Tosambisha Lokumu L’ɔlɔlɔ L’ahole Tshɛ

¹ Akristo wa ntondo wakasambisha lokumu l’ɔlɔlɔ l’ahole tshɛ. Waki l’ohetoheto efula ko, ɛnɔnyi 30 l’ɔkɔngɔ w’eolwelo ka Yeso Kristo, losango la Diolelo lakasambishama “l’etungelu tshe la tshina di’ulungu.”​—⁠Kol. 1:⁠23.

² Ɛlɔ kɛnɛ, ekambi wa Jehowa wele l’etete wekɔ lo ndjela oyango akɔ wamɛ: mbewoya anto efula lokumu l’ɔlɔlɔ la Diolelo. Kakɔna kokoki tokimanyiya dia kotsha oweso ɔsɔ na? Anto efula kambaka olimu wonya w’otondo ndo hawoleke tanema lawakawɔ lam’ayaso dia ndjowaenda. Naka hawotshwe l’olimu, kete vɔ tomba, mbeteta l’awui awɔ kana ntshɔ la tasɛnyaka asho. Ngande wayotewoya amɔtshi a l’atei awɔ wasungana losango la Diolelo na?​—⁠Mat. 10:⁠11.

³ Sho kokaka pomana l’amɔtshi l’ahole awɔ w’olimu. Kânga l’esomba wa totshitshɛ, ahole w’elimu tanemaka lɛnɛ etsha anto efula etenyi ka lushi k’ɔlɔlɔ. L’esomba wa weke, anto wakamba lo wa usinɛ kana lo mvudu ya weke ya wa bilɔ, kâmɛ ndo wanɛ wadjasɛ lo mvudu ya weke lɛnɛ ahɔtɔ anto wɔtɔtɔ sambishamaka, efula kawɔ ɔsɔ kele mbala ka ntondo. Lo wikɛndɛ, l’atei a wanɛ wahomana laso lo dikambɔ dialongawɔ wa nyama watasɛnya asho, lo dihole dia tɔkɛnyɔ, lo diɛta kana lo luudu lawɔ la lo shamba, kana l’atei a wanɛ wakongɛ lo dihole diatshikawɔ mituka kana lɛnɛ ele wa makashinyi, amɔtshi nongolaka lokumu l’ɔlɔlɔ dimɛna.

⁴ Nshi tshɛ apandjudi efula mbidjaka wolo wa lânde dia sambisha l’ahole w’anto efula, lɛnɛ atanema anto. Ntondotondo, Ɛmɛnyi ɛsɔ wakakandakandaka ndo wakokaka yema ya wɔma, nɛ dia vɔ waki la mbekelo ka sambishaka lo yoho yambowekɛ, oko ɛnyɛlɔ lo luudu la luudu. Ngande owosala nshi nyɛ na?

⁵ Ɔnangɛso ɔmɔtshi la manamana akate ate: “Olimu ami akanyomɔhɛtahɛta la shambu shɔ!” Okina akakotsha ate: “Yoho yakɔ kimanyiyakami dia ndjasha tshɛ l’olimu.” Ombatshi mboka ɔmɔtshi waya ekumanyi akate ate: “Yoho yakɔ yakanyomombisha wolo lo yimba, l’emunyi ndo lo nyuma, . . . ndo lekɔ lo tetemala a pama!” Opandjudi ɔmɔtshi ambɛna dia nde osawola l’anto efula wahatatɛkɛtaka l’Ɛmɛnyi wa Jehowa ndoko lushi. Ndo ɛlɔngɔlɔngɔ lawɔ ngɛnangɛnaka kamba olimu ɔsɔ w’ɔlɔ. Ɔmɔtshi l’atei awɔ mbutaka ɔnkɔnɛ: “Ekɔ dimɛna efula nɛ dia diaaso kondjamaka dia tɛkɛta l’anto efula.” Okina ate: “Latâtshikɛka anto ekanda efula ngasɔ ndoko lushi!” Ɔsɔ ekɔ awui wakasalema lo mbilo kɛmɔtshi kakindjakindjama tena efula.

