EKADIMWELO LO AMBOLA W’OMA LO BIBLE

Onde Bible kekɔ mɛtɛ Ɔtɛkɛta wa Nzambi?

Ondo wɛ nongamɛka dia Ɔtɛkɛta wa Nzambi monga dibuku dia laande ndo Bible kekɔ dibuku dia ngasɔ. Miliyara ya Bible yambotondjama lo nkama y’ɛtɛkɛta. Lomba lele lo Bible lekɔ la wolo wa ntshikitanya anto lo yoho ya dimɛna.—Adia 1 Tɛsalɔnika 2:13; 2 Timɔte 3:16.

Sho mbeyaka dia Bible kekɔ dibuku diaki Nzambi nɛ dia tɔ mbutaka akambo wa lo nshi yayaye l’eshikikelo tshɛ. Ndooko onto lakoka nsala dui sɔ l’akoka ande hita. Tɔshi ɛnyɛlɔ ka dibuku di’Isaya. Wakayosholaka kɔpi katɔ kɛmɔtshi kakafundama ndekana ntambe k’otondo la ntondo ka Yeso mbotɔ lo wooko ɔmɔtshi waki suke la Ndjale ka lɛɛhɔ. Dibuku diakɔ mbutaka dia osomba wa Babilɔna wakahombe nkoma ntɔngɔ to. Dui sɔ, diakayokotshama ɛnɔnyi efula l’ɔkɔngɔ wa Yeso ntatɛ olimu ande la nkɛtɛ.—Adia Isaya 13:19, 20; 2 Petero 1:20, 21.

Ngande wakafundama Bible?

Bible akafundama l’edja k’ɛnɔnyi oko 1600. Anto oko 40 mbakafunde Bible ndo vɔ wakatɛkɛta dia ɔtɛ a dui akɔ waamɛ aha la manyana. Ngande wakakoke dui sɔ salema? Nzambi mbakalɔmbɔla ofundelo awɔ.—Adia 2 Samuele 23:2.

Lo tena dimɔtshi, Nzambi akatɛka afundji wa Bible akambo lo tshimbo ya andjelo, waɛnɛlɔ ndo y’alɔ. Koko mbala efula, Nzambi akadjaka tokanyi tande lo timba ta afundji ndo akawashaka diaaso dia nsɔna tɔtɛkɛta takakoke nkamba la wɔ dia nkɛnɛmɔla losango laki Nzambi.—Adia Ɛnyɛlɔ 1:1; 21:3-5.