Wakayakimɔ la lolango dia tokimanyiya la Philippines

AMBETA oko ɛnɔnyi dikumi wakakambaka Gregorio nde la Marilou ka wadɛnde oko ambatshi mboka la Manille. Laasɔ ko waya onto l’onto l’ɛnɔnyi 30 l’ɛmɔtshi ndo wakamba olimu wa l’emunyi wakawaɔsɛka wenya efula. Vɔ wakatondoya kaanga mbaki dui sɔ komonga wɔdu. Oma laasɔ, wakakonya Marilou owandji wa bankɛ kakandakambaka. Marilou mbutaka ate: “Olimu aso ɔsɔ wakatokimanyiyaka dia sho monga la lɔsɛnɔ la dimɛna.” Lam’ele akambo wakatatshɔka dimɛna lo lɔsɛnɔ lawɔ, vɔ wakɔshi yɛdikɔ ya mbikisha luudu la dimɛna efula lo kilɔmɛtrɛ 19 lo ɛstɛ ka Manille. Wakokana la tshunda dimɔtshi diakanɛ mvudu dia vɔ mbafutaka ngɔndɔ tshɛ l’edja k’ɛnɔnyi dikumi.

“LAKƐNYI DIA LEKƆ LO MBIVA JEHOWA”

Marilou mbutaka ate: “Lam’ele olimu ɔsɔ wakambɔsɛka wenya efula ndo wakanɔmbaka dia dimi ndjasha la tshondo tshɛ lɔkɔ, ohetoheto ami l’akambo wa lo nyuma wakatatɛ nkitakita. Lakɛnyi dia lekɔ lo mbiva Jehowa.” Nde kotshaka ate: “Dimi kosambishaka nto lofulo la wenya lakamayashikikɛ dia sambishaka ngɔndɔ tshɛ.” Lam’ele dui sɔ diakawakiyanyaka, Gregorio nde la Marilou wakasawola dia mbeya woho wahombawɔ nkamba la wenya awɔ lo yoho ya dimɛna. Gregorio mbutaka ate: “Takakombolaka nsala etshikitanu, koko sho kombeyaka woho wakatahombe ntatɛ nsala dui sɔ. Oko weso bu l’ana, takakɛtshanya dia mbeya woho wakatakoke ndeka nkamba la nsɛnɔ yaso l’olimu waki Jehowa. Takalɔmbɛ Jehowa dia nde tɔlɔmbɔla.”

L’etena kɛsɔ, vɔ wakahokamɛ asawo wotshikitanyi wakatɛkɛtaka dia tokamba lɛnɛ ewɔ l’ohomba efula w’apandjudi. Gregorio mbutaka ate: “Takɛnyi di’asawo asɔ mbaki ekadimwelo lo alɔmbɛlɔ aso.” Vɔ wakalɔmbɛ Jehowa dia nyomoleka monga la mbetawɔ kakakoke mbakimanyiya dia vɔ mbɔsa tɛdikɔ t’eshika. Okakatanu wakaleke woke le wɔ ele luudu lakawatakishaka, nɛ dia laasɔ ko wamboshila mfuta ambiki falanga y’ɛnɔnyi esato w’etondo. Ko kakɔna kakawahombe nsala? Marilou mbutaka ate: “Takɛnyi dia naka sho mpembola diokanelo diaso l’anto watokɛ luudu, kete tayoshisha falanga yambotaafuta. Taki mɛtɛ la ntondo k’ɛsɔnwɛlɔ ehende, mbuta ate mbetsha lolango laki Jehowa la ntondo kana nsaki yaso.” Diakɔ diele, etena kakawohɔ ɛtɛkɛta waki ɔpɔstɔlɔ Pɔɔlɔ wata dia “akambo tshɛ wekɔ oshishelo,” vɔ wakahembola diokanelo diawɔ la wanɛ wakawakɛka luudu, wakatshike olimu awɔ, wakasondja diangɔ efula diaki la wɔ, ko wakonɔ otsha lo ngelo kaki lo disɛnga dia Palawan diele lo kilɔmɛtrɛ 480 lo sidɛ ka Manille.​—Flpɛ. 3:8.