⁶ Emendji Weteta Mbêta ka Ntondo: Lam’eyatɔ ɔnɛ “andja ɔnɛ wɛnaso wekɔ lo takadimɔ,” la Société mala nɔmba emendji weteta dia vɔ tshikitola ekongelo kawɔ k’esambishelo ka lo lomingu la lomingu woho wa vɔ mbewoya anto efula lokumu l’ɔlɔlɔ la Diolelo. (1 Kɔr. 7:​31, NW) Oma ko ɛnɔnyi k’ɛnɔnyi, emendji w’otshimbedi sambishaka pindju tshɛ lo luudu la luudu ndo akɔlɔ tshɛ vɔ salaka waendelo w’eyoyo la mbetsha anto Bible. Lo tenyi dimɔtshi dia nkɛtɛ, ekongelo kɛsɔ koka monga ɔlɔlɔ nshi tshɛ. Lo tenyi dikina dia nkɛtɛ, sambisha lo luudu la luudu la pindju mɔtshi ekɔ oko wetshelo a wenya. Naka ngasɔ, kete omendji weteta mbeyaka mɛna dimɛna dia sambishaka la pindju lo makashinyi la makashinyi kana l’ɔsɛsɛ. Nde mbeyaka nto mbɔsa tɛdikɔ dia tolui t’apandjudi sambisha lo mvudu ya weke ya wa bilɔ, lo kartie yasondjawɔ diangɔ, l’ahole watshikawɔ mituka kana l’ahole akina watanema anto efula. Naka apandjudi wayokamba dimɛna l’etena ketshawɔ l’esambishelo, kete anto efula mbeyaka munandema.

⁷ Alapɔlɔ walongolaso mɛnyaka ɔnɛ emendji weteta ndo apandjudi waketawɔ etshikitanu ɛsɔ l’ɔngɛnɔngɛnɔ. Elui wa dikumanyi wakalɔmbɛ omendji w’otshimbedi dia nde ndakanya apandjudi amɔtshi toho t’olimu tasungana kambema lo ngelo kawɔ. Ekɔ ɔlɔlɔ efula dia apandjudi asɔ tshindɛ omendji weteta lam’atandakambe elimu ande. L’ɔkɔngɔ, vɔ lawɔ koka ndjolakanya akina. (2 Tim. 2:⁠2) Ɔsɔku mbambôka anto efula lokumu l’ɔlɔlɔ ɛlɔ kɛnɛ.

⁸ Ekɔ mɛtɛ dia hanyohombe konga oyelo w’omendji w’otshimbedi dia ndjohemba weoho ɛmɔtshi wa sambisha l’atei w’ekina ɛsɔ. Tokanyi tɔmɔtshi tɔnɛ tokokinyu mɛna ohomba lo mbilo kanyu:

⁹ Esambishelo ka l’Ɛsɛsɛ: ‘Lende ele anto?’ mbatotoyambolaka tena dimɔtshi lam’atatasambisha lo kartie kadjasɛ anto ko hawɛnama la pindju l’atei a lomingu. Sho kokaka pomana l’amɔtshi lam’ataweteta l’awui awɔ. Onde nyambohembaka mbâsambisha l’ɛsɛsɛ? Yoho shɔ y’olimu kokaka tondja elowa efula naka sho kamba dimɛna. Lo dihole dia tshikala edie kâmɛ la periodikɛ l’anya, ndeka dimɛna tɛkɛtsha anto ndo tatɛ sawo dimɔtshi dia lɔngɛnyi. Aha paka sambisha anto tshɛ weteta. Tɛkɛta la wanɛ wele bu prɛse, oko ɛnyɛlɔ wanɛ watemala la tende ekala, wanɛ wele l’etei ka mituka wemadi kana wanɛ wakongɛ mituka wɛmba anto tshɛ. Dia tatɛ, kâ wɛ mbisha onto mɔyɔ la lɔngɛnyi tshɛ ko wɛ menda woho wayondosala. Naka nde nangaka sawola, mbolande kanyi yele lande lo dikambo dimɔtshi diɛnayɛ ɔnɛ kokaka kotola yambalo yande.

