Tosambisha “Anto Wa Weho Tshɛ”
1 Etena kahomanaso l’anto wele la mbekelo yotshikitanyi ndo wakôle l’ɛtɛmwɛlɔ wotshikitanyi, toyashikikɛ ɔnɛ Jehowa nangaka “dia anto wa weho tshɛ nshimbamela ndo koma l’ewo k’oshika k’akambo wa mɛtɛ.” (1 Tim. 2:4, NW) Lâdiko dia lokema la traktɛ la tobukubuku takafundama paka lo dikambo sɔ, tekɔ l’abuku ahende w’amɛna efula wakokaso kamba la wɔ wonya tshɛ dia kimanyiya anto wakawetsha awui wa kashi l’ɔtɛmwɛlɔ awɔ lo dikambo dia Nzambi la Kristo.
2 Dibuku L’humanité à la recherche de Dieu mɛnyaka woho wakatɔngɔ ɛtɛmwɛlɔ wa weke wele l’andja ɔnɛ; lâsɔ diɔ koka kimanyiya anto w’oma lo tokoma tshɛ ta nkɛtɛ dia vɔ mbɛdika kɛnɛ ketawɔwɔ la kɛnɛ ketsha Bible lo dikambo dia Nzambi ɔtɔi ka mɛtɛ. Kânga lam’akotoladiɔ yambalo y’anto lo lɔsɛnɔ la Yeso Kristo, dibuku Onto Loleki Woke lo Tena Tshɛ koka kimanyiya onto dia mbeya Ɔna Nzambi dimɛna ndo kotɔma le nde, oko akakotɔma anto efula l’eleko ka ntondo. (Joa. 12:32) Etena tshɛ kɛnaso ɔnɛ sunganaka, tohembe kamba l’alako anɛ dia mɛnya anto abuku asɔ:
3 Naka wɛ ambɛna ɔnɛ ayonga dimɛna mbisha onto dibuku “Onto Loleki Woke,” oka dimbola nɛ:
◼ “Kakɔna kakoyɛ lo yimba etena kakanyiyɛ Yeso Kristo? [Tshikande akadimule.] Ambeyi efula w’ɛkɔndɔ mbetawɔka ɔnɛ Yeso aki onto loleki woke lo tena tshɛ. [Shila ɛnyɛlɔ kɛmɔtshi kele lo mbɔtwɛlɔ ka dibuku Onto Loleki Woke.] Bible mɛnyaka ɔnɛ lɔsɛnɔ la Yeso lekɔ ɛnyɛlɔ k’anto ndjela.” Adia 1 Petero 2:21 kâmɛ ndo odingɔ wa ntondo wa lɛkɛ la ndjihelo la mbɔtwɛlɔ ka dibuku Onto Loleki Woke. Naka onto lasawola la yɛ nangaka mbeya awui akina efula wendana la Yeso, ko wɛ mbosha dibuku diakɔ. La ntondo ka wɛ ntshɔ, adia Joani 17:3 ko wɛ mumbola wate: “Ngande wokokiso kondja ewo kɛsɔ katɔla otsha lo lɔsɛnɔ la pondjo na?” Okana la nde lushi shikaa la ndjokadimula dimbola sɔ.
4 Lam’ayoya nto dia ndjôlembetshiya woho wokokinde kondja ewo kasha lɔsɛnɔ, wɛ koka mbuta kânga ɔnɛ:
◼ “Lakakolake nte layoya dia ndjokɛnya woho wokokiso kondja ewo katɔla otsha lo lɔsɛnɔ la pondjo.” Shande dibuku Ewo ko wɛ kamba la tshapita ya ntondo dia mbɛ̂nya woho wekawɔ.
