Wetshelo wakondjaso oma le tofudu ta l’olongo

AMBETA ɛnɔnyi ndekana 3 000, Jɔbɔ owandji wa nkumbo wa lo nshi y’edjedja akashihodia dia tofudu ta l’olongo tekɔ l’awui efula wa tetsha lo dikambo dia olimu waki Nzambi. Koko woho wasalatɔ akambo konyaka anto dia nkamba la tɔ oko bɛnyɛlɔ ndo tɛdika la diangɔ dikina. Lo Bible, ahole efula watɛkɛtama dia tofudu ta l’olongo toshaka wetshelo w’ohomba efula wendana la lɔsɛnɔ ndo diɔtɔnganelo diasaso la Nzambi. Ɛsɔ tɔsɛdingole bɛnyɛlɔ dingana to.

LƐNƐ ASALA TƐNGƐNGA KEFU

Anto wakadjasɛka la Jɛrusalɛma wakeyaka tɛngɛnga, nɛ dia tɔ salaka tokefu lo ediko. Tɔmɔtshi takasalaka tokefu lo tɛmpɛlɔ kakake Sɔlɔmɔna. Ondo tɛngɛnga takasale tokefu tatɔ lo tɛmpɛlɔ takɛnaka ɔnɔnyi tshɛ dia ɔsɔ aki dihole di’ekokelo, lɛnɛ akawakokaka mbishɛ anatɔ aha l’ofukutanu.

Ofundji w’Osambo 84, mbuta ate, ɔnaki Kɔra lakakambaka lo tɛmpɛlɔ lomingu ɔtɔi l’ɔkɔngɔ wa ngɔndɔ shamalo tshɛ akɛnaka tokefu tɔsɔ lo tɛmpɛlɔ. Lo nkombola dia monga oko yɛngɛnga yakadjasɛka nshi tshɛ lo luudu la Jehowa, nde akate ate: “Ande ngandji kokami Tabɛrnaklɛ kayɛ ka diambo lee, wɛ Jehowa kanga lolembelembe! Tshondo yami tshɛ nomɔlomɔka, eelo, dimi mbokaka nsaki k’efula, ka asɛkɛ wa Jehowa. Kaanga fudu tanaka ngelo lɛkɔ ndo yɛngɛnga ndjatanɛka kefu, lɛnɛ akokɛyɔ anayɔ suke la elambwelo kayɛ ka diambo, wɛ Jehowa kanga lolembelembe, Nkumekanga kami ndo Nzambi kami!” (Osambo 84:1-3) Onde sho l’anaso mongaka la nsaki ndo la lowando laamɛ dia tanemaka mbala la mbala kaamɛ l’ase etshumanelo kaki Nzambi?—Osambo 26:8, 12.

KIOMBE MBEYAKA ETENA KATƆ

Omvutshi Jɛrɛmiya akafunde ate: “Kiombe ya l’olongo mbeyaka tena diayɔ.” Aha la taamu, nde akeyaka woho wakɛngɔlaka tokombe lo Nkɛtɛ ya Daka. Lo eleko kamɔnga akatshi, tokombe ta wɛma ndekana 300 000 mɛngɔlaka oma l’Afrikɛ otsha lo nɔrdɛ k’Erɔpɛ lo mbeta l’Okidi wa Jɔrdana. Ntango ya l’alemba atɔ mbatɛka dia tɔ nkalola otsha lo bɛtshi diawɔ dia nkɛtɛ lo eleko k’ɔwɔ. L’ɛnyɛlɔ ka tofudu tokina tɛngɔla, tɔ “mbeyaka etena ka vɔ nkalola.”—Jɛrɛmiya 8:7.

Dibuku Atlas des oiseaux migrateurs mbutaka ɔnɛ “woho wɛngɔla tofudu ekɔ dui dia diambo nɛ dia dui sɔ mɛnyaka dia tɔ tekɔ la lomba la lootɔ.” Jehowa Nzambi akasha tofudu tɛngɔla lomba la lootɔ lo kɛnɛ kendana la deko diahombatɔ mɛngɔlaka, koko nde akasha anto dikoka dia nshikikɛ tena ndo deko. (Luka 12:54-56) Otshikitanyi la lomba la lootɔ lele la kiombe, ewo kaki Nzambi mbakimanyiya anto dia nsɛdingola akambo ndo tena diasɛnaso. Ase Isariyɛlɛ wa lo nshi yaki Jɛrɛmiya kombeyaka tolembetelo tɔsɔ. Nzambi akalembetshiya kiɔkɔ ya dikambo lo mbuta ɔnɛ: “Vɔ wambotona ɔtɛkɛta wa Jehowa, ko lomba lakɔna lele la wɔ?”—Jɛrɛmiya 8:9.

Ɛlɔ kɛnɛ, tekɔ la tolembetelo t’eshika tɛnya dia tekɔ lo nsɛna lo tena dielɛ Bible ɔnɛ: “Nshi y’ekomelo.” (2 Timɔte 3:1-5) Onde wɛ ayokoya kiombe ndo nshikikɛ ‘etena’?

