EKADIMWELO LO AMBOLA W’OMA LO BIBLE

Onde onto koka nshihodia awui wa lo Bible?

Bible kekɔ Ɔtɛkɛta waki Nzambi. Tɔ kekɔ oko mukanda w’oma le ombutshi wa ngandji. (2 Timɔte 3:16) Lo Bible, Nzambi tolembetshiyaka woho wakokaso mbɔngɛnyangɛnya, lande na katshikande asui ndo kɛnɛ kayondoyosalɛ anto lo nshi yayaye. Koko, ewandji w’ɛtɛmwɛlɔ efula hawetsha kɛnɛ kata Bible. Diakɔ diele, anto efula woyaoka dia hawokoke nshihodia awui wa lɔkɔ.​—Etsha 20:29, 30.

Jehowa Nzambi nangaka dia sho mbeya kɛnɛ kele mɛtɛ lo dikambo dia nde. Diakɔ diakandatosha dibuku diakokaso mbadia ko dioka.​—Adia 1 Timɔte 2:3, 4.

Ngande wakokayɛ nshihodia awui wa lo Bible?

Laadiko dia tosha Bible, Jehowa tokimanyiyaka dia kishihodia. Nde akatome Yeso dia ndjotetsha. (Luka 4:16-21) Yeso akakimanyiya ampokami ande dia nshihodia awui wa lo Bible lo nkamba la avɛsa wa lɔkɔ.​—Adia Luka 24:27, 32, 45.

Yeso akaate etshumanelo k’Akristo dia olimu wakandatatɛ ntetemala kambema. (Mateo 28:19, 20) Diakɔ diele ɛlɔ kɛnɛ Akristo wa mɛtɛ wekɔ lo kimanyiya anto dia vɔ nshihodia kɛnɛ ketsha Bible lo dikambo dia Nzambi. Naka wɛ nangaka nshihodia awui wa lo Bible, kete Ɛmɛnyi wa Jehowa wekɔ suke dia kokimanyiya.​—Adia Etsha 8:30, 31.