ƆTƐ A DUI WA LO LOHOSO: ONDE ANTO KOKA MONGA LA LƆSƐNƆ L’ƆNGƐNƆNGƐNƆ?
Onde anto koka monga la lɔsɛnɔ l’ɔngɛnɔngɛnɔ?
“Nshi ya lumu lasu nkumaka lu deku akumi esambeli, wane wuleki wulu pulu ndu deku akumi enanei. Keli nshi yawo ndjalaka paka pa la asui.”—Osambu 90:10.
ƐTƐKƐTA ɛsɔ wekɔ mɛtɛ nɛ dia lɔsɛnɔ l’anto ndola la “pa la asui.” Ondo wɛ amboyambolaka dia kana ‘anto koka monga la lɔsɛnɔ l’ɔngɛnɔngɛnɔ etena kɛnɛ.’
Tɔshi ɛnyɛlɔ ka Maria. Nde aki la wolo efula koko, ɛlɔ kɛnɛ kayande l’ɛnɔnyi 84 nde hayokoka ntomba oma lo luudu. Ekɔ mɛtɛ dia yimba yande yakakambe dimɛna koko, demba diande diambɔlɛmba. Onde mama kɛsɔ koka mbuta dia nde ekɔ la lɔsɛnɔ l’ɔngɛnɔngɛnɔ?
Ko kayotota lo dikambo diayɛ? Ondo tena dimɔtshi wɛ toyambolaka dia kana lɔsɛnɔ layɛ lekɔ lɔsɛnɔ l’ɔngɛnɔngɛnɔ. Mbeyaka monga ko olimu wakambayɛ wekɔ wolo efula ndo kɔlɛndjaka. Ndo nto, mbeyaka monga ko anto akina hawodje yimba lo welo tshɛ wadjayɛ kana l’olimu wakambayɛ. Oyadi kaanga wɛ ekɔ la lɔsɛnɔ la dimɛna, wɛ mbeyaka ndjakiyanya dikambo dia nshi yayɛ yayaye. Tena dimɔtshi, wɛ mbeyaka ndjaoka opoko kana nkɔmɔ. Lɔsɛnɔ la nkumbo kayɛ mbeyaka monga lɔsɛnɔ loludi l’ekakatanu ndo l’ewanu. Ondo wɛ ambovushaka lakiyɛ ɔmɔtshi la ngandji. Pami kɛmɔtshi kelɛwɔ André akokaka she ngandji k’efula ko she akayondama la hemɔ ka shashimoya ndo ndjovɔ. André mbɔsaka dia nde hatondoyaki pondjo lonyangu ndo lɔkɔnyɔ lele lande.
Oyadi ekakatanu wele laso, sho pombaka ndjambola dimbola di’ohomba efula nɛ: Onde anto koka monga la lɔsɛnɔ l’ɔngɛnɔngɛnɔ? Sho koka kondja okadimwelo lo dimbola sɔ lo nsɛdingola lɔsɛnɔ l’onto ɔmɔtshi lakasɛnɛ la nkɛtɛ ambeta ɛnɔnyi oko 2 000, mbuta ate Yeso Kristo. Oyadi wekamu wakahomana lande, Yeso aki la lɔsɛnɔ l’ɔngɛnɔngɛnɔ. Sho lawɔ koka monga la lɔsɛnɔ l’ɔngɛnɔngɛnɔ naka sho mbokoya ɛnyɛlɔ kande.