnɔngɛnɔ? Mɛnamaka dia nde akoodiama lo nkumbo k’ase wola ndo nde komonga la lomombo la l’emunyi efula. Bible mbutaka dia nde komonga la “dihole dia mbishɛ ɔtɛ ande.” (Luka 9:57, 58) Ndo nto, nde akahetshama, akatɛngama ndo l’ekomelo atunyi ande wakayoodiakaka.

Ondo wɛ mbeyaka ndjambola ɔnɛ, ‘Onde lɔsɛnɔ la ngasɔ aki lɔsɛnɔ l’ɔngɛnɔngɛnɔ?’ Koko, ekɔ awui akina efula wendana la lɔsɛnɔ la Yeso wahombaso nsɛdingola. Nyɛsɔ tɔsɛdingola awui anɛi wendana la lɔsɛnɔ lande.

1. OYANGO WAKI LA YESO LO LƆSƐNƆ LANDE ELE WA NSALA LOLANGO LA NZAMBI.

“Mbo ya ndɛ yami ele nsala lolango la Ɔnɛ lakatome.”​—Joani 4:34.

Oma l’ɛtɛkɛta ndo etsha ande, Yeso akayange dia nsala lolango la She lele l’olongo, mbuta ate Jehowa.a Yeso aki l’ɔngɛnɔngɛnɔ w’efula lo nsala lolango la Nzambi. Nde akɛdika dui sɔ la mbo ya ndɛ, oko wadiɛnya divɛsa dioshidiso la diko ndo. Tende awui wakookonya dia nsala wɛdikelo ɔsɔ.

Yeso akatɛkɛta ɛtɛkɛta ɛsɔ oya lo midi. (Joani 4:6) Nde akakɛndakɛnda pindju k’otondo l’ahole wa akona wa la Samariya, ndo aha la taamu, nde aki la ndjala. Diakɔ diakotshutshuya ambeki ande ɔnɛ: “Ombetsha, lɛka yangɔ.” (Joani 4:31) Oma l’okadimwelo ande, Yeso akɛnya mɛtɛ dia lo nsala Olimu wa Nzambi, nde akaleshamaka ndo akakeketshamaka. Onde kɛsɔ hɛnya dia Yeso aki la lɔsɛnɔ l’ɔngɛnɔngɛnɔ?

2. YESO AKOKAKA SHE NGANDJI K’EFULA.

“Dimi nangaka Papa.”​—Joani 14:31.

Yeso aki la diɔtɔnganelo dia ma ma la She lele l’olongo. Ngandji k’efula kakookaka Yeso She kakootshutshuya dia mbeyanya lokombo la She, asangwelo ande ndo waonga ande. Oma l’ɛtɛkɛta, etsha ndo dionga diande, Yeso akakɛnɛmɔla lo yoho ya kokele lonto la She, polo lo yɛdikɔ yele sho mɛnaka le Yeso ɛnyɛlɔ kasɛna ka She. Ɔnkɔnɛ, etena kakambola Filipɛ Yeso ɔnɛ: “Otɛnya Shɛso” Yeso akookadimola ate: “Onto lambɔmɛna ambɛna ndo Papa.”​—Joani 14:8, 9.

Yeso akokaka She ngandji k’efula diakɔ diakinde suke dia mbokitanyiya polo lo nyɔi. (Filipɛ 2:7, 8; 1 Joani 5:3) Ngandji k’efula kakandokaka Nzambi kakalodia lɔsɛnɔ la Yeso l’ɔngɛnɔngɛnɔ.

3. YESO AKOKAKA ANTO NGANDJI.

“Ndooko ngandji koleki k’onto nkimɔ anima ande dikambo dia angɛnyi ande.”​—Joani 15:13.

Oko weso anto wele keema kokele, nshi yaso yayaye yekɔ nshi ya paa. Bible mbutaka ɔnɛ: “Oko wakɔtɔ pɛkato l’andja oma le onto ɔtɔi [Adama] ndo nyɔi oma lo pɛkato, ɔnkɔnɛ nyɔi kakadiangana le anto tshɛ dikambo anto tshɛ wakasale pɛkato.” (Rɔmɔ 5:12) Sho bu l’akoka wa mbewɔ lo shaomɛ etombelo w’oma lo pɛkato, mbuta ate nyɔi.​—Rɔmɔ 6:23.

Diɛsɛ ko la ngandji tshɛ, Jehowa akɔshi yɛdikɔ ya nshidiya ekakatanu w’ana w’anto. Nde aketawɔ dia Ɔnande la kokele ndo laki kosala pɛkato lakayeyama ɔnɛ Yeso nsoyama ndo ndjakema dia nkimɔ olambo w’etshungwelo waki ohomba dia ntshungola anto oma lɔhɔmbɔ la pɛkato la nyɔi. Ngandji kakokaka Yeso She ndo anto, kakootshutshuya dia mbetawɔ nkimɔ lɔsɛnɔ lande la kokele lo wahɔ aso. (Rɔmɔ 5:6-8) Ngandji ka ndjahombia kɛsɔ kakakimanyiya Yeso dia monga la lɔsɛnɔ l’ɔngɛnɔngɛnɔ.b

4. YESO AKEYAKA DIA SHE MBOOKAKA NGANDJI NDO MBEETAWƆKA.

“Ɔnɛ ele Ɔnami la ngandji letawɔmi.”​—Mateo 3:17.

Jehowa akatɛkɛta ɛtɛkɛta ɛsɔ oma l’olongo etena kakabatizama Yeso. Lo mbuta ngasɔ, Jehowa akakɛnɛmɔla lo sɛkɛ ngandji kakandokaka Ɔnande Yeso ndo woho wakandawetawɔka. Aha la taamu, Yeso akakoke mbuta l’eshikikelo tshɛ ɔnɛ: ‘Papa nangakami.’ (Joani 10:17) Lam’ele nde akeyaka dia She mbookaka ngandji ndo mbeetawɔka, Yeso akatokomɛ ɔlɔshamelo ndo diɔnyɔ la dihonga tshɛ. Ngandji kɛsɔ ndo woho wakawetawɔka She akakimanyiya Yeso dia mbetawɔ ndjakema. (Joani 10:18) Woho wakeyaka Yeso dia She mbookaka ngandji ndo mbeetawɔka mbakokimanyiya dia nde ndeka monga la lɔsɛnɔ l’ɔngɛnɔngɛnɔ.

Lo mɛtɛ, Yeso aki la lɔsɛnɔ l’ɔngɛnɔngɛnɔ. Aha la taamu, sho koka mbeka akambo efula oma le nde lo woho wakokaso monga la lɔsɛnɔ l’ɔngɛnɔngɛnɔ. Lo sawo diayela, tayɛna alako amɔtshi wa shikaa wakasha Yeso ambeki ande wɛnya woho wa monga la lɔsɛnɔ l’ɔngɛnɔngɛnɔ.