¹⁰ Lam’akandatshu dia tembola etshumanelo kɛmɔtshi, omendji weteta akelɛ apandjudi asamalo dia vɔ ntshɔ la nde la wadiɛnde la tosambisha l’ɛsɛsɛ. Akatotomba na? Nde akate ate: “Pindju akatetɛ dimɛna efula! Anto tshɛ wakikɔ. Takakahanya periodikɛ 80 ndo tokatshikatshi efula. Takasawola l’anto asawo efula wâkeketsha. Opandjudi ɔmɔtshi, wakasambisha l’ɔsɛsɛ mbala ka ntondo, akâmbe ate: ‘Laya lo mɛtɛ ɛnɔnyi k’ɛnɔnyi ko takameyaka l’omamu wa na wakametaka!’ L’ekomelo ka lomingu, periodikɛ tshɛ yakamɔtaka l’etshumanelo yakashile.”

¹¹ Lam’akandatshu l’etshumanelo kekina, omendji akɔ weteta akoke ɔnɛ apandjudi amɔtshi wakasambisha l’ɔsɛsɛ k’ɔmɔ la pindju kɛmɔtshi, koko vɔ kopomɔ lokolo l’ɔlɔ. Kadiyɛso kɛmɔtshi akatɛkɛta paka l’anto ahende ato l’edja tshɛ kakandasambisha nɛ dia anto akina tshɛ wakahomanaka la nde waki prɛse otsha l’olimu. Omendji weteta akalake onto l’onto dia nde kalola l’ɔsɛsɛ akɔ wâmɛ naka wonya ambowanda yema. Vɔ wakasale ɔsɔku, ko wakakome polo midi. Kadiyɛso kakasawola paka l’anto ahende ato la pindju ka pɛ, akayosawolaka l’anto efula mbala ka hende. Nde akakahanya periodikɛ 31 la tobukubuku 15, akɔshi nkombo l’adrɛsɛ w’anto esambele ndo akamɛ mbeka l’anto ahende Bible! Apandjudi akina waki l’olui akɔ wakakondja etombelo w’ɔlɔlɔ efula ndo vɔ lawɔ.

¹² Lam’ahomanayɛ l’onto ɔmɔtshi lɛnya saki, sala tshɛ dia mbɔsa lokombo lande, adrɛsɛ ande ndo numɛlɔ kande ka telefɔnɛ. Lo dihole dia mombola awui asɔ tshɛ wombolambola, wɛ kokaka mbuta ɔnɛ: “Lambɔngɛnangɛna sawo nɛ efula. Onde ayokoka sho ndjotetemala ladiɔ etena kekina?” Kana mbolande wate: “Onde kokaka dimi ndjokenda lakayɛ?” Lo yoho shɔ, anto efula mbetawɔka dia vɔ ndjowaenda nto. Enda kana wɛ ekɔ la nkanda y’akatshi wa leeta dia mbisha wanɛ wayolanga ndja lo nsanganya.

¹³ Naka wɛ ambosawola l’onto lɛnya saki koko mbidjasɛka lo mbilo k’etshumanelo kekina, ewoya anangɛso wa lo mbilo kakɔ dia vɔ pɛtshahɛtsha saki kakɔ. Onde esambishelo ka l’ɛsɛsɛ ayonyokimanyiya dia dianganya lokumu l’ɔlɔlɔ dimɛna l’etenyi kanyu ka nkɛtɛ? Naka ɔsɔku mbediɔ, kete nyoyalɔngɔsɔlɛ dia sambisha l’ɔsɛsɛ lo wonya wasungana ndo wayonyokimanyiya dia sambisha anto efula.

