Onde Ɛmɛnyi wa Jehowa wekɔ la mbetawɔ le Yeso?

MONGA LA MBETAWƆ LE YESO EKƆ OHOMBA

Antoine: Akemwe, Timɛ. Lambɔngɛnangɛna dia kɛna nto.

Timɛ: Dimi lawɔ lambɔngɛnangɛna dia kɛna.

Antoine: Lambokela Tshoto y’Etangelo ndo Réveillez-vous ! weke katomba. Dimi fɔnyaka dia wɛ ayɔngɛnangɛna asawo wele lɔkɔ.

Timɛ: Losaka efula. Lambɔngɛnangɛna woho wamboyoya ɛlɔ nɛ dia lekɔ la dui dimɔtshi dialangami kombola.

Antoine: Kaawɔ, ko naa dui diakɔ?

Timɛ: Lushi lɔmɔtshi, lakasawolaka l’osekami la l’olimu. Lakawotɛ awui wendana l’ekanda wakayambisha ndo woho wewɔ amɛna. Koko, nde akambutɛ diaha dimi mbadia nɛ dia Ɛmɛnyi wa Jehowa bu la mbetawɔ le Yeso. Onde dui sɔ diekɔ mɛtɛ? Lakatɛ osekami la l’olimu dia layoyokoka dimbola sɔ lam’ayoyoya ndjomenda.

Antoine: Ekɔ dimɛna, lambɔngɛnangɛna woho wamboyoka paka Ɔmɛnyi wa Jehowa dimbola sɔ. Nɛ dia wɛ hatshwe tombola onto okina. Kakɔna kafɔnyayɛ, shi yoho yoleki dimɛna ya mbeya kɛnɛ ketawɔ onto ele mbombola ndaamɛ?

Timɛ: Wɛ ambonda laawɔ.

Antoine: Kɛnɛ kele mɛtɛ ele, Ɛmɛnyi wa Jehowa wekɔ la mbetawɔ le Yeso. Ndo sho shihodiaka ɔnɛ monga la mbetawɔ le Yeso ekɔ ohomba dia nkondja mpanda.

Timɛ: Dimi mbeyaka dia nyu nyekɔ la mbetawɔ le Yeso, koko etena kakambutɛ osekami la l’olimu dia nyu bu la mbetawɔ le Yeso, dui sɔ diakamambiya. Ondo dimi la yɛ tatasawolaka dui sɔ.

Antoine: Onde dimi koka kɛnya avɛsa amɔtshi wa lo Bible wɛnya ohomba wa monga la mbetawɔ le Yeso? Ɛmɛnyi wa Jehowa kambaka l’avɛsa akɔ mbala efula l’olimu awɔ w’esambishelo.

Timɛ: Kaawɔ.

Antoine: Ayoleka dimɛna sho ntatɛ l’ɛtɛkɛta waki Yeso ndamɛ watanema lo Joani 14:6. Ɛtɛkɛta ɛsɔ wekɔ l’atei w’ɛtɛkɛta wakakambe la Yeso etena kakandasawolaka l’ɔpɔstɔlɔ ande ɔmɔtshi. Lambadia laawɔ ɔnɛ: “Yeso akawotɛ ate: ‘Dimi lekɔ mboka, mɛtɛ la lɔsɛnɔ. Ndooko onto laya le Papa paka lo tshimbo yami.’” Lo ndjela divɛsa nɛ, naa yoho yaamɛ yakoka tokimanyiya dia ndjasukanya la Shɛso?

Timɛ: Lo tshimbo ya Yeso.

Antoine: Ngasɔ mbediɔ. Ndo Ɛmɛnyi wa Jehowa mbetawɔka dui sɔ. Te kombole yema: Lo ndjela kɛnɛ keyayɛ katɔlɔmba Nzambi, etena kalɔmba onto, lo lokombo laki na lahombande nkomiya?

Timɛ: Lo lokombo la Yeso.

Antoine: Ekɔ ngasɔ. Diakɔ diele, etena tshɛ kalɔmbami dimi komiyaka lo lokombo la Yeso. Ndo kɛsɔ mbasala Ɛmɛnyi wa Jehowa tshɛ etena kasalawɔ dɔmbɛlɔ.

Timɛ: Ekɔ ohomba mɛtɛ mbeya dui sɔ.

Antoine: Divɛsa dikina diangaso mbadia ele Joani 3:16. Divɛsa ndo diekɔ ohomba efula ndo diɔ komaka polo lo mbelamɛ ɔnɛ Evanjiliɔ wa tshitshɛ. Naka wɛ mbɔsa awui tshɛ wakafundama lo dikambo dia lɔsɛnɔ la Yeso la la nkɛtɛ ndo olimu ande ko nsanganya dia ntondja divɛsa ɔtɔi, kete wɛ ayotondja kanyi yele lo divɛsa nɛ. Wɛ koka mbadia divɛsa diakɔ.

