Kɛnɛ kakasale Nzambi dia ntshungola anto

Nzambi akalake Abrahama kanga kɔlamelo ɔnɛ “kanula” yakalakema yayotomba oma l’ɔlɔndji ande. Lo tshimbo ya kanula shɔ, anto wa lo “wedja tshe” wayɔtshɔkwama. (Etatelu 22:18) Jakɔbɔ y’okana waki Abrahama akayonɔka otsha l’Edjibito lɛnɛ akatofulanɛka nkumbo kande kakayongaka wodja w’Isariyɛlɛ w’edjedja.

L’ɔkɔngɔ diko, Farawɔ laki nkumekanga ka ngala ka l’Edjibito akayokonya ase Isariyɛlɛ ɛhɔmbɔ edja ndo lam’akayotoma Nzambi omvutshi Mɔsɛ, lakayatondjaka oma lo wodja w’Edjibito, lo mbatola Ndjale ka beela lo yoho ya dihindo. L’ɔkɔngɔ wa laasɔ, Nzambi akasha ase Isariyɛlɛ wadjango, mbidja ndo ɛlɛmbɛ dikumi dia mbalɔmbɔla ndo mbakokɛ. Ɛlɛmbɛ ɛsɔ wakɛnyaka di’onto lakasalaka pɛkato akahombaka nkimɔ olambo dia nde dimanyiyama. L’ekimanyielo ka nyuma kaki Nzambi, Mɔsɛ akatɛ ase Isariyɛlɛ ɔnɛ Nzambi ayotoma omvutshi okina. Omvutshi akɔ mbakahombe ndjonga “kanula” yakalakema.

L’ɔkɔngɔ w’ɛnɔnyi ndekana 400, Nzambi akatɛ nkumekanga Davidɛ dia onto lakahombe ndja, mbuta ate “kanula” yakalakema l’Ɛdɛna, yakahombe ndjonga Nkumekanga lo diolelo diayotshikala pondjo. Nde mbakahombe ndjonga Mɛsiya, mbuta ate Otshungodi wakasɔnama oma le Nzambi dia nshimbɛ anto ndo mbetɛ nkɛtɛ Paradiso.

Lo tshimbo ya Davidɛ ndo amvutshi akina, Nzambi akatasholaka awui akina wendana la Mɛsiya yema yema. Vɔ wakate dia nde ayonga l’okitshakitsha, ɔlɔlɔ ndo l’ɛlɔmbwɛlɔ kande ndjala, awui wa wɛngiya ndo ata hawoyala nto. Anto tshɛ wayoyala lo wɔladi lam’asawɔ ndo lam’asawɔ la waa nyama. Elando, asui ndo nyɔi, mbuta ate akambo tshɛ waki komonga lo sangwelo diaki Nzambi wayoshila ndo wanɛ wakavu wayolɔ dia ndjɔsɛna la nkɛtɛ.

Nzambi akewoya lo tshimbo y’omvutshi Mika dia Mɛsiya akahombe ndjotɔ la Bɛtɛlɛhɛma ndo lo tshimbo y’omvutshi Danyɛlɛ dia nde akahombe ndjodiakema. Koko, Nzambi akalake nto dia nde akahombe mbolola Mɛsiya oma lo nyɔi ndo mbetɛ Nkumekanga l’olongo. Danyɛlɛ akate nto dia l’ekomelo Diolelo diaki Mɛsiya diayoyɔhɛna waolelo akina tshɛ wa l’andja ɔnɛ. Onde Mɛsiya akaye mɛtɛ oko wakadiatama?

—Awui ango tanemaka lo Etatelu tshapita 22-50, Etumbelu, Euhwelu k’Elembe, 2 Samuele, Osambu, Isaya, Danyele, Mika, Zekariya 9:9.