¹⁴ Esambishelo ka lo Mituka Wɛmba Anto Tshɛ: Pindju kɛmɔtshi, ambatshi mboka wakɔshi yɛdikɔ dia sambisha anto wakakongɛka bisi suke la kalasa mɔtshi. Wakasawola l’anto dimɛna efula koko, okakatanu ɔmɔtshi akâkomɛ. Lam’akamɔtɛ sawo, bisi akaye, ko sawo diakahembɔ mbala kakɔ ɔtɔi. Ambatshi mboka wakakandola okakatanu ɔsɔ lo mbidɛ lo bisi dia totetemala la sambisha ase bisi, ko wakatshu la vilɛ. Lam’akawakome lo dihole diatokomɛka bisi, ambatshi mboka wakakalola ko bisi kakɔ wayatetemala la sambisha. L’ɔkɔngɔ wa vɔ ntshɔ kalola ntshɔ kalola mbala efula, vɔ wakɛdika etombelo wakawakondja: vɔ wakakahanya periodikɛ ndekana 200 ndo wakamɛ mbetsha anto asamalo Bible! Wa pasase mɔtshi waketawɔ kimɔ adrɛsɛ awɔ la numɛlɔ yawɔ ya telefɔnɛ woho wa vɔ ntshɔ dia towaenda lawakawɔ. Lomingu lokina, ambatshi mboka wakakalola nto lam’atemalaka bisi ndo wakasale woho akɔ wâmɛ. Vɔ wakakahanya periodikɛ 164 ndo wakamɛ mbeka l’onto ɔmɔtshi Bible! Lo dihole dimɔtshi diatemalaka bisi, onto ɔmɔtshi akadɛ ko akadjasɛ lo dihole ɔtɔi diaki hwe: suke l’ombatshi mboka. Nde akende ɔnangɛso ko nde mbotɛ amɔnamɔna ate: “Dimi mbeyaka, wɛ ekɔ la Tshoto y’Etangelo mɔtshi ya mbishami!”

¹⁵ Apandjudi efula sambishaka dimɛna hakoke lam’ataweteta lo bisi, lo kawolo kana lo ndɛkɛ. Ngande wokokiso tatɛ sawola l’osukanyi aso na? Opandjudi ɔmɔtshi waki l’ɛnɔnyi 12 akâlaka paka Réveillez-vous! lo bisi, la kanyi ya kotola yambalo y’osekaseka ɔmɔtshi wakadjasɛ suke la nde. Ko kɛsɔ mbakasalema! Osekaseka akɔ akawombola kɛnɛ kakandalaka, ko nde akawotɛ ate ekɔ sawo dimɔtshi diɛnya woho wokoki ɛlɔngɔlɔngɔ kandola ekakatanu wahomana la wɔ. Nde akakotsha ate sawo diakɔ diakôkimanyiya efula ndo ɔnɛ nde lawɔ kokaka kondja ɛlɔlɔ oma lɔkɔ. Nde akɔshi wa periodikɛ l’ɔngɛnɔngɛnɔ. Ɛlɔngɔlɔngɔ ekina ehende wakoke sawo diawɔ ko vɔ lawɔ wakalɔmbɛ periodikɛ mɔtshi. Lâwɔ, shufɛlɛ ya bisi akemala l’omamu a mboka ndo akambola dui diakɔ di’ohomba efula diele lo periodikɛ yakɔ. L’ɔkɔngɔ wa nde mboka, nde lawɔ akayiɔshi. Mɛtɛ, kɛsɔ tshɛ tôtondosalema otondonga opandjudi ɔsɔ w’ɔlɔngɔlɔngɔ komonga la periodikɛ efula ya mbisha anto wakɛnya saki!