5 Naka dibuku “ L’humanité à la recherche de Dieu “ mbalangayɛ mbisha onto ko wɛ tatɛ la mboka dimbola nɛ:
◼ “Nshi nyɛ ɛtɛmwɛlɔ wekɔ efula hakoke: onde wɛ amboyambolaka woho wokokiyɛ mbeya wakɔna wangɛnyangɛnya Nzambi?” L’ɔkɔngɔ a wɛ nonga okadimwelo ande, fola dibuku L’humanité à la recherche de Dieu lo lɛkɛ 377. Ta dikambo diele lo numɛlɔ 7, ko wɛ mombola kana ndo nde lawɔ fɔnyaka ɔnɛ ɔtɛmwɛlɔ wa mɛtɛ pombaka mbokanya anto wele la weho tshɛ wa nkoho y’alemba. Ɔsa divɛsa dimɔtshi dioshawɔ lawɔ ndo, naka wonya wekekɔ, sha kɔmatɛrɛ lo dikambo dikina dioshidiwɔ l’ɔnɔngɔ akɔ. Naka onto ambɛnya mɛtɛ saki ko wɛ mbosha dibuku diakɔ. Laa ntshɔ, wɛ mbeyaka tondja dimbola nɛ: “Naa shɛngiya yahomba monga l’ɔtɛmwɛlɔ wa mɛtɛ lo lɔkɛwɔ l’anto wa lɔkɔ na?” Okana la nde lushi la ndjokadimula dimbola sɔ.
6 Lam’akalolayɛ dia ndjolembetshiya shɛngiya yakɔna yahomba monga l’ɔtɛmwɛlɔ wa mɛtɛ lo lɔsɛnɔ l’anto wa lɔkɔ, wɛ koka mumbola wate:
◼ “Oko le yɛ, onde ɔtɛmwɛlɔ pombaka monga la shɛngiya lo lɔkɛwɔ l’anto wa lɔkɔ? [Tshikande akadimule.] Kristo akatosha djembetelo yahombaso menda dia mbeya ɔtɛmwɛlɔ a dimɛna la wa kɔlɔ.” Adia Mateo 7:17-20 mbala kakɔ ɔtɔi lo lɛkɛ 12 la 13 la dibuku L’humanité à la recherche de Dieu. L’ɔkɔngɔ ko wɛ mbɔlɔmba dia nde mbadia odingɔ 20 lo lɛkɛ 13 la 14. Naka etena kekɔ, kɛtshanya la nde l’odingɔ 25 polo 29 lo lɛkɛ 16-18. Ondo wɛ koka tatɛ mbeka la nde Bible lo yoho shɔ lo biukubuku Katɔlɔmba, kana lo dibuku Ewo.
7 Woho wa Tatɛ Sawola l’Onto: Dihomɔ efula diekɔ dia wetshelo lo dibuku L’humanité à la recherche de Dieu diokoki kokimanyiya dia tatɛ sawola l’onto mbala ka ntondo, kânga lam’ayotoya mbala kekina. Wɛ koka tatɛ sawola l’onto lo mboka dimbola nto di’oshika. Ɛnyɛlɔ, enda wembola l’ɛtɛ w’awui wokokiyɛ sɔna wayotana olembetshiyielo lo ndjɛkɛ y’akatshi yofundami ndjo:
“Wembola wahomba kadimwama”: lɛkɛ 17-18
“Onde Yeso aki onto la lo shimu?”: lɛkɛ 237
“Akɔna akafunde Bible?”: lɛkɛ 241
“Qurʼān la Bible”: lɛkɛ 285
“Tolembetelo tɛnya ɔnɛ ɛkɔndɔ wele lo Bible wekɔ mɛtɛ”: lɛkɛ 340-341
“Awui wetawɔ Ɛmɛnyi wa Jehowa”: lɛkɛ 356-357
“Woho wa mbeya ɔtɛmwɛlɔ wa mɛtɛ”: lɛkɛ 377
8 Wɛ kokaka ntshɔ lo ndjɛkɛ y’akatshi yɔsɔniyɛ lo dibuku L’humanité à la recherche de Dieu ko nembetshiya kanyi yasɛdingolanyu. L’ɔkɔngɔ, shikikɛ lushi layoya nto ko wɛ tôki dimbola dimɔtshi diendana la kɛnɛ kosawudinyu diayoyokoka kadimula l’ekimanyielo ka biukubuku Katɔlɔmba, kana ka dibuku Ewo. Tohɛke mbêlɛ oya lo dako dia lo sɛkɛ ndo mbosha kiatshi ya leeta.
9 Anto wa weho tshɛ wele l’etema w’ɔlɔlɔ wekɔ lo tayange dia mbeya kɛnɛ kele sɔlɔ lo dikambo dia Nzambi la Kristo. Sho kokaka mbâkimanyiya lam’atatasambisha. Omalɔkɔ, totetemale ‘kamba la wolo ndo ndɔsha, nɛ dia takakitsha elongamelo kaso tshɛ le Nzambi kasɛna, ɔnɛ lele Oshimbedi w’anto wa weho tshɛ.’—1 Tim. 4:10.