‘WAKASHOLA SHEKE’

Kaanga mbele la ntondo ka vɔ monɔ otsha lɛsɔ, Gregorio nde la Marilou ka wadɛnde wakatatɛ ndjaekesanyiya dia nsɛna lɔsɛnɔ l’ɔsɛlɛngɛ, vɔ kombeyaka ekakatanu tshɛ wakahombe tohomana la wɔ lɛkɔ. Marilou mbutaka ate: “Aki tshondo y’okakatanu le so nɛ dia kura ndo awui akina wetɛ lɔsɛnɔ ɔlɔ komonga. Lam’ele sho komonga la tshuka di’asungu, takatatɛ mina nkonyi dia nkatɛ. Dimi kotshɔka nto lo waa makashinyi, lo waa rɛstora ndo lo ahole akina wasɛnyawɔ washo.” Diɛsɛ ko vɔ wakohɔnaka ɔkɔkɔ wakawonɔ ndo wakatatɛ mbekɛ lɔsɛnɔ la lɛkɔ yema tshitshɛ oma laasɔ. Marilou mbutaka ate: “Laya l’ɔngɛnɔngɛnɔ w’efula etena katomendaka diangɔ diakatongama, mbidja ndo tɔɔtɔ. Koko dui dialeka tosha ɔngɛnɔngɛnɔ ele etena kɛnaso ɔngɛnɔngɛnɔ wele l’anto wasambishaso. Etena kambotokamba la Philippines, tamboshola ‘sheke ya woho wa ngɛnangɛna la kɛnɛ kele la so.’”​—Flpɛ. 4:12.

Gregorio mbutaka ate: “Etena kakatakome la Philippines, aki paka Ɛmɛnyi wa Jehowa ɛnɛi eto. Vɔ waki l’ɔngɛnɔngɛnɔ w’efula etena kakamatatɛ mbisha asawo wa lo sɛkɛ Lushi la lomingu tshɛ ndo kakamalɔmbɔlaka wembelo w’esambo wa Diolelo l’ekimanyielo ka ngidalɛ.” L’ɔkɔngɔ w’ɔnɔnyi ɔtɔi, vɔ wakɛnyi woho wakahame olui ɔsɔ ko monga etshumanelo kele l’apandjudi 24. Gregorio mbutaka ate: “Ngandji katɛnya ase etshumanelo kɛsɔ tonandaka efula.” L’ɔkɔngɔ wa vɔ kambɛ Jehowa l’edja k’ɛnɔnyi esamalo la Philippines, vɔ mbutaka ɔnɛ: “Ndooko kakokaso mbɛdika l’ɔngɛnɔngɛnɔ waya lo nkimanyiya anto efula dia vɔ nkoma ekambi wa Jehowa. Tekɔ l’ɔngɛnɔngɛnɔ w’efula woleki wɔnɛ waki la so lɛnɛ akatakambaka olimu aso wa l’emunyi.”

“LAKALƐTƐ KO ‘LAKƐNYI DIA JEHOWA EKƆ ƆLƆLƆ’”

Suke l’anangɛso l’akadiyɛso 3 000 wakonɔ lo bɛtshi dia nkɛtɛ dia la Philippines diewɔ l’ohomba efula w’apandjudi wa Diolelo. Apandjudi 500 l’atei awɔ wekɔ akadiyɛso w’enyemba. Tɔshi ɛnyɛlɔ kaki Karen.

Karen aya l’ɛnɔnyi 20 l’ɛmɔtshi ndo nde akole lo ngielongelo ya Baggao lo prɔvɛnsɛ ka Cagayan. Etena kakinde eke dikɛnda, nde akakanyiyaka woho wakokande pamia olimu ande. Nde mbutaka ate: “Dimi mbeyaka dia etena kambotshikala kambosusama ndo weho w’anto tshɛ wekɔ l’ohomba wa mboka losango la Diolelo. Diakɔ diakamakombolaka tokamba lɛnɛ ewɔ l’ohomba efula w’apandjudi.” Kaanga mbakootshutshuyaka ase nkumbo kande amɔtshi dia mbɔtɔ kalasa y’adidi lo dihole dia ntshɔ tosambisha dihole dimɔtshi, Karen akalɔmbɛ Jehowa dia nde mbɔlɔmbɔla. Ndo nto, nde akasawolaka l’anangɛso l’akadiyɛso efula wasambisha lo bɛtshi dia nkɛtɛ diewɔ l’ohomba w’apandjudi efula. Etena kakandakotsha ɛnɔnyi 18, nde akonɔ otsha l’ɛtshi ka nkɛtɛ kɛmɔtshi kanganyi la prɔvɛnsɛ kawɔ kilɔmɛtrɛ oko 64.

