Toshikikale lo wotelo wa lo sɛkɛ w’elongamelo kaso, aha tshingatshinga
1 Wekelo wa La Tour de Garde ekɔ ehomɔ k’ohomba kak’ɔsama dia mbisha wodja wa Nzambi “mbu ya nde lu tena diayo” ɛlɔ kɛnɛ. (Mat. 24:45) Lo losanganya lɔsɔ l’ohomba, sho mbɔtɔka la eweso ehende w’eshika ɛnɛ: dia sho keketshana lo nyuma ndo dia sho mɛnya wotelo wa lo sɛkɛ w’elongamelo kaso le anto akina.—Heb. 10:23-25.
2 Tokondja ɛlɔlɔ w’oma lɔkɔ: Lo tshumanelo efula, mɛnamaka dia paka etenyi ɔtɔi ka l’asato k’ampokami keto mbalɔngɔsɔla wekelo awɔ. Suke la lofulo lakɔ lâmɛ mbasha waɔmbwɛlɔ. Aha lo losanganya loto mbayokoka onto ndɛ mma dia wolo dia lo nyuma diele lo La Tour de Garde. Sho pombaka ndjaombɛ etena kɛmɔtshi dia tâlɔngɔsɔlaki akambo wayôtekama.
3 L’etena kalɔngɔsɔlaso, ondo tayɛna ɔlɔlɔ dia tatɛ la kanyiya lo wembola wele lo kiombo kombo yele tshalo ekomelo k’artikɛlɛ. Ɔsɔku mbayotohotɔ atshina w’akambo wa lo wekelo.
4 Todihole atui ɔlɔlɔ lam’atete losanganya. Tokotole yâmbalo yaso l’ɛtɛkɛta wa mbɔtwɛlɔ wâki ɔnɔmbɔdi; nɛ dia vɔ wekɔ lo shikikɛ etshina ka wekelo. Nde kokaka munyiya wembola esato kana ɛnɛi wayoyokadimwama l’artikɛlɛ, kana, vusola atshina w’akambo wa lo wekelo wa mbala k’etshi, naka wekelo wahomba salema lo etena kakɔ mbahɔna la wɔnɛ wakete. Naka eokelo kaso ka pɔlɔfɛsi kɛmɔtshi ka lo Bible pombaka nɔngɔswama, kete ɔnɔmbɔdi ayotewoya dikambo diakɔ. Sunganaka dia waɔmbɛlɔ ande pombaka ndjâla tshena pe nɛ dia oyango wa wekelo ele dia mbisha etshumanelo diaaso dia tɔ tɛkɛta dia elongamelo katɔ. Tohokɛ lotui lo waɔmbwɛlɔ w’anto akina lo kɛnɛ kakaweke; nɛ dia dikambo sɔ kokaka keketsha mbetawɔ kaso.
5 Têwoya elongamelo kaso: Onde na, sho kadimolaka lo wembola wôkama lam’atete losanganya esangɔ l’esangɔ oka? Ekɔ ɔlɔlɔ dia mbishaka waɔmbwɛlɔ wa tshena pe ndo wa shikaa. (Enda Luka 21:1-4.) Onto tshɛ ngɛnangɛnaka okadimwelo wokɛma hwe woye oma l’otema. Nshi tshɛ, okadimwelo wa ntondo lo wombola pombaka ndjâla mondo mondo ndo sembɔ tɔ̂. Ɔsɔku kayotosha ampokami akina diaaso dia vɔ shila divɛsa dimɔtshi dia lo Bible kana kotola yâmbalo lo kɛnɛ kotami l’ɔmɔmɔ lo palagalafɛ. Lo yoho shɔ mbayokoka anto efula mɛnya wotelo wa lo sɛkɛ w’elongamelo kawɔ. Waɔmbwɛlɔ pombaka ndjâlaka nshi tshɛ l’ekeketshelo ndo l’ekimanyielo.
6 Naka atayala edja kotateyɛ la mbɔtɔ lo sanganya, kana wɛ hahembaka kadimola lo wembola, kete ondo wɛ ayolanga dia ɔnɔmbɔdi kokimanyiya. Lɔmbande dia nde menda lo lɛkɛ leyɛ l’etena kayɔsɛdingwama palagalafɛ kɛmɔtshi, naka wɛ ambemɛ lonya. Wɛ kokaka ndjâkimɔ dia mbadia divɛsa dimɔtshi dia l’Afundelo ndo mɛnya lo tshena pe woho wokokiso kamba ladiɔ olimu. Lande na ahayafunde ɛtɛkɛta ɛmɔtshi l’omamu wa dikatshi dia wɛ ndjôhɔ kɛnɛ kalangayɛ mbuta lam’ayoyokadimolaka na? Ɛlɔngɔlɔngɔ, tanyohɛke ɔnɛ waɔmbwɛlɔ anyu wekɔ lo mandɔma.—Mat. 21:16.
7 Ekɔ ohomba dia sho mbewoya mbetawɔ kaso, ndo sho têkɔ la diaaso di’ɔlɔlɔ efula dia sala dikambo sɔ lo wenya wa wekelo wa La Tour de Garde. Naka wɛ ekɔ lo kandakanda dia kadimola, kete sala la weolo ayɛ tshɛ dia wɛ kandola okakatanu ɔsɔ ndo yâtshutshuya dia wɛ mbishaka kânga diɔmbwɛlɔ ɔtɔi. Laasɔ kete wɛ ambɔtɛkɛta lo losanganya ndo wɛ ayɔngɛnangɛna lo dikambo sɔ. Ndo lande na ahayasangoya dia mbisha kânga diɔmbwɛlɔ ɔtɔi lo wekelo wayaye wa La Tour de Garde na?—Tok. 15:23.