Tɔlɔngɔsɔlɛ Sawo Diaso Shamɛ Dia Mɛnyanya Periodikɛ
1 Sho ngɛnangɛnaka Tshoto y’Etangelo la Réveillez-vous! nɛ dia asawo wa lɔkɔ wasungana ndo washa alako, wata akambo a weho tshɛ, oma lo awui weta nshi nyɛ polo lo “akambo wa Nzambi woshami etale.” (1 Kɔr. 2:10, NW) Ɔm’ɔmɔ a l’atei aso mbohɔka akambo efula w’eyoyo ndo w’ohomba wakandale lo periodikɛ shɔ, yakamba Jehowa la yɔ dia mbishola mɛtɛ yema yema. (Tuk. 4:18) Ndo sho nangaka mɛtɛ ndjidianganya l’ahole efula.
2 Tɔsɛdinge Mbilo Kaso: Anto wa woho akɔna wadjasɛ l’emamu aso? Naka anto wekɔ la lɔsɛnɔ l’osukusuku, kete tayɛna ohomba wa nɔngɔsɔla sawo dimɔtshi di’esadi esadi diasembɔ tɔ lo dikambo diakɔ. Koko, naka ase mbilo kaso wekɔ lo sɛna lo wɔladi, kete ondo sho kokaka nyomotalola sawo. Lɛnɛ akamba anto efula la yanyi, ondo tayoleka pomɔ lokolo l’ɔlɔ naka sho mbeta lawakawɔ la dikɔlɔ kana la tshôtsho. La yanyi, sho koka pomana l’amɔtshi naka sho sambisha l’ɛsɛsɛ kana lo makashinyi la makashinyi. Apandjudi amɔtshi kondjaka etombelo w’ɛlɔlɔ lam’asawolawɔ l’anto l’ahole wakitshawɔ mituka la lo dikambɔ diatɔsɛnyaka anto tshɛ asho.
3 Tomanyamanya Periodikɛ Yaso: Tâle oseka numɛlɔ tshɛ kam’alongolaso. Tɔsɔnɛ asawo weyaso ɔnɛ wayɔngɛnyangɛnya ase mbilo kaso. Lo akambo akɔna wayakiyanyawɔ? Lo sawo dialangaso sɔtɔla, toyange divɛsa dimɔtshi di’oshika diayotokoka shila. Totane dimbola dimɔtshi dia mumbola dia mbotsha ɔtɛkɛtshi aso saki. Tɔsɔnɛ divɛsa dimɔtshi diasungana diayotowâlɛ naka diaaso diekɔ. L’ɔkɔngɔ, tokane yimba dia woho wayotokoka mbuta bonde kalɔmbaso yema ya falanga tshitshɛ oko wengɔnyelo ndo mbuta dikambo dia diendelo di’oyoyo.
4 Tɔlɔngɔsɔlɛ Ɛtɛkɛta Aso wa Mbɔtwɛlɔ: Tɔsɔnɛ dimɛna ɛtɛkɛta wa ntondo wayotota dia ndjâlowola ndo tatɛ sawo. Amɔtshi kondjaka etombelo w’ɛlɔlɔ lo mbuta ɔnɛ: “Lakâle sawo dimɔtshi dia dimɛna efula lo kianda nyɛ, dimi nangaka diewoya anto akina.” Efula tatɛka la dimbola diatɔlɔnganya sawo otsha lo kanyi yakawalɔngɔsɔla dia tɛkɛta. Oko ɛnyɛlɔ:
5 Naka tekɔ lo mɛnyanya sawo dimɔtshi diatɛkɛta dia woho wambɔtɛkɔya odiakanelo, sho koka mumbola ɔnɛ:
◼ “Ahombama dia sho ndala djɔ ya baku, aha la mboka wɔma w’ɔnɛ wayotova kana wayotɔtwɛ na?” Tôlembetshiya ɔnɛ tekɔ l’awui amɔtshi wa kewoya wendana la lokando la dikambo sɔ, oma lɔkɔ mbayoshila, kem’edja nto, efukutanu wa weho tshɛ watomba l’atshunda w’anto. Ta divɛsa dimɔtshi diele lo periodikɛ diasha ɔkɔkɔ wa sho nongamɛ otshikitanu wa ngasɔ. Lam’ayoya nto, wɛ mbeyaka kotola yambalo y’onto akɔ lo tshapita 1 ya dibuku Ewo.