Timɛ: Eelo. Diɔ mbutaka ɔnɛ: “Nɛ dia Nzambi akalange andja lo yɛdikɔ y’efula, diakɔ diakandakimɔ Ɔnande ɛtɔi lakandote, dia onto tshɛ longa la mbetawɔ le nde atovɔke, koko akondja lɔsɛnɔ la pondjo.”

Antoine: Losaka efula. Onde wɛ teyaka divɛsa nɛ dimɛna?

Timɛ: Eelo, aya mbala efula yamomoka awui wa lɔkɔ ndo dimi todiɛnaka diofundami l’ahole wele tolembetelo tɔmɔtshi ndo lo abaya wele l’ahole wɛna anto efula.

Antoine: Diɔ diekɔ divɛsa dieyama efula. Naka wɛ disɛdingola dimɛna, kete wɛ ayɛna kɛnɛ kakate Yeso. Nde akate dia diɛsɛ la ngandji ka Nzambi anto koka nkondja lɔsɛnɔ la pondjo, koko paka nsala dui diakɔna?

Timɛ: Monga la mbetawɔ.

Antoine: Eelo. Sho pombaka monga la mbetawɔ le Ɔna ɛtɔi, Yeso Kristo. Ndo kɛsɔ mɛnyaka dia monga la mbetawɔ le Yeso ayotokimanyiya dia nkondja lɔsɛnɔ la pondjo oko wɛnyamidiɔ lo lɛkɛ 2 la periodikɛ kakamakela kɛnɛ. Lo kɛnɛ kendana la oyango wa Tshoto y’Etangelo, laadiko di’awui akina wele lɔkɔ, tɔ mbutaka ɔnɛ: Periodikɛ kɛnɛ tokeketshaka dia “monga la mbetawɔ le Yeso Kristo, ɔnɛ lakavu ndo loolɛ kakianɛ oko Nkumekanga ka Diolelo diaki Nzambi dia sho nkondja lɔsɛnɔ la pondjo.”

Timɛ: Kɛnɛ katayɛ kekɔ mɛtɛ. Nɛ dia periodikɛ yanyu shikikɛka dia Ɛmɛnyi wa Jehowa wekɔ la mbetawɔ le Yeso.

Antoine: Ekɔ ngasɔ.

Timɛ: Ko lande na kata anto dia nyu bu la mbetawɔ le Yeso?

Antoine: Ondo ekɔ ɛkɔkɔ efula watshutshuya anto dia mbuta dui sɔ. Amɔtshi mbutaka dui sɔ paka nɛ dia vɔ wakoke anto akina wadita. Kana ondo vɔ waketshama eokelo ka kɔlɔ kɛsɔ oma le embetsha awɔ.

Timɛ: Dimi lekɔ lo ntɛkɛta dia kɛnɛ kasawolaso kakianɛ, ondo anto amɔtshi mbutaka dia nyu bu la mbetawɔ le Yeso nɛ dia nyu ndjaelɛka Ɛmɛnyi wa Jehowa koko aha wa Yeso.

Antoine: Ondo ɔsɔ koka monga ɔkɔkɔ okina.

Timɛ: Lande na kalekanyu ntɛkɛta paka dikambo dia Jehowa?

“DIMI LAKAWAEWOYA LOKOMBO LAYƐ”

Antoine: Ɔkɔkɔ ɔmɔtshi ele, sho mbetawɔka dia ekɔ ohomba nkamba la lokombo laki Nzambi, Jehowa oko wakasalaka Ɔnande Yeso. Tɔsɛdingole kɛnɛ kakate Yeso lo dɔmbɛlɔ dimɔtshi diakandalɔmbɛ She. Diɔ fundama lo Joani 17:26. Onde wɛ koka mbadia divɛsa diakɔ lam’alangɛ?

Timɛ: Lambadia ɔnɛ: “Dimi lakawaewoya lokombo layɛ ndo layowaewoyalɔ, dia ngandji kakayamboke monga le wɔ ndo dimi monga kaamɛ la wɔ.”

Antoine: Losaka efula. Lembetɛ dia Yeso akate ɔnɛ nde akeyanya lokombo laki Nzambi. Oko le yɛ, lande na kakandasale dui sɔ?

Timɛ: Umm. Dimi bu l’eshikikelo.

Antoine: Kaawɔ, tadia divɛsa dikina dia sho ndeka nshihodia dui sɔ. Divɛsa diakɔ ko Etsha 2:21. Lambadia ɔnɛ: “Onto tshɛ latɛndɛ lokombo la Jehowa ayoshimbamɛ.” Wony’ɔsɔ ondo wɛ ambetawɔ dia naka ntɛndɛ lokombo la Jehowa mbele dui dialɔmbama dia ntana mpanda, kete aha la taamu Yeso akeyaka dui sɔ.

Timɛ: Ngasɔ mbediɔ.

