Vɔ Nɔmbaka Efula oma le Wanɛ Wakawasha Efula
1 Ande diɛsɛ dia mbeya akambo a mɛtɛ lee! Oko wakatayakimɔ le Jehowa, ‘takalongola lotumu la lokumu l’ɔlɔlɔ.’ (1 Tes. 2:4.) Dikambo sɔ toshaka ɔkɛndɛ w’ohomba. Yeso akate ate: “Ɔnɛ lakawasha efula, wayoohika efula.”—Luka 12:48b, Dyookaneelo dy’oyoyo.
2 Ɛtɛkɛta ɛsɔ wekɔ mɛtɛ! Sho tshɛ tekɔ lo kondja wahɔ oma l’ewɔ ka Dui dia Nzambi, oma lo diokanelo di’oshika lam’asaso l’anangɛso ndo l’elongamelo ka dimɛna efula. Diɔ diakɔ diakokawɔ tɔlɔmba efula.
3 Tɛ̂nake Ɛkɛndɛ Aso la Sso di’Ɔlɔlɔ: Anto amɔtshi kanaka ɔnɛ vɔ mbalɔmbaka efula kamboleka. Yeso Kristo, ɔnɛ lele Owandji w’etshumanelo k’Akristo, shikikɛka ‘kɛnɛ kele ohomba’ dia tɔ kɛndakɛnda dimɛna. (Ef. 4:15, 16) Nde toshikikɛka ɔnɛ ‘lɔkɔhɔ lande lekɔ wɔdu ndo oshikɔ ande wekɔ osadi.’ (Mat. 11:28-30) Oma lo ngandji kande nde mbokaka wanɛ wokimame kɛtshi. (Luka 21:1-4) Tayɔtshɔkwama naka sho ndjasha tshɛ, oyadi lo yɛdikɔ yakɔna tshɛ.—Kol. 3:23, 24.
4 Toyambole ɔnɛ: ‘Onde dimi mbidjaka Diolelo lo dihole dia ntondo lo lɔsɛnɔ lami? Onde dimi kambaka la wenya ami ndo la diangɔ diami dia tombola lokombo la Nzambi ndo lo wahɔ w’anto akina? Onde dimi ndekaka ngɛnangɛna dia kambɛ Jehowa kana dia ndjangɛnyangɛnya la diangɔ dia l’emunyi? Lam’ayotokadimola lo wembola ɛsɔ l’otema ɔtɔi, tayɛnya tokanyi tele l’etema aso.—Luka 6:45.
5 Tatɔkɔke l’Ohemba wa Sala Kɔlɔ: Ehemba ndo awui watshutshuya onto dia nde monga la lokaki, la mposa k’okundji ndo dia nde nanga ɛngɛnɔngɛnɔ wa demba, wamboleka ndjâla nshi nyɛ lo yɛdikɔ yahatayalaka ndoko lushi. Lushi la lushi, lɔkɛwɔ laso l’ɔlɔlɔ lekɔ lo mbidjama l’ehemba, ndo sho kokaka pembama dia sala kɛnɛ kele ɔlɔlɔ. Dia sho tondoya ekakatanu ɛsɔ, sho pombaka nɔmbaka Jehowa dia nde tokimanyiya. (Mat. 26:41) Nde kokaka tokeketsha oma l’ekimanyielo ka nyuma kande. (Is. 40:29) Walelo wa Bible wa lushi la lushi mbishaka ekimanyielo k’efula (Osam. 1:2, 3) Ndjaekiya ndo ndjakimɛ ekɔ nto ohomba efula.—1 Kor. 9:27.
6 Hatohombe nanga paka kɛnɛ kele ɔlɔlɔ keto, koko sho pombaka petsha ndo kɛnɛ kele kɔlɔ. (Osam. 97:10) Dikambo sɔ nembetshiyaka ɔnɛ hatohombe monga la saki ka sala akambo wa kɔlɔ. Tukedi 6:19 mbutaka akambo esambele wahetsha Jehowa. Mɛtɛ, ɔnɛ lalanga ngɛnyangɛnya Jehowa, pombaka petsha akambo asɔ ndo nde lawɔ. Lam’ele tekɔ la diɛsɛ dia kondja ewo k’oshika k’akambo wa mɛtɛ, sho pombaka monga la saki ka ndjaɔtɔnganyiya la ewo kɛsɔ, lo shikikɛka tokanyi taso l’akambo w’ɛlɔlɔ.
7 Ekɔ ɔlɔlɔ nɔmbaka dia lɔsɛnɔ laso tosha diaaso dia sho mongaka “nshi tshɛ la lotumu efula l’olimu wa Nkumadiɔndjɔ.” (1 Kor. 15:58) Anto efula wamboshilaka mɛna ɔnɛ ekongelo koludi la wenya efula l’olimu wa Jehowa ekɔ tshondo y’ekokelo, nɛ dia tɔ hasha onto tena efula dia nde ndjasha l’akambo wele kema ohomba.
8 Lo menda kɛnɛ tshɛ kambotɔtɛkɛta, kɛnɛ katɔlɔmba Jehowa sunganaka efula. (Mika 6:8) Tekɔ l’ɛkɔkɔ tshɛ wa ndjâla la lowando l’ɔtɛ wa diɛsɛ tshɛ di’olimu. (Ef. 5:20) Tatɛ oma kakianɛ tekɔ lo tetemala la ‘kamba olimu efula ndo la ndɔsha,’ tayashikikɛ ɔnɛ difuto diaso diayoleka kɛnɛ tshɛ katɔlɔmbawɔ la fwa.—1 Tim. 4:10.