6 Naka tekɔ lo mɛnyanya sawo di’endana la lɔsɛnɔ la nkumbo, kete sho koka mbuta ɔnɛ:
◼ “Ambutshi efula mbeyaka ɔnɛ kema dikambo dia tshitshɛ dia mbodia nkumbo nshi yaso nyɛ. Abuku efula wakafundama dia dikambo sɔ, koko kânga tomanyi hawokana l’ɛtɛkɛta l’asawɔ. Onde onto ɔmɔtshi ekɔ lokoki tosha alako wakoka?” Ta divɛsa dimɔtshi diele lo periodikɛ diɛnya alako akɔna w’eshika watanaso lo Bible. Lam’ayotokalola dia tenda onto akɔ, tosawole la nde lo tokanyi ta lo Bible t’endana la wôdielo w’ana, tatanema lo lɛkɛ 145-8 la dibuku Ewo.
7 Dia mɛnya onto sawo diatɛkɛta dia dikambo dimɔtshi di’endana la nsɛnɔ y’anto, sho koka mbuta ɔnɛ:
◼ “Anto efula mbokaka lumu mpika keto l’ɔkɔkɔ w’etena k’asolo lâdiko kasɛnaso kɛnɛ. Onde wɛ fɔnyaka dia Nzambi akakongɛ dia sho sɛna ɔnkɔnɛ?” Towɛnya sawo dimɔtshi diɛnya woho wa ntokomɛ ekakatanu wa nshi nyɛ kana diɛnya bonde kahombaso kongɛ nshi yayaye yayokitakita asolo aso. Lo diendelo diaso diayela, tɔkɛtshanya lo sango la ɛtɛkɛta wele lawɔ lo lɛkɛ 4-5 la dibuku Ewo, ko sho tatɛ wekelo wa Bible mbala kakɔ ɔtɔi.
8 Têkesane l’Ɔtɛkɛtshi Aso: Anto wahomana la so ndjaka oma l’ahole wotshikitanyi ndo anto l’anto wekɔ l’awui awɔ walekawɔ ndjasha. Tɔlɔngɔsɔlɛ sawo dimɔtshi di’etshina diayotôkanya l’ɔtɛkɛtshi tshɛ. Totakanyiyisha kɛnɛ kayotota oyadi kana tayosawola la pami, la omoto, l’ekumanyi kana la ɔlɔngɔlɔngɔ. Ɛlɛmbɛ kema lo dikambo sɔ. Tokambe la asawo weyaso dimɛna ndo wakondjaso etombelo w’ɛlɔlɔ. Toyale la wangasanu tena tshɛ, tɔtɛkɛtɛ oma k’ɛse otema ndo teye mpokamɛ. Wanɛ wele lo “yɛdikɔ yakoka” wayɛna mɛtɛ kaso ndo wayetawɔ.—Etsha 13:48, NW.
9 Tokimanyiyani: Lo mbishanaka tokanyi l’anto akina, tayofudia ewo kaso k’ɔtɛkɛta. Naka tayoholaka asawo aso l’asekaso tena tshɛ, kete tayeya akambo efula ndo tayonga l’eshikikelo. (Tuk. 27:17) Lâsɔ mbayotoleka mangasana lo asoko. Ambutshi pombaka mbɔsa etena dia kimanyiya anawɔ lo vɔ ndjalɔngɔsɔla, mbahokamɛ lam’oholawɔ sawo diawɔ ndo mbasha alako dia vɔ nyomodilɔngɔsɔla dimɛna. Lee eyoyo, naka vɔ wayosambishaka l’ɔnɔngɔ w’apandjudi wamboleka mpotɔ akambo, kete wayokimanyiyama efula.
10 Ekakatanu kema dia nɔngɔsɔla sawo diaso shamɛ dia mɛnyanya periodikɛ. Ohomba ele monga la dui dimɔtshi di’oshika lo yimba dia mbuta ko dita lo yoho yakotola yambalo y’onto. Naka tayonga la saki ka pɔhɔlaka sawo ndo mpotɔka dui esadi, kete tayosala sawo dia dimɛna efula diayonga l’etombelo w’ɛlɔlɔ.
11 Okahanyelo wa periodikɛ ekɔ yoho mɔtshi y’ohomba yadianganyaso losango la Diolelo l’andja. Naka sho mbidja Tshoto y’Etangelo la Réveillez-vous! l’anya w’anto w’etema ɛlɔlɔ, kete periodikɛ yayeya tɛkɛta yɔamɛ. Tôhɔke nɛmɔ diayɔ nshi tshɛ, ndo ɔnɛ losango lele lɔkɔ koka shimbela nsɛnɔ y’anto. Yoho shɔ ya “ntshanela ololo la nkimanyanyiana” ngɛnyangɛnyaka Jehowa.—Heb. 13:16.