Vɔ Kotshika Sambisha
1 Lokombo laso, Ɛmɛnyi wa Jehowa, mɛnyaka eso ndo kɛnɛ kasalaso. Sho sambishaka anto akambo w’ɛlɔlɔ wa Jehowa, Nzambi kaso. (Is. 43:10, 12). Onto l’onto pombaka sambisha akambo asɔ naka nde nangaka koma ose etshumanelo. Esambishelo salemaka ntondotondo oma l’olimu aso wa lo sɛkɛ, sho kokaka shila: olimu wa lo luudu la luudu, esambishelo ka l’ɛsɛsɛ, waendelo w’eyoyo ndo wekelo wa Bible l’anto. Sho tshɛ tambokeketshama lo dikambo sɔ dia sho nyomoleka kamba olimu ɔsɔ.—1 Kor. 15:58.
2 Koko, ase etshumanelo amɔtshi kimamɛ. Hemɔ kana ɛkɔmɔ kɛmɔtshi ka wolo mbeyaka mbashimba di’aha vɔ tomba oma la wakawɔ. Otonelo w’ase nkumbo mbeyaka monga wekamu ɔmɔtshi wa woke efula. Okristo ɔmɔtshi weke dikɛnda mbeyaka shimbama oma le ambutshi wele kema ambetawudi. Wanɛ wadjasɛ lo toshamba ko bu l’akalo kana l’akoka wa futa mutuka mbeyaka ndjaoka dia hawokoke tomba. Akina kokaka kandakanda dia sambisha oma lo diki diawɔ. Apandjudi watanema l’atei w’akambo wa ngasɔ, kana l’akina wa woho ɔsɔ, ondo wekɔ lo ndjaoka dia hawodja kamba, nɛ dia vɔ hawokambe efula oko anto akina ndo lo weoho tshɛ, vɔ hawokotsha kɛnɛ kakombolawɔ sala mɛtɛ. Vɔ hawokoke mɔnyɔla weolo wadjawɔ kânga yema. (Ngal. 6:4) Vɔ wayokondja ekeketshelo lam’ayoweya ɔnɛ Jehowa ekɔ l’ɔngɛnɔngɛnɔ lam’asalawɔ la wolo awɔ tshɛ oyadi kânga l’atei w’akambo watanemawɔ.—Luka 21:1-4.
3 Toyange Diaaso Dimɔtshi dia Sambisha: Wakakɔndɔla akambo nunu nunu wɛnya ɔnɛ anto wakatanema l’atei w’akambo wa welo kotshikɛ wekamu dihole dia mbashimba dia vɔ sambisha. Lam’akawɔshi tɛdikɔ, vɔ wakakanyiya waaso efula wotshikitanyi wa sambisha lo tshakitudi. Wanɛ wahakoke tomba oma la wakawɔ wakakambe la telefɔnɛ dia kondja diaaso dia sambisha. Le wɔ, oseka onto tshɛ laya dia ndjowaenda ekɔ oko ompokami w’ɔlɔlɔ. Oyadi kânga omoto lele nkumbo tonaka ko nde hakoke sambisha lakande, kokaka mbɔsaka waaso wele lande wa sawola l’asukanyi ande kana l’anto akina wahomana lande etena katandasale elimu ande wa lushi la lushi.
4 Ombutshi wele kema ombetawudi kokaka shimba Okristo weke ɔlɔngɔlɔngɔ dia nde sambisha lo sɛkɛ. Lo dihole dia nde mbɔsa dikambo sɔ oko wekamu wahandakoke mbekola, nde kokaka mbetɛ asekande l’embetsha ande “mbilo” kande ndamɛ, ka sambisha ɔlɔlɔ ndo kokaka kânga mbeka la wɔ Bible. Anto efula wadjasɛ lo toshamba wakasambisha lo mikanda. Wanɛ watshutshuyama l’ohetoheto w’Okristo wayokondjaka nshi tshɛ diaaso dimɔtshi di’aha ndjokoma ‘tosuasua kana oko anto wahatɔ elowa lo kɛnɛ kendana la ewo k’oshika ka Nkumɛso Yeso Kristo.’—2 Pet. 1:8.
5 Lo kɛnɛ kendana la woho wakambaso olimu wa sambisha, Jehowa toshaka sho tshɛ dako dia kamba olimu ɔsɔ l’‘anima wakiso tshɛ.’ (Kol. 3:23) Etena kakimɔso l’olimu akɔ la kɛnɛ kakambaso tshikitana, koko saki katosokoya kekɔ woho wâmɛ: ngandji k’oma ka tshina ka l’“otema otoi.” (1 Ek. 28:9; 1 Kor. 16:14.) Naka sho sala la weolo aso tshɛ, kete hatotokanyiya ɔnɛ, lam’ele hatokambe efula, sho kema la mbetawɔ ndo ohomba aso kema l’atei w’etshumanelo. Oko Paulo, sho kokaka mbuta l’ɔlɔlɔ tshɛ ɔnɛ: ‘sho kotshika mbuta akambo tshɛ w’ɔlɔlɔ, kânga mbetsha anto lo sɛkɛ.’—Etsha 20:20.