Jehowa ‘ekɔ lo mɛmbɛmi wetsho ami lushi la lushi’

Lakotɔ lo 1956 la hemɔ ka okandji la etenyi k’ekolo tshɛ mbɔlaka (spina bifida). Hemɔ kɛsɔ kambonkonya diaha dimi monga l’akoka wa nkɛndakɛnda ndo kambombela hemɔ nkina ya wolo.

La ntondo ka dimi mbotɔ, waa misiɔnɛrɛ ɛmɔtshi w’Ɛmɛnyi wa Jehowa wakayetshaka ambutshi ami Bible. Etena kakimi dikɛnda, paka apandjudi yema tshitshɛ tsho mbaki lo osomba wa Usakos, lo wodja wa Namibie lɛnɛ akiso. Lam’ele etshumanelo komonga, takasalaka nsanganya lo nkumbo. Etena kakamakotsha ɛnɔnyi esambele, wakansale epaso wa wolo efula dia dimi nkondja woho wa nɔka wanyi. Lam’akamakotsha ɛnɔnyi 14, lakatatɛ nkita ekunyɛ. Lam’ele kalasa yakamahombe mbɔtɔ yaki etale, dimi komonga l’akoka wa tshɔka lo kalasa.

Ɔnkɔnɛ, lakɔshi yɛdikɔ ya nkeketsha diɔtɔnganelo diasami la Jehowa. Ekanda aso efula komonga lo Afrikaans, ɔtɛkɛta ami wa lootɔ. Diakɔ diakamɔshi yɛdikɔ ya mbeka Angɛlɛ l’oyango wa dimi mbadiaka ekanda aso. Etena kakamakotsha ɛnɔnyi 19, lakakome opandjudi wahatabatizama. L’ɛnɔnyi ɛnɛi wakayele, lakandama la hemɔ ya lo demba ndo ya lo tokanyi. Kaanga mbakatadjasɛka l’osomba wele anto waki la diɔtɔnganelo dia ma ma, wɔma w’anto wakanshimbaka dia dimi nsambisha l’ohetoheto.

Etena kakimi l’ɛnɔnyi 20 l’ɛmɔtshi, takonɔ oma la Namibie otsha l’Afrique du Sud ndo ɔsɔ mbaki mbala kami ka ntondo ka monga lo etshumanelo kɛmɔtshi. Dui sɔ diakambisha ɔngɛnɔngɛnɔ w’efula. Koko lɛsɔ nto, wakatonsalaka epaso l’okandji.

Yema tshitshɛ oma lasɔ, lakayele sawo dimɔtshi diakasha omendji w’otshimbedi diendana la olimu w’ombatshi mboka. Sawo sɔ diakananda otema ami efula. Lakeyaka dia dimi komonga l’akoka wa nsambisha oko ombatshi mboka, koko lakɛnyi dia Jehowa akansukɛka l’ekakatanu ami tshɛ. Ɔnkɔnɛ, lakɔshi yɛdikɔ ya nkoma ombatshi mboka wa pondjo. Koko l’ɔtɛ wa hemɔ yaki la mi, dikumanyi wakatone dia dimi nkamba olimu w’ombatshi mboka.

Oma laasɔ, lakayɔsaka yɛdikɔ ya ndjasha efula l’olimu w’esambishelo. Diɛsɛ l’ekimanyielo kaki mama ndo k’anto akina, lakasambisha oko ombatshi mboka wa pondjo l’edja ka ngɔndɔ shamalo. Dui sɔ diakankimanyiya dia dimi nkamba olimu w’ombatshi mboka ndo diakɛnya dia hemɔ yami hayotombidjɛ wekamu. Lakalodia nto dɛmandɛ ndo mbala kɛsɔ dikumanyi waketawɔ. Lo Ngɔndɔ ka divwa 1, 1988 mbakamakome ombatshi mboka wa pondjo.

Etena kakamakome ombatshi mboka mbakamaleke mɛna osukɔ wa Jehowa le mi. Woho wetshami anto akambo wa mɛtɛ wendana ndo la hemɔ yele la mi ekɔ lo kokɛmi, ekɔ lo keketshami ndo amboleka kimanyiyami dia dimi mpama lo nyuma. Lekɔ l’ɔngɛnɔngɛnɔ w’efula lo woho wamomokimanyiya anto efula dia vɔ ndjakimɔ le Jehowa ndo batizama.

Eelo mɛtɛ leke la hemɔ. Koko Jehowa ‘ekɔ lo mɛmbɛmi wetsho ami lushi la lushi.’ (Osam. 68:19) Laadiko dia nde kimanyiyami dia dimi mbikikɛ ekakatanu, Jehowa ambonsalɛ akambo akina efula ndo nde ambombisha mposa ka nsɛna.