Onde onto kokaka shihodia Bible?

“Takadiaka Bible lo nkumbo Lushi la lomingu tshɛ. Lo mɛtɛ, dimi kɔngɛnangɛnaka wadielo ɔsɔ. Lakɔsaka dia Bible ekɔ Ɔtɛkɛta wa Nzambi, koko efula k’awui wakamadiaka waki wolo shihodia.”​—Steven, Grande-Bretagne.

“Etena kakimi l’ɛnɔnyi 17, lakahembe mbadia Bible, koko lam’akamɛnyi dia ekɔ wolo kishihodia, lakatshike.”​—Valvanera, Espagne.

“Lakadia Bible mbala kɛmɔtshi nɛ dia lakɔsaka dia oko wakimi oseka Mupɛ, lakahombe kiadia. Dui sɔ diakambɔsɛ ɛnɔnyi esato dia kishidiya! Koko dimi koshihodia awui efula wakamadia.”​—Jo-Anne, Australie.

BIBLE ekɔ dibuku dioleki munandema l’andja w’otondo. Diɔ tetemalaka sondjama ndeka abuku akina tshɛ, diekɔ lo ɛtɛkɛta efula ndo ɛlɔ kɛnɛ kamboleka Bible kahanyema lo toho totshikitanyi. Koko, efula k’anto wele la Bible mɛnaka di’ekɔ wolo kishihodia. Onde ngasɔ mbediɔ ndo le yɛ?

Onde Nzambi nangaka dia sho shihodia Ɔtɛkɛta ande?

Bible mbutaka ɔnɛ: ‘Afundelo tshɛ wakasambiyama oma le Nzambi.’ (2 Timote 3:16) Eelo, Jehowa Nzambi mbele Kiɔkɔ ya Bible. Onde nde nangaka dia sho shihodia Ɔtɛkɛta ande? Kana onde l’okonda tshɛ, nde aketɛ Bible wolo diaha anto tshɛ kishihodia onyake anto amɔtshi ato wele oko ewandji w’ɛtɛmwɛlɔ ndo nomb’ewo y’awui wa lo Bible?

Tɔsɛdingole avɛsa wele lo Bible anɛ:

“Olembe one wamumunyudjela elo hawunyuleki wulu, ndu vo kema etali uma le nyu.”​—Euhwelu k’Elembe 30:11.

“Eotwelo ka aui aye katutungaka usasi. To katushaka dinginya yimba.”​—Osambu 119:130.

“Lu unya oso Jesu akangenangena le nyuma k’[ekila]. Ndi akati ati: Papa, uwandji w’ulungu la kete lambukandula, ne dia we akashe akambu ane le akanga a tumba la ewu, ku ambuwashula le tokendakenda.”​—Luka 10:21.

Ɔnkɔnɛ, Nzambi nangaka dia sho shihodia Ɔtɛkɛta ande! Koko, kɛnɛ kele mɛtɛ ele anto efula wele l’etema w’ɛlɔlɔ mɛnaka diekɔ wolo shihodia dibuku sɔ. Kakɔna kakoka mbakimanyiya? Asawo wayela wekɔ la awui asato wakoka kokimanyiya dia wɛ shihodia Bible.