¹⁶ Esambishelo ka lo Dikambɔ Dialongawɔ wa Nyama la l’Ahole Wakitshawɔ Mituka: Naka wonya wekɔ otshuku, esambishelo ka lo dikambɔ dialongawɔ wa nyama la l’ahole wakitshawɔ mituka ekɔ yoho yoleki dimɛna ya sambisha anto. Onde wɛ ambohembaka sambisha lo dihole diakitshawɔ mituka lɛnɛ ele wa makashinyi? Lam’akomayɛ lo dihole diakitshawɔ mituka, shishima yema l’emamu ayɛ. Yanga onto laha prɛse kana lodjashi l’etei ka mutuka wemadi akongɛ ko wɛ tatɛ sawola la nde lo lɔngɛnyi. Naka sawo diambotetemala, sambishande losango la Diolelo. Sala tshɛ dia wɛ monga wɛmɛ koko opandjudi okina onge l’etenyi kakɔ. Tolodjake diangɔ tɔ lo tapa ndo tonake dia anto mbeya kɛnɛ kasalayɛ. Yâla la ndjakimɛ. Ondo ekɔ kɔlɔ mbiviya lo dihole ɔtɔi, paka sɛkɔsɛkɔka. Naka onto halange sawola la yɛ, tshikande la loshilambo tshɛ ndo hemba tɛkɛta l’onto okina. Ɔnangɛso ɔmɔtshi akakahanya periodikɛ 90 lo ngɔndɔ ɔtɔi l’esambishelo ka l’ahole wakitshawɔ mituka, paka la shambu shɔ!

¹⁷ Anto amɔtshi ntshɔka lo dikambɔ dialongawɔ wa nyama dia tɔsɛnya asho, tɔkɛnya kana dia tɛngɔla l’anawɔ. Alama di’aha ndeka fukutanya awui wasalawɔ, yanga diaaso dimɔtshi dia mbâsambisha. Ɔnangɛso ɔmɔtshi akamɛ sawola l’olami w’ekambɔ kalongawɔ wa nyama ko akɛnyi dia onto akɔ akayakiyanyaka lo dikambo dia didjoyadjoya ndo dia nshi yayaye y’anande. Nde akamɛ mbeka la nde Bible, ndo wakekaka tena tshɛ l’ekambɔ kalongawɔ wa nyama.

¹⁸ Esambishelo ka lo Tshakitudi l’Ahole Wasondjawɔ Diangɔ: Kânga mbatodiongaka wolo dia sambisha lo yoho y’ɔlɔlɔ lo makashinyi la makashinyi la l’ahole wasondjawɔ diangɔ nɛ dia efukutanu watongaka lɛkɔ, apandjudi amɔtshi nyangaka waaso wa sambisha lo tshakitudi. Vɔ mbidjasɛka l’okala ɔmɔtshi ko sawolaka lo lɔngɛnyi la wanɛ wayemalaka dia mumuya. Naka anto wambɛnya saki, vɔ mbashaka kiatshikatshi kana periodikɛ aha la kotola yambalo y’anto akina ndo ndjatshutshuyaka dia mbɔsa tɛdikɔ dia mɛnana la wɔ nto. L’ɔkɔngɔ wa vɔ sambisha taahe tɔmɔtshi l’etenyi kɛmɔtshi ka ngelo kasondjawɔ diangɔ, ko vɔ sɛkɔ lo dihole dikina ko tosawola l’onto okina. Ekɔ mɛtɛ dia pombaka mbewɔ dia kotola yambalo y’anto akina lam’asambishaso lo tshakitudi lo yoho ya ngasɔ.

¹⁹ Lam’emulayɛ onto, tatɛ sawola la nde lo lɔngɛnyi. Naka ompokami ayɛ amboyasha lo sawo diakɔ, mbolande dimbola dimɔtshi ndo longande dimɛna lam’atɛkɛtande. Dja yimba dimɛna lo kɛnɛ katande. Ɛnyande dia wɛ mbɔsaka kanyi yande la nɛmɔ. Naka kokaka, tɛnde ɔnɛ wɛ mbetawɔka awui watande.

