ASAWO WƆTƆNƐ L’ƆTƐ A DUI WA LO LOHOSO: LANDE NA KELE ASUI EFULA NGANƐ? ETENA KAKƆNA KAYOWOKOMƐ?
Nyemba y’anto waha l’onongo wekɔ lo nshisha nsɛnɔ
Noelle aki ɔna lakalangemaka efula ndo lakalangaka nsanga asango. Lam’akandatetetaka lushi lɔmɔtshi la dikɔlɔ l’otshimba wa luudu lawɔ, nde akatotambɛ lo difuku di’ashi diɔkawɔ ko akavu mingu hiende la ntondo ka nde nkotsha ɛnɔnyi ɛnɛi.
Charlotte, Daniel, Olivia, Josephine . . . waki l’atei w’ana 26 waki l’ɛnɔnyi lam’asa 26 la 27 wakakandema la kalasa lo ngelo ka Connecticut, lo États-Unis lo Ngɔndɔ ka dikumi l’ahende 14, 2012. Etena kakashaka nkumekanga Obama sawo di’okundelo, nde akashile nkombo y’ana akɔ ko akatɛ wanɛ wakoohokamɛka ate: “Awui w’epetenge wa nganɛ pombaka nshila.”
Etena kakakotsha Bano ɛnɔnyi dikumi l’enanɛi lo 1996, nde la nkumbo kande wakonɔ oma lo wodja wa Iraq dia todjasɛ la Norvège. Asekande wakawelɛka Sun Rays lokombo lande la lɔtɛtɛmɔla. Lonyangu ko, lo Ngɔndɔ k’esambele 22, 2011, Bano aki l’atei w’anto 77 wakadiakema oma le elengalenga kakafune ate: “Lekɔ la lonyangu lo woho wahamadiaki anto efula ndeka wanɛ wakamadiaki.”
Ɛkɔndɔ wa kandji wa ngasɔ wekɔ lo kɔndwama l’andja w’otondo. Ɛnyɛlɔ, anto efula mongaka la lɔkɔnyɔ la mamba etena kasala ewotɔ awɔ kana angɛnyi awɔ aksida, kaakomɛ awui wa ngala, kalɔma ata, kadiakemawɔ l’esehe, kahomɔwɔ mpokoso y’oma lo diangɔ diakatongama ndo kadiɛnɛwɔ l’akambo akina. Anto efula waha l’onongo wekɔ lo mvɔ ovɔvɔ ndo wekɔ lo nsowa osowasowa.
Anto amɔtshi mamaka Nzambi onongo ndo mbutaka dia nde hakokɛ anto. Akina mbutaka dia nde ekɔ lo mɛna woho wasowaso, koko halange mbekɛ lonya. Ndo akina nto mbutaka dia Nzambi ambokongɛka mpokoso tshɛ la ntondo. Kɛsɔ mɛnyaka dia anto efula wekɔ la tokanyi totshikitanyi lo kɛnɛ kendana la mpokoso yatokomɛ. Ko lende akokaso ntana ekadimwelo wa shikaa? Lo asawo wayela, Ɔtɛkɛta wa Nzambi Bible wayotɛnya lande na kasowaso ndo woho wayoshila asui akɔ.