Ɛtshi ka nkɛtɛ k’etshumanelo kakatshu Karen dia tokimanyiya kekɔ l’akona ndo tɔ kekɔ l’omamu wa océan Pacifique. Karen mbutaka ate: “Dia sho mimɔ oma la Baggao otsha l’etshumanelo k’oyoyo kɛsɔ, takakɛndakɛndaka nshi shato y’etondo ndo takatenyanyaka nkushi ndekana mbala 30.” Nde kotshaka ate: “Dia tokoma le ambeki amɔtshi wa Bible, lakakɛndakɛndaka wenya esamalo ko tolala lale ombeki wa Bible. La wedi a pindju, ko dimi nyomɔkɛndakɛnda wenya ekina esamalo oya la ngelo.” Onde ɔsɔ aki wenya wa wetshetsha? Karen kotshaka ate: “Lo tena dimɔtshi, lakokaka ekolo kandji. Koko laki l’ɔngɛnɔngɛnɔ nɛ dia lakekaka l’anto oko 18 Bible. Lakalɛtɛ ko ‘lakɛnyi dia Jehowa ekɔ ɔlɔlɔ.”​—Osam. 34:8.

“LAKAYEYA WOHO WA NDJAƐKƐ LE JEHOWA”

Kakɔna kakatshutshuya Sukhi, kadiyɛso kaya l’ɛnɔnyi 40 l’ɛmɔtshi dia nde monɔ oma l’États-Unis otsha la Philippines? Lo 2011, nde akɔtɔ lo Losanganya l’otshimbedi ko akoke woho wakawakɔnya wadi l’omi amɔtshi. Wadi l’omi asɔ wakakɔndɔla woho wakawasondja diangɔ diawɔ dimɔtshi dia vɔ tosha lonya l’olimu w’esambishelo la Cagayan. Sukhi mbutaka ate: “Ɔkɔnya ɔsɔ wakakonya dia dimi ntatɛ nkanyiya eyango wahombami ndjadjɛ.” Etena kakeye Sukhi lakotɔ l’ɔlɔndji w’ase Inde dia wekɔ l’ohomba w’apandjudi wakoka tosambisha anto wadjasɛ la Philippines watɛkɛta ɔtɛkɛta wa penjabi, nde akɔshi yɛdikɔ ya ntshɔ lɛkɔ. Onde aki yana ya dikambo dia nde monɔ?

Sukhi mbutaka ate: “Aki tshondo y’okakatanu dia mbeya diangɔ diakamahombe nsondja la nɛ diakamahombe ntshikala la diɔ. Ndo nto, l’ɔkɔngɔ wa dimi mbidjasɛ lo luudu lami la dimɛna l’edja k’ɛnɔnyi 13 w’etondo, lakonɔ l’ase nkumbo kami ndo takatodjasɛka lo tshombotombo. Kaanga mbaki komonga dui sɔ wɔdu, ɔsɔ mbaki yoho yakamahombe ndjalɔngɔsɔla dia nsɛna lɔsɛnɔ l’ɔsɛlɛngɛ.” Ko ekakatanu akɔna wakatohomanaka la nde la Philippines? Sukhi kadimolaka ate: “Okakatanu wakaleke woke ele woho wakamokaka nkɔngɔlɔ ndo pambe wɔma ndo woho wakimi l’olengolengo l’ɔtɛ wakamamɔ lo ngelo kaso. Koko lakayeya woho wa ndjaɛkɛ le Jehowa lo toho tokina.” Onde Sukhi akakondja ɛlɔlɔ ɛmɔtshi? L’ɔngɛnɔngɛnɔ tshɛ, Sukhi mbutaka ate: “Jehowa totɛka ɔnɛ: ‘Nyompembe kakianɛ, naka dimi hanyotshulwe ɛtshɔkɔ.’ Lakɛnyi mɛtɛ k’ɛtɛkɛta ɛsɔ etena kakambumbola ompokami ami ɔmɔtshi ate: ‘Lushi lakɔna layoyoya nto? Leke l’ambola efula wa koka.’ Dimi mongaka l’ɔngɛnɔngɛnɔ w’efula lo woho wemi l’akoka wa nkimanyiya anto wele la mposa k’akambo wa mɛtɛ.” (Mal. 3:10) Sukhi kotshaka ate: “Lo mɛtɛ, mbɔsa yɛdikɔ ya monɔ komonga dui dia wɔdu. Koko l’ɔkɔngɔ wa dimi monɔ mbakamɛnyi woho wakatshɔkɔla Jehowa.”