²⁰ Kadiyɛso kɛmɔtshi akasawola dimɛna efula la ekumanyi kɛmɔtshi ka omoto lam’akandate ɔnɛ lɔsɛnɔ laya wolo efula. Omoto akɔ akasuya mbala kakɔ ɔtɔi, ko sawo dia lɔ̂ka diakamɛ. Kadiyɛso akɔshi lokombo l’adrɛsɛ wa mama kakɔ ndo akatshu dia towenda l’atei a lomingu.

²¹ Esambishelo ka lo Makashinyi la Makashinyi: Mbilo ya tshumanelo dimɔtshi yekɔ ndo la wa kartie yolodi la makashinyi. Anangɛso wenda awui wa mbilo kokaka nɔngɔsɔla wa kartɛ paka lo dikambo di’ahole asɔ wasalema paka okanda oto. Vɔ wayɛnya hwe lo mbilo tshɛ yele la wa kartie ya ngasɔ ɔnɛ wa kɔmɛlɛsa mendamaka lânde. Lo mbilo kina, apandjudi kokaka menda ase makashinyi etena kakɔ kâmɛ la wanɛ wadjasɛ lawɔ. Dikumanyi kokaka nɔmba apandjudi wa tomanamana dia vɔ kindjakindjaka lo mbilo yakɔ ya wa kɔmɛlɛsa woho w’aha esambishelo ka lo makashinyi la makashinyi tshikala l’ɔkɔngɔ.

²² Naka wambokɔsɛngɔla dia kamba olimu ɔsɔ mbala ka ntondo, yoho y’ɔlɔlɔ ya wɛ ‘monga la dihonga’ ele ntshɔ ntondo lo makashinyi wa totshitshɛ; ko l’ɔkɔngɔ, lam’ayosalangana, ko wɛ ndjotshɔ lo wɛnɛ woleki weke. (1 Tes. 2:⁠2) Lam’atayasambisha lo makashinyi la makashinyi, lɔta oko onto lele lo losanganya lo Mbalasa ka Diolelo. Naka kokaka, ɔtɔ lo makashinyi etena kele bu kidiya kakongɛ dia vɔ mbosondja diangɔ. Mbola dia tɛkɛta la jɛra kana la kangawɔ. Onga la wangasanu, ndo djekoleko tɛkɛta lo hiembola. Aha tshima nɔmba dikimɔ. As’ekanda efula ndjashaka le kidiya ndo mbeyaka ɔnɛ wayowambola.

²³ L’ɔkɔngɔ wa wɛ mbisha kɔmɛlɛsa mɔyɔ, wɛ mbeyaka mbuta ɔnɛ: “Wa kɔmɛlɛsa wekɔ l’olimu efula ko ekɔ wolo dia mbâtana lawakawɔ; diɔ diakɔ dioyeso la ndjokenda l’olimu dia ndjokɛnya sawo dimɔtshi dia wɛ mbala, diasokoya onto lo nde kana yimba.” Lâsɔ ko wɛ mbisha kɔmatɛrɛ ɔtɔi kana hiende y’endana la periodikɛ yeke ka tomba.

²⁴ Naka wɛ la jɛra mbatɛkɛta, kete wɛ kokaka nto pemba mbuta ɔnɛ: “Sho mɛnaka dia wa kɔmɛlɛsa nangaka mbeya akambo efula. Numɛlɔ keke ka tomba ka Tshoto y’Etangelo (kana ka Réveillez-vous!) kekɔ la sawo dimɔtshi di’endana l’onto l’onto l’atei asɔ.” Lembetshiya kɛnɛ katawɔ lɔkɔ ko wɛ ndihiya wate: “Sho mbetawɔka dia wɛ ayɔngɛnangɛna diala.”

