Têwɔ dia sala ɔlɔlɔ wahɔ̂tɔnɛ
1 Ekambi wa Jehowa wambeyamaka lo lokaho lawɔ l’ɔlɔlɔ awɔ. Vɔ mɛnyaka ɔlɔlɔ akɔ tena efula lo kimanyiyana l’emunyi oko ose Samariya la lokana kɛtshi lele lo wɛ̂la washa kandji wakate Yeso. (Luka 10:29-37) Koko, anto amɔtshi wahasungana kimanyiyama l’emunyi, pembaka nanya ɔlɔlɔ aso tena dimɔtshi. Diɔ diakɔ diele ngandji kakiso le akina pombaka tutshama oma lo “ewo k’oshika la ɔsɛdingwelo wa mɛtɛ, NW.—Fil 1:9.
2 L’atei w’etshumanelo: Oko ɛnyɛlɔ, amɔtshi mbeyaka mbuta vate sho bu l’elimu, kana mbisha ɛkɔkɔ ekina dia nyanga ekimanyielo. Tena dimɔtshi, hawoyange olimu la tshete. Lo mɛtɛ, vɔ nangaka tsho nsɛna paka l’ɔkɔngɔ w’akina. Dia dikambo di’anto wa ngasɔ, ɔpɔstɔlɔ Paulo akasha ɔlɛmbɛ ɔnɛ ate: “Naka untu halangi nkamba ulimu, ndi talekaki.”—2 Tes. 3:10.
3 “Tena ndo akambo waki kombeyamaka ntondo” tokomɛka sho tshɛ. Naka lo dikambo sɔ, sho tekɔ weola, pombaka “mbu ya nde ya lushi la lushi,” sho hatohombe ndjakiyanya ɔtɛkɔya, nɛ dia Jehowa ekɔ lo kokɛ wanɛ wawoka ngandji ndo wasala lolango lakinde. (Ond. 9:11, NW; Mat. 6:11, 31, 32) Ondo ose wola ayɛna ohomba sawola l’ekumanyi kɛmɔtshi. Dikumanyi kokaka mbeya tɛdikɔ t’ekimanyielo takɔ̂sama oma le mbolamatadi. Ondo vɔ mbeyaka la mbokimanyiya dia nde ndodja ɛkɔngɔnya kana fɔlɔmilɛlɛ yahombama kana mbôkiya kɛnɛ kalɔmbama dia kondja lɔkɛlɛngɛ lɔmɔtshi. Lo tena tshɛ dia woho ɔnɛ, dikumanyi wayɔsɛdingola dikambo dia ɔnɛ layanga ekimanyielo ndo menda kɛnɛ kakoka salema.—Enda 1 Timote 5:3-16.
4 “Akanga a lokeso w’eteta”: La Société ekɔ lo nongola alapɔlɔ w’anto amɔtshi wa lo tshumanelo washisha falanga la diangɔ dia l’emunyi lo dikambo dia “akanga wa lokeso w’eteta.” Hatokoke mamba dikambo sɔ, nɛ dia Afundelo wekɔ lo têwola dia “anto wa kolo la akanga a lukesu wayuhama lu akambu awo wa kolo; vo wayukesana, ku wayukesama.” (2 Tim. 3:13) Tena efula, akanga a lokeso akɔ mbutaka dia wekɔ la paa ndo wekɔ l’ohomba w’akuta wa somba diangɔ dia ndɛ ndo kalola lawâkawɔ. Mbala efula, anto akɔ kema Ɛmɛnyi wa Jehowa. Kânga vɔ wayɛnya oko wekɔ anto w’ɛlɔlɔ, vɔ wekɔ paka akanga a lokeso.
5 Naka onto lahayeye ekɔ lo nyanga ekimanyielo, ayonga dui dia tshundu mumbola ekumanyi kɛmɔtshi ka l’etshumanelo, ɔnɛ layohomba shikikɛ kana onto akɔ ekɔ onangɛso kana kema. Akatama dia mumbola dikumanyi dia l’etshumanelo kande ka ntondo dia mbeya lokumu lele lande. Ɔnangɛso kana kadiyɛso kayotanema shashimuya lo dihomba pombaka mboka dia oyango wa ngasɔ wekɔ l’oweso wa kokɛ anto tshɛ w’endana la dikambo diakɔ. Lo wedi okina, lo sala ɔsɔku, tayoshola akanga a lokeso. Aha ɔnɛ dia sho kanɛ̂ka anto tshɛ wahateye kɔlɔ mbatɛkɛtama lanɛ. Koko, sho pombaka mbewɔ akanga a lokeso.—Enda nto km 6/81 lɛkɛ la dikatshi 4.
6 Salɔmɔna, nkumekanga ka lomba akate ate: “Tuyalaki la unyishi a di’ololo le wane wukuki dilungula lam’eye la wulu wa mbashadio.” (Tuk. 3:27) Oma lo shɛnɔdi yaso, djembetelo yɛnya lomba, tayotetemala la ndjâla la ɔkɛtshi, ndo tayoyâlama etena kakɔ kamɛ di’aha sala ɔlɔlɔ wahɔtɔnɛ.