Antoine: Diakɔ diele, aki dui di’ohomba le Yeso dia nkimanyiya ambeki ande dia mbeya ndo nkamba la lokombo la Nzambi dia vɔ ndjokondja mpanda. Ndo ɔsɔ mbele ɔkɔkɔ ɔmɔtshi woleki ohomba walekaso ntɛkɛta paka dikambo dia Jehowa. Sho mbeyaka di’ekɔ ohomba mbeyanya lokombo laki Nzambi ndo nkimanyiya anto akina dia vɔ litɛndɛ.

Timɛ: Koko, kaanga naka anto haweye lokombo laki Nzambi kana hawokambe lalɔ, vɔ mbeyaka dikambo di’onto akɔna latɛkɛtawɔ etena katɛkɛtawɔ dikambo dia Nzambi.

Antoine: Ondo ngasɔ mbediɔ. Koko kaanga mbediɔ ngasɔ, lo totɛ lokombo lande l’oshika Nzambi tokimanyiyaka dia sho ndjasukanya la nde.

Timɛ: Alangayɛ mbuta?

Antoine: Tɔshi ɛnyɛlɔ: Tototokoka monga l’ohomba wa mbeya lokombo laki Mɔsɛ. Koko, totokoka mbeeya tsho oko onto lakaatola ndjale ka Beela kana oko onto lakalongola Ɛlɛmbɛ dikumi. Ngasɔ mbakokaso mbuta ndo lo dikambo dia Nɔa, lande na keyaso lokombo lande? Totokoka mbeeya tsho oko onto lakasale waato, lakashimbɛ nkumbo kande ndo waa nyama. Lo kanyi yakɔ yaamɛ mbele, kaanga Yeso Kristo akakoke mbeyama tsho oko onto lakaye oma l’olongo lakayovɔ dikambo dia pɛkato yaso. Shi mɛtɛ?

Timɛ: Ondo ngasɔ mbediɔ.

Antoine: Koko Nzambi akasale tshɛ dia sho mbeya nkombo shikaa y’anto asɔ. Mbeya nkombo y’anto asɔ tokimanyiyaka dia mbaɔsa oko anto wa mɛtɛ mɛtɛ. Kaanga mbahatatɛnaka Mɔsɛ, Nɔa kana Yeso, mbeya tsho nkombo yawɔ toshikikɛka ɔnɛ vɔ mɛtɛ wakasɛnɛ.

Timɛ: Tamomeyaka dui sɔ, koko lamboshikikɛ dia diekɔ mɛtɛ.

Antoine: Ɔsɔ ekɔ ɔkɔkɔ okina wakonya Ɛmɛnyi wa Jehowa dia nkamba la lokombo l’oshika laki Nzambi mbala la mbala. Sho nangaka nkimanyiya anto dia vɔ monga la mbetawɔ le Jehowa Nzambi ndo mbɔɔsa oko onto la mɛtɛ mɛtɛ lakokawɔ ndjasukanya la nde. Ndo nto, sho mbikaka epole ɔsɛkɛ lo ɔkɛndɛ wele la Yeso dia sho nkondja mpanda. Sho mbeyaka mbadia divɛsa dikina diashikikɛ dui sɔ.

Timɛ: Kaawɔ.

Antoine: L’etatelo takadisha Joani 14:6. Ohɔ, dia Yeso akate dia nde ekɔ “mboka, mɛtɛ la lɔsɛnɔ.” Tonyomokalola yema lo tshapita yakɔ kele tende ɛtɛkɛta ande wele lo Joani 14:1. Lam’alangɛ, wɛ koka mbadia kɛnɛ kakate Yeso l’etenyi k’ekomelo ka divɛsa nɛ?

Timɛ: Eelo. Diɔ mbutaka ɔnɛ: “Nyonge la mbetawɔ le Nzambi ndo nyonge la mbetawɔ le mi.”

Antoine: Losaka efula. Oko le yɛ, onde di’onto monga la mbetawɔ ka mɛtɛ nde ndaamɛ mbasɔna dia monga la mbetawɔ le Yeso kana le Jehowa?

Timɛ: Keema. Yeso akate dia awui akɔ ahende wekɔ ohomba.

Antoine: Ekɔ dimɛna. Ndo lekɔ l’eshikikelo dia wɛ ambetawɔ ɔnɛ hatohombe nkomɛ tsho lo mbuta dia tekɔ la mbetawɔ le Nzambi ndo le Yeso. Koko, sho pombaka nsɛna lo yoho yɛnya dia tekɔ la mbetawɔ le wɔ.

Timɛ: Ɔsɔku mbediɔ.

Antoine: Ko ngande wakoka onto mɛnya dia nde ekɔ la mbetawɔ ka mɛtɛ le Nzambi ndo le Yeso? Dimbola sɔ mbayotoyɔkɛtshanya mbala kayaye.a

Timɛ: Losaka efula, layokokongɛ.