²⁵ Naka as’olimu wekɔ ndo wɛ mɛnaka ɔnɛ sunganaka, kete wɛ kokaka mbutɛ jɛra nto ɔnɛ: “Onde wɛ ayolanga dia dimi mɛnya ndo as’olimu ayɛ periodikɛ kakɔ lo tshena pe?” Naka nde ambetawɔ, tohɛke dia wɛ akôlaki dia tɛkɛta lo hiembola, ndo jɛra ayolongamɛ dia wɛ nɛnya ɛtɛkɛta ayɛ. Naka as’olimu nangaka sawola efula, kete ndeka dimɛna wɛ ntshɔ dia towaenda lawakawɔ.

²⁶ Atete ndoko edja, l’osomba ɔmɔtshi wa tshitshɛ, apandjudi wakatshindɛ omendji w’otshimbedi l’olimu wa lo makashinyi la makashinyi. L’etatelo, amɔtshi waki la wɔma, nɛ dia vɔ watasalaka olimu ɔsɔ; koko kem’edja, vɔ wakasalangana ndo wakoke ɔlɔ lɔkɔ. Ntondo k’oshidi a tango koka, vɔ wakasawola l’anto 37 ndo wakakahanya periodikɛ 24 la tobukubuku 4. Ɔnangɛso ɔmɔtshi akate ɔnɛ lo wonya w’ɔlɔlɔ hatohomana l’anto efula nganɛ lo soko la soko lo ngɔndɔ oko akawasale lo makashinyi la makashinyi lo tshenyi ya wonya.

²⁷ Toyange Waaso wa Sambisha: Yeso kosambishaka paka l’etena kakandalɔngɔsɔla keto. Nde akadianganya lokumu l’ɔlɔlɔ etena tshɛ kakasunganaka. (Mat. 9:9; Luka 19:​1-10; Joa. 4:​6-15) Enda woho wayanga apandjudi waaso wa sambisha.

²⁸ Amɔtshi mongaka la mbekelo ka sambishaka ambutshi wakongɛ anawɔ oma lo kalasa. Lam’ele ambutshi amɔtshi komaka lɛkɔ taahe kânga 20 la ntondo, vɔ wekɔ l’etena ka sawola sawo dimɔtshi dia dimɛna efula dia lo Bible.

²⁹ Ambatshi mboka efula salaka tshɛ dia sawola l’anto w’endana mɛtɛ l’asawo amɔtshi wele lo periodikɛ yaso. Oko ɛnyɛlɔ, kadiyɛso kɛmɔtshi akakondja etombelo w’ɛlɔlɔ lam’akandakindola lo ekɔlɛ esamalo waki lo mbilo k’etshumanelo kande dia towaɛnya sawo diele l’ɔtɛ a dui w’ɔnɛ: “Kalasa Yambofukutana,” diakatombe lo Réveillez-vous! wa Diɛla Woke 22, 1995. Nde akɛmbɛ ndo wa periodikɛ y’endana la lɔsɛnɔ la nkumbo ndo l’ɔtɔmbɔkwɛlɔ w’ana lɛnɛ akambawɔ elimu wa kimanyiya anto, ndo waketawɔ dia nde nyomela numɛlɔ kina yatɛkɛta asawo wa woho ɔsɔ. Ate nde “atɛnaka” diakandatɛna lo bilɔ kɔsawɔ anto l’olimu lam’akandatshu la Réveillez-vous! w’Asase a Ndjoko 8, 1996 wata di’elimu hɛnɛ.

³⁰ Omendji ɔmɔtshi wa distrikɛ ekɔ lo kɔndɔla ate nde sambishaka lo tshakitudi tena efula la wadiɛnde lam’ataweteta l’akambo awɔ. Vɔ sɔnaka etena kele anto bu efula lo makashinyi ndo kateteta wa kidiya ɔkɔkɛ ɔkɔkɛ lo tɔsɛsɛ. Vɔ sawolaka l’anto asawo efula wakotola yambalo.

