Kakɔna kayotosala l’ɔnɔnyi ɔnɛ w’olimu na?

¹L’etatelo k’ɔnɔnyi w’olimu 1995, wakatatɛ lo Lovula 1, sunganaka mɛtɛ di’ekambi wa Jehowa nembetshiya hwe kɛnɛ kalangawɔ sala l’ɔnɔnyi ɔnɛ, l’onto ndo l’onto ndo l’olui awɔ vɔ tshɛ.

² Totetemale la pama lo nyuma: Naka atayala edja kamboteya mɛtɛ, kete sho nangaka monga la mbetawɔ kele nge. (Heb. 6:1-3) Naka tôkongaka nge lo nyuma, tatɔngɛnangɛnake paka dia sukɛ̂ anyaso, djekoleko wanɛ wele eyoyo; koko tolame ndo lonyuma laso hita. Tatokanake shate tambokondja ewo k’efula ka Bible ndo tambeya awui efula lo lɔsɛnɔ laso l’Akristo lo yɛdikɔ yambokoka. Onde na, sho têkɔ lo sɛdingola Afundelo wa lushi la lushi oka? Onde na, sho têkɔ lo ndjela ekongelo ka wadielo wa Bible kɔlɔngɔswami lo Kalasa k’Olimu wa Teokrasi oka? Onde na, sho têkɔ lo nɔngɔsɔla wekelo wa dibuku la wekelo wa La Tour de Garde oka? Akambo asɔ pombaka ndjâla eweso wa totshitshɛ wakoka onto ndjela. Sho pombaka tetemala la pama lo nyuma naka sho nangaka mbika l’elanyelo ka dikongɛ di’akambo wa kɔlɔ ndo mbɔtɔ l’andja w’oyoyo waki Nzambi.​—Enda Filipi 3:12-16.

³ Totshikalake pudipudi lo nyuma: Dia sho ngɛnyangɛnya Jehowa l’ɔlɔlɔ tshɛ, ‘toyaɛdia oma lo mindo tshɛ ya demba la ya lo yimba.’ (2 Kor. 7:1, NW) Naka tamboshila la mbɛdiama, ɔkɔkɔ akɔna akombolaso nto dia “tuyakutula lu loteke” l’andja wa kɔlɔ na? (Enda 2 Petero 2:22.) Toyashikikɛ dia sho tshikalaka nge ndo pudipudi lo nyuma. Naka tayosala ɔsɔku, kete hatotêngenga asangwelo wa kɔlɔ waki Satana ndo hatotokesama, di’aha sho ndjosala pɛkato ndo ndjoshisha dietawɔ dia Jehowa.​—2 Kor. 2:11.

⁴ Todje yimba l’alako wa lomba: Tukedi 15:22 mbutaka ɔnɛ: “Keli lam’eli andaki efula, dio diatushikikalaka.” Koko, tatohɛke dia Sɔlɔmɔna, ɔnɛ lakatɛkɛta ɛtɛkɛta ɛsɔ, akayotshikɛ̂ka wâdiɛnde dihole dia vɔ ‘mbɛtɔya otema ande dia nde ndjela tozambi zambi tokina,’ nɛ dia nde kombidja yimba lo dako dia Nzambi diakoshimbaka dia nde ntshuka amato w’ase wedja. (1 Nkum. 11:1-4) Ndo, naka hatodjisha yimba l’alako wa lomba, woho akɔna wokokiso nongamɛ dia sho tetemala kambɛ Jehowa ndo ndjâla ɛnyɛlɔ kakoka anto mbokoya na? (1 Tim. 4:15) Alako wa lo Bible wayotosha diaaso dia sho nama otema aso. (Tok. 4:23) Naka tayolanga kɛnɛ kalanga Jehowa, la petsha kɛnɛ kahetshande, ndo naka tayoyatshika dia nɔmbwama oma le nde la ntsha kɛnɛ k’ɔngɛnyangɛnya, kete tayoyala l’ekokelo k’oshika.​—Tok. 8:13; Joani 8:29; Heb. 1:9.

⁵ Sho hatohombe tɛmɔla Nzambi oma lo diewo diaso, monga la yoho ya wɔma wa Nzambi wele l’anto wayasɛma ɔnɛ vɔ wekɔ Akristo. Koko, sho tekɔ lo tɛmɔla Nzambi l’ohetoheto, ndo sho ndjâkimɔka l’ɔtɛmwɛlɔ ande lo ndjela mɛtɛ kele lo Dui diande.​—Joani 4:23, 24.

⁶ Ondo osangoyelo wakiso wa sala lolango la Nzambi mbeyaka mbidjama l’ehemba lushi la lushi. Koko sho tayokeketshama naka tayohotɔ ɔnɛ “[nkumbo k’otondo, NW]” k’anangɛso wekɔ lo ndɔshana l’ekakatanu akɔ wâmɛ, ndo ɔnɛ Jehowa kayotosha wolo. (1 Petero 5:9, 10) Laasɔ kayotokoka kotsha olimu aso lo yoho y’ɔlɔlɔ l’ɔnɔnyi w’olimu 1995.​—2 Tim. 4:5.