Tokimanyia anyaso dia vɔ mpotɔ ohomba wele l’ekanda aso
1 “Diui dia Unyashungu dieko la lumu [ndo mbewoyaka etsha adiɔ, NW].” (Heb. 4:12) Lam’ele ekand’aso wakimanyia dia mpotɔ Bible mbishaka anto lonya dia vɔ kondja wahɔ wa kɛnɛ kewoya Dui dia Nzambi, sho kambaka olimu l’afundelo akɔ dia mbakeketsha lo woho wayashawɔ lo Bible etena kayashaso l’esambishelo ka lokolo l’ɔlɔlɔ kana lam’atshɔso lo luudu la luudu.
2 Lo Lotena eduwa, tekɔ lo mɛnya abuku tshɛ wele la ndjɛkɛ 192, abuku wele akatshi awɔ wambotatɛ la mbelɔ kana shisha dangi diawɔ, kana dibuku dikina tshɛ diakatombe polo lo 1981. Naka ethumanelo kanyu ekɔ l’abuku akɔ, nyɔlɔngɔsɔlɛ mbɔtwɛlɔ y’asawo anyu w’endana la Diolelo woho wa ndjiɔtɔnganyia la lokanyi la shikâ l’oma lo dibuku diayonyokamba ladiɔ olimu. Ngande ayonyohomba ntsha na?
3 Woho wa ndjalɔngɔsɔla: La ntondo, nyɔsɔnɔlɛ oma l’atei a dibuku di’ɛnyanyu etenyi kɛmɔtshi k’afundelo kayokoka kotola yambalo y’anto wele l’etema w’ɔlɔlɔ wodjashi lo mbilo kanyu. L’ɔkɔngɔ, nyohembe woho wa mbohɔ dui dimɔtshi dieke katomba kana di’endana l’anto tshɛ ndo diayonyokimanyia dia nyu sawola l’ɔtɛkɛtshi anyu lo tshena pe la ntondo ka nyu kotola yambalo yande otsha lo etenyi k’afundelo wakanyasɔnɔla oma lo dibuku diakɔ. Ondo etenyi kakɔ k’afundelo eko la divɛsa dimɔtshi diakashilama loshilama kana diakafundama l’otondo ko nyayokoka diâdia, oyadi lo Bible kana mbala kakɔ ɔtɔi lo dibuku, woho wa mɛnya mɛtɛ k’ɛtɛkɛta anyu. L’ɔkɔngɔ diko, nyayɔtɔnganyia awui akɔ la losha ko ndjɛnya okanda akɔ. Tanyohɛke nshikikɛ onto akɔ ɔnɛ nshi nyɛ sho nɔmbaka tshenyi ya dikuta nganɛ oko ɔkɔngɔ dikambo di’okanda akɔ ndo mbolembetshiya lande na kele ɔkɔngɔ wa ngasɔ nɔmbamaka. Lo weho tshɛ, nyohembe woho wa tshika dimbola dimɔtshi di’ele kema l’okadimwelo kana lokanyi lɔmɔtshi aha la mɔmbɔla, dikambo diayoyonyokimanyia oko etatelo ka sawo lo diembwelo diayoyela.
4 Tshumanelo efula dieko l’abuku amɔtshi l’atei a wanɛ: Votre jeunesse —Comment en tirer le meilleur parti la Ecoutez le grand Enseignant lo lɔkɔtɔ lawo. Naka nyekɔ l’abuku akɔ, lande na kahanyɔsɛ tɛdikɔ ta sawola l’ɛlɔngɔlɔngɔ kana l’esekaseka wa lo mbilo kanyu na? Nyakeketsha dia vɔ mbadia dimɔtshi dia l’atei w’abuku akɔ w’amɛna asɔ. Naka La vérité qui conduit à la vie éternelle mbɛnyayɛ, kokaka wɛ mbodiokanya la yioho yakɛnyami la diko ndjo ndo ndjalɔngɔsɔla dia sawola lo kɛnɛ k’endana la wetshelo tshe wa lo Bible wɛnyami lo dibuku diakɔ dia dimɛna efula diakimanyia woho wa mbeka Bible.
5 Onde dibuku Tout finit-il avec cette vie? mbayonyolanga mɛnya ondo? Kema wolo mbodiɛnya ndo diɔ tɛkɛtaka di’awui wotshikitanyi. Nyende kɛnɛ kakokanyu mbuta l’ɔkɔngɔ a nyu mbewoya ɔnɛ têkɔ anto kapanda: “Onde wɛ akashile la kanyia dia woho wayonga ki k’oshika ka demba, esangɔ ɛmɔtshi demba di’olowanyi ndo pondjo pondjo oka? [Tshikɛ onto akɔ dihole akadimole.] Otondonga tekɔ la demba di’olowanyi, tshike lɔsɛnɔ lotonga ɔlɔ efula. Onde wɛ mbeyaka dia lo Enyelo 21:4, Bible totelaka dia Nzambi atolakakɔ lushi lɔmɔtshi lele hemɔ kana nyɔi ayodimana oka? [Ɔmbɔla divɛsa 1 polo lo 3 lo tshena pe ndo adia Enyelo 21:4 naka kokaka.] Dia dikambo sɔ mbasambɛ anto etena kalɔmbawɔ ɔnɛ Diolelo diaki Nzambi diaye ndo dia lolango la Nzambi latshama l’olongo lakoke la tshama ndo la kɛtɛ. Onde wɛ hakombola nyomeka awui akina efula lo kɛnɛ k’endana la daka dia diambo dia ngasɔ oka?”
6 Mbala mɔtshi, mɛnya periodike kana kiatshi katshi tôngaka dui di’oleki dimɛna. Ndoko kɛnɛ katoshimba dia sho keketsha anto akina l’osalosalo tshɛ ndo la wangasanu dia vɔ mbadia ekanda akɔ woho wa vɔ mbeya etsha wele la Dui dia Nzambi lo lɔsɛnɔ lawɔ ndo monga suke dia nɔmbwama oma le diɔ.