³¹ Apandjudi efula kondjaka etombelo w’ɛlɔlɔ lam’asambishawɔ l’ahole wakongɛ wa kidiya lo mashinyi wasola ahɔndɔ. Vɔ hawotshike periodikɛ naka onto bu. Oyango awɔ ele mbewoya anto lokumu l’ɔlɔlɔ; lâsɔ vɔ salaka tshɛ dia vamɛ tɛkɛta la wa kidiya yakaye lo mashinyi akɔ.

³² L’ahole amɔtshi, apandjudi wakasɔnama wekɔ la lotshungɔ la sambisha l’asɛkɛ wa ndɛkɛ. Tena dimɔtshi vɔ wakonge l’ɔlɔ dia sawola l’anto watɛngɔla l’andja w’otondo ndo wadjasɛ lo wedja wele bu Ɛmɛnyi wa Jehowa efula. Lam’ɛnya anto asɔ saki, vɔ mbashaka kiatshikatshi kana wa periodikɛ.

³³ Naka hakoke, lo mbilo k’etshumanelo, dia sambisha wanɛ wafutɛ lo mvudu ya weke yahɔtɔ anto wɔ̂tɔtɔ, apandjudi amɔtshi wakɔshi mbekelo ka sambishaka wa sɛtɛdi yele l’olimu la yewo kana tɔjɛra lo bilɔ yawɔ. Vɔ salaka woho akɔ wamɛ ndo lo nkombo yakana ya weke weke ndo yalamema. Omendji ɔmɔtshi w’otshimbedi akayele yoho shɔ lo mvudu esambele nde l’apandjudi amɔtshi. Tena tshɛ, vɔ wakalembetshiyaka jɛra ɔnɛ naka hawolange vɔ mɛnana la wanɛ wafutɛ oko okowashimbaka nshi tshɛ, vɔ hawolange mbâdima awui wele lo numɛlɔ ya komelo ya periodikɛ yaso. Tɔjɛra ta mvudu esambele takalongola periodikɛ l’ɔngɛnɔngɛnɔ ndo wakalɔmbɛ dia kondja numɛlɔ yayela!

³⁴ Toyatshutshuya dia Sambisha Dihole Tshɛ: Dia lɔsɛnɔ laso mbɔtɔnɛ la ndjakimɔ kaso ka la tshondo le Nzambi, sho pombaka mbeya ɔnɛ ɔkɛndɛ wakawatosha wa sambisha losango la Diolelo ekɔ ohomba efula. Naka sho nangaka sambisha anto lo etena kasungana le wɔ, kete tambohomba ndjadima kɛnɛ kolekiso nanga “dia nshimbela amotshi [lo woho tshɛ, NW].” Ekambi tshɛ wa Jehowa wakayakimɔ ndo wakabatizama kombolaka nyomota ɛtɛkɛta wa Paulo wakandate ate: “Dimi latutshaka akambu tshe ne dia lukumu l’ololo, dia dimi nkundja [l’akina ɛlɔlɔ wa lɔkɔ, NW].”​—⁠1 Kor. 9:​22, 23.

³⁵ Paulo akayofunda l’ɔkɔngɔ ate: “Okone dimi layuyatumbula lu wodu ami la ongenongeno efula, ne dia wulu a Kristu ankhukhume. . . . ne dia lam’emi wodu kemi la wulu.” (2 Kor. 12:​9, 10) Mbuta ate, ndoko onto l’atei aso lakoka kamba olimu ɔsɔ oma lo weolo ande ndamɛ. Sho pombaka nɔmba Jehowa dia kondja wolo wa nyuma kande k’ekila. Naka tayɔlɔmba Nzambi wolo, kete tayonga l’eshikikelo ɔnɛ nde ayokadimola lo alɔmbɛlɔ aso. Lâsɔ, ngandji kokaso akina ayototshutshuya dia sho nyanga waaso wa mbâsambisha lokumu l’ɔlɔlɔ l’ahole wewɔ. Bonde kahatahembe kamba la kanyi mɔtshi yotoshawɔ lo dikatshi nɛ di’okotsha lomingu layaye na?