Wetshelo akɔna wakokaso nkondja oma le otshi ɔmɔtshi wa kɔlɔ?

Otshi wa kɔlɔ wakokaso mbeka awui amɔtshi oma le nde ekɔ ɔnɛ lɛnaso Yeso atɛkɛta la nde l’osato ɔnɛ. Nde ekɔ la lonyangu l’ɔtɛ wa kɔlɔ yande, ko ɔɔlɔmba Yeso ate: “Kombohɔ lam’ayoyonga lo Diolelo diayɛ.” Oko wɛnayɛ l’osato, Yeso ekɔ lo ntɛkɛta nde la otshi wa kɔlɔ ɔsɔ. Onde wɛ mbeyaka kɛnɛ kawotɛ Yeso?—a Yeso ekɔ lo mbolaka ate: “Lo mɛtɛ kakotɛmi ɛlɔ nte: Wɛ ayoyala la mi lo Paradiso.”

Oko le yɛ, ngande wayonga Paradiso kɛsɔ?— Dia sho nkondja okadimwelo wa dimɛna lo dimbola sɔ, ɛsɔ totokɔtɛkɛta dia Paradiso kakakitsha Nzambi pami la womoto la ntondo, Adama l’Eva. Lende aki Paradiso kɛsɔ na? Onde tɔ kaki l’olongo, ko kana la nkɛtɛ?—

Naka wɛ mbuta ɔnɛ la nkɛtɛ, kete mɛtɛ katayɛ. Ɔnkɔnɛ, woho wayonga otshi wa kɔlɔ ɔsɔ lo “Paradiso,” tɛnyaka dia nde ayoyɔsɛna lo nkɛtɛ kambokadimɔ paradiso. Ngande wayoyala Paradiso kɛsɔ na?— Ɛsɔ tende woho wayotoyala.

L’ɔkɔngɔ wa Jehowa Nzambi ntonga atshukanyi wa ntondo, Adama l’Eva, Bible mbutaka dia nde akaakitsha lo paradiso lanɛ la nkɛtɛ. Tɔ kakelamɛka ɔnɛ: ‘Ekambɔ k’Ɛdɛna.’ Onde wɛ kokaka nkanyiya woho waki ‘ekambɔ k’Ɛdɛna’ kɛsɔ olangala efula?— Lo mɛtɛ, tɔ kaki dihole di’olangala efula dia mbidjasɛ oleki ahole tshɛ wɛnaso ɛlɔ kɛnɛ!

Kakɔna kafɔnyayɛ? Onde Yeso ayoyala lanɛ la nkɛtɛ kaamɛ l’otshi wa kɔlɔ ɔsɔ wakayatshumoya oma lo kɔlɔ yande?— Keema, Yeso ayonga l’olongo, koko nde ayɔlɔmbɔlaka Paradiso ka la nkɛtɛ oko wende Nkumekanga. Laasɔ, Yeso ayonga kaamɛ l’otshi wa kɔlɔ ɔsɔ lo yoho nyɛ yayondowolola oma lo nyɔi ndo yayondosala di’ehomba ande kotshama lo Paradiso ka la nkɛtɛ. Ko lande na kayetawɔ Yeso di’otshi wa kɔlɔ ɔsɔ monga lo Paradiso ka la nkɛtɛ?— Ɛsɔ tɔtɛkɛtɛ yema dia dikambo sɔ.

Ekɔ mɛtɛ di’otshi wa kɔlɔ ɔsɔ akasale awui wa kɔlɔ efula. Ngasɔ mbediɔ ndo lo dikambo dia miliyara nkina y’anto yakasɛnɛ lanɛ la nkɛtɛ. Koko efula ka l’atei awɔ wakasalaka awui wa kɔlɔ, nɛ dia ndooko lushi lakaweke akambo wendana la Jehowa ndo kɛnɛ kalangande dia vɔ nsala.

Ɔnkɔnɛ, anto asɔ, mbidja ndo otshi wa kɔlɔ wakatɛkɛtaka la Yeso, wayoolɔ dia ndjɔsɛna lo Paradiso ka lanɛ la nkɛtɛ. Vɔ wayoyetshama lolango laki Nzambi. Oma laasɔ, mbayowoyokoka ndjɛnya ngandji kokawɔ Jehowa.

Ko onde wɛ mbeyaka woho wakokawɔ mɛnya ngandji kɛsɔ?— Ele lo nsala kɛnɛ kalanga Nzambi dia vɔ nsala. Ande ɔlɔ wayonga la so dia nsɛna lo Paradiso ndo mongaka nshi tshɛ kaamɛ la wanɛ woka Jehowa ndo asekawɔ anto ngandji lee!