MPONGO MƐNAKA OMA L’ETALE

Bible tɛkɛtaka mbala efula dia mfudu ka mpongo ndo tɔ kakɛnamaka efula lo Nkɛtɛ ya Daka. Tɔ mbutaka ɔnɛ oma lo kefu katɔ ka laadiko di’ave wahatanyi, mpongo nyangaka “mbo ya ndɛ; washo atɔ mɛnaka oma l’etale.” (Jɔbɔ 39:27-29) Washo wa mpongo wekɔ wolo efula, diakɔ diele tɔ koka mɛna otomba wa tshitshɛ oma lo etale ka kilɔmɛtrɛ 1.

Oko wakoka mpongo ‘mɛna oma l’etale,’ Jehowa ekɔ l’akoka wa mɛna etale lo nshi yayaye. Diakɔ diele, Jehowa Nzambi akate ɔnɛ: “Oma ko etatelo, dimi lakatatshi akambo wakahombe ndjosalema. Ndo oma ko nshi y’edjedja akambo wahatasalema.” (Isaya 46:10) Lo nkitanyiya alako wa Jehowa, sho koka nkondja wahɔ oma lo lomba lande la diambo ndo woho wɛnande akambo la ntondo.—Isaya 48:17, 18.

Ndo nto, Bible mbɛdikaka wanɛ wayaɛkɛ le Nzambi la mpongo lo mbuta ɔnɛ: “Wanɛ walongamɛ le Jehowa wayonyomokondja wolo. Vɔ wayofumbɔ la ahafu oko mpongo.” (Isaya 40:31) Mpongo fumbɔka lo nkamba la hiɛlɛlɛ ya djungudungu kana la lɔpɛpɛ la dja. Etena kakomatɔ lo dihole dia hiɛlɛlɛ ya djungudungu, mpongo sandjolaka ahafu atɔ ndo mbɔtɔka l’etei ka hiɛlɛlɛ ko tɔ tadɛka otsha l’olongo. Mpongo hendɛ paka lo akoka atɔ hita dia mfumbɔ ndo ntshɔ etale. Woho akɔ waamɛ mbele, wanɛ wayaɛkɛ le Jehowa koka mendɛ le nde, oko wende ɔnɛ lalaka dia mbasha “wolo woleki wɔnɛ wokongaka l’onto.”—2 Kɔrɛtɔ 4:7, 8.

“WOHO WATOSANGANYAKA WAALE A NKƆKƆ ANATƆ”

Yema tshitshɛ la ntondo ka nde mvɔ, Yeso akemala ko akende kapitalɛ k’ase Juda. Nde akakitshakitsha lomu ndo akate ɔnɛ: “Jɛrusalɛma, Jɛrusalɛma, osomba wadiaka amvutshi ndo woka wanɛ wotomɛwɔ ave, ande mbala efula yakamalange nsanganya anayɛ kaamɛ woho watosanganyaka waale a nkɔkɔ anatɔ lo ahafu atɔ lee! Koko nyu konanga.”—Mateo 23:37.

Dikoka dimɔtshi dia lootɔ diele la tofudu ele nsaki ka nkokɛ anatɔ. Tofudu tasala kefu yatɔ la nkɛtɛ, ɛnyɛlɔ waale a nkɔkɔ mongaka la yambalo y’efula lo waale wakoka mbokomɛ. Naka waale a nkɔkɔ ambɛna djɛla yahowahowa la diko, tɔ mbawanaka la dui dia wolo dia mpɛmɔla, l’etena kɛsɔ ana wa nkɔkɔ wayolawɔ esadi eto dia toyashɛ lo ahafu atɔ. Etena kewɔ lɛsɔ, ana wa nkɔkɔ wa totshitshɛ koka kokamɛ oma lo yanyi ndo mvula ka wolo. Woho akɔ waamɛ mbele, Yeso akalangaka mbisha anto wakadjasɛka la Jɛrusalɛma eshamelo ndo ekokelo ka lo nyuma. Ɛlɔ kɛnɛ, Yeso tɔlɔmbaka dia sho ndja le nde dia nkondja osukɔ ndo ekokelo oma lo wetsho ndo ekiyanu wa lo lɔsɛnɔ laso la lushi la lushi.—Mateo 11:28, 29.

Lo mɛtɛ, ekɔ awui efula wakokaso mbeka oma le ditongami diafumbɔ. Etena kasɛdingolayɛ mbekelo yadiɔ, sala la wolo dia mbohɔ wɛdikelo wendana la diɔ watanema lo Afundelo. Yɛngɛnga yakokimanyiya dia wɛ kombolaka luudu laki Jehowa la ɔtɛmwɛlɔ. Ekɔ ohomba wɛ nongamɛ le Nzambi dia nkondja elongamelo kakoka kokimanyiya dia wɛ mfumbɔ oko mpongo. Ekɔ ohomba wɛ ndja le Yeso dia ndjokondja akambo wa mɛtɛ wa lo nyuma wayokokokɛ oko watosalɛka waale a nkɔkɔ anatɔ. Ndo ɛnyɛlɔ ka kiombe kakohole dia wɛ sɛnaka lo kɛnɛ kendana la kitshimudi y’akambo weta l’andja ɔnɛ, wɛnya etena kasɛnaso.