Lande na kokama dimbola sɔ?

“Onde wɛ sɛnaka dimɛna aha l’ekimanyielo ka Nzambi? Miliyɔ y’anto sɛnaka.” Ɛtɛkɛta engo mbakafunde olui ɔmɔtshi w’anto wahetawɔ ɔnɛ Nzambi ekɔ lo dibaya dimɔtshi dia waewoyelo atete edja. Mɛnamaka dia anto asɔ mbɔsaka ɔnɛ vɔ bu l’ohomba wa Nzambi.

Lo wedi okina, anto efula wata ɔnɛ wekɔ la mbetawɔ le Nzambi mbɔsaka tɛdikɔ tɛnya oko Nzambi bu. Salvatore Fisichella, evɛkɛ w’oseka Mupɛ akatɛ ase ɔtɛmwɛlɔ ande ate: “Naka anto tɔsɛdingola ɛlɔ kɛnɛ, ondo ndooko layota ɔnɛ sho tekɔ Akristo nɛ dia yoho yaso ya lɔsɛnɔ yekɔ oko y’anto wele bu ambetawudi.”

Anto amɔtshi wekɔ l’awui efula wa nsala ko hawoyoyakiyanya ndo lo dikambo dia Nzambi. Vɔ fɔnyaka ɔnɛ nde ekɔ etale efula kana nde hakoke monga la shɛngiya y’efula lo nsɛnɔ yawɔ. Diakɔ diele, anto asɔ ndjɔlɔmbaka Nzambi paka l’etena kewɔ l’ekakatanu kana kewɔ lo dihombo, wate kana oko nde ekɔ ose olimu awɔ lele wonya tshɛ suke dia mbasalɛ kɛnɛ kewɔ l’ohomba.

Anto akina hawokitanyiya kɛnɛ ketsha ɛtɛmwɛlɔ awɔ, ondo nɛ dia vɔ fɔnyaka ɔnɛ wetshelo akɔ bu ohomba. Ɛnyɛlɔ, pursa 76 y’aseka Mupɛ wa l’Allemagne mbetawɔka ɔnɛ pami la womoto koka mbidjasɛ kaamɛ la ntondo ka vɔ nsala diwala, kanyi yotshikitanyi la kɛnɛ ketsha ɔtɛmwɛlɔ awɔ ndo Bible. (1 Kɔrɛtɔ 6:18; Hɛbɛru 13:4) Laadiko di’aseka Mupɛ, ndo ɛtɛmwɛlɔ ekina mɛnaka di’anto awɔ hawokitanyiya kɛnɛ kawaetshawɔ. Ewandji w’ɛtɛmwɛlɔ wotshikitanyi ndjakiyanyaka ɔnɛ anto awɔ wekɔ la waonga wele oko “w’anto wahetawɔ ɔnɛ Nzambi ekɔ.”

Bɛnyɛlɔ sɔ tokonyaka dia mboka dimbola nɛ: Onde mɛtɛ tekɔ l’ohomba wa Nzambi? Dui sɔ kema di’ɛlɔ la lui. Dimbola sɔ diakokama mbala ka ntondo lo dibuku di’Etatelu dia lo Bible. Dia ntana okadimwelo, nyɛsɔ tɔsɛdingole awui amɔtshi wele lo dibuku dia lo Bible dia Etatelu.