“LAKANYA WƆMA WAKI LA MI”

Sime, ɔnangɛso laya l’ɛnɔnyi 30 l’ɛmɔtshi akonɔ oma la Philippines dia tokamba olimu wa l’emunyi lo wodja ɔmɔtshi wa lo Moyen-Orient. Etena kakinde lɛkɔ, ekeketshelo kakandalongola oma le omendji w’otshimbedi ndo oma lo sawo diakasha ose Olui-walɔmbɔla akootshutshuya dia nde mbetsha Jehowa lo dihole dia ntondo lo lɔsɛnɔ lande. Sime mbutaka ate: “Dui diakamalekaka mɛna wolo ele ntshika olimu ami wa l’emunyi.” Koko kaanga mbakidiɔ ngasɔ, nde akatshike olimu ande, ko akakalola la Philippines. Ɛlɔ kɛnɛ, Sime nde la Haidee ka wadɛnde wekɔ lo nkamba la Davao de Sur, la Philippines lɛnɛ ewɔ l’ohomba efula w’apandjudi. Sime mbutaka ate: “Lekɔ l’ɔngɛnɔngɛnɔ w’efula lo woho wakamanya wɔma waki la mi wa nshisha olimu ami wa l’emunyi ndo lo woho wakametsha Jehowa lo dihole dia ntondo. Lambɛna dia ndooko dui diakoka tosha ɔngɛnɔngɛnɔ ko mbɛdima la ɔngɛnɔngɛnɔ wa mbisha Jehowa kɛnɛ koleki ɔlɔlɔ kele la so.”

“TAKAKONDJA ƆNGƐNƆNGƐNƆ W’EFULA”

Etena kakoke Ramilo nde la Juliet ka wadɛnde wele ambatshi mboka waya l’ɛnɔnyi 30 l’ɛmɔtshi di’etshumanelo kanganyi la wɔ kilɔmɛtrɛ 30 kekɔ l’ohomba w’ekimanyielo, vɔ wakayakimɔ la lolango. Ramilo nde la Juliet tshɔka lomingu tshɛ lo mututu awɔ dia tosangana l’etshumanelo kɛsɔ ndo tosambisha kaamɛ la wɔ. Kaanga mbele mboka kɛsɔ kɔlɔ, vɔ wekɔ l’ɔngɛnɔngɛnɔ lo woho wakawayakimɔ la lolango dia tosambisha lɛkɔ. Ramilo mbutaka ate: “Dimi la wadɛmi tekɔ lo nɔmbɔla wekelo wa Bible 11. Tambɛna dia ntshɔ dia tokamba l’ɛtshi ka nkɛtɛ kewɔ l’ohomba efula w’apandjudi mbishaka ɔngɛnɔngɛnɔ efula.”​—1 Kɔr. 15:58.

Onde wɛ kombolaka mbeya awui akina lo kɛnɛ kendana la ntshɔ dia tokamba l’ɛtshi ka nkɛtɛ kewɔ l’ohomba efula w’apandjudi lo wodja anyu kana lo wodja okina? Naka ngasɔ, kete sawola l’omendji anyu w’otshimbedi ndo adia sawo diele l’ɔtɛ a dui ɔnɛ: “Onde wɛ kokaka ‘ndja la Makɛdɔniya’?” diele lo Olimu aso wa Diolelo wa Ngɔndɔ k’enanɛi 2011.