Tolongolake Anto lo Sanganya
1 Yeso Kristo, Ɛnyɛlɔ kaso, akalongolaka anto. Nde akelɛ anto la ngandji tshɛ ate: “Nyuyi le mi, nyu tshe watukambaka ndu weli la wetshu wa wulu, ku dimi layunyusha mumuya.” (Mat. 11:28) Eelo, Yeso Kristo aki kiɔkɔ y’ekeketshelo le wanɛ tshɛ wakayaka le nde. Kânga atshi wa pɛkato ya mamba wakakotwamaka oya le nde. Ɔkɔndɔ wele lo Makɔ 2:15 (NW) mbutaka ɔnɛ: “Ko lam’akawadjasɛ la mɛsa lo luudu lande, ndo anongodi w’elambo efula l’atshi wa pɛkato wakadjasɛ kâmɛ la Yeso l’ambeki ande, nɛ dia vɔ waki efula, ko wakatatɛ mboyela.”—Enda ndo lo Luka 7:36-38.
2 Lo Romo 15:7 sho tanaka dako nɛ: “Okone nyulungwani uku akanyulungula Kristu dia ntumbula [Nzambi, NW].” Lam’ayelaso ɛnyɛlɔ ka Yeso, lo nongolaka anto tshɛ wayanga akambo wa mɛtɛ oya l’atei w’etshumanelo, oyadi lo kabila kakɔna kewɔ, oyadi l’ɔtɛmwɛlɔ akɔna wewɔ, oyadi dihole diakɔna diele lawɔ lo tshunda kana diewo dia mukanda diele lawɔ, sho tombolaka Nzambi. Sho mbishaka wanɛ walongolaso kanyi ya shikaa lo dikambo dia Jehowa Nzambi.
3 L’ɛnyɛlɔ ka Kristo, sho nangaka nongola anto waya mbala ka ntondo lo Mbalasa ka Diolelo la wangasanu tshɛ kâmɛ ndo ambetshi a mboka waya dia ndjotenda. Onde wɛ ambombolaka opandjudi okina lushi lɔmɔtshi ɔnɛ: “Onto ongo ende na? Onde Ɔmɛnyi mbende?” Onde hatoleka dimɛna wɛ sukana otsha le nde ko towombola? Dikambo sɔ kema wolo naka sho mbohɔka ɔnɛ kɛnɛ koleki ohomba ele dia ndjasha le anto akina.—Etsha 20:35.
4 Woho wa Ndjasha le Eyoyo: Yalowola, ndo mbola oyoyo wembola ɛmɔtshi wa ngandji oko: Lende adjasɛnde? Onde nde amboyaka lo Mbalasa ka Diolelo? Woho akɔna wakandaye? Lam’ayashawɔ ɔsɔku le eyoyo, anangɛso l’akadiyɛso wakakondja anto waki kombekaka Bible oma l’atei w’ampokami lo Mbalasa ka Diolelo, ndo wakatatɛ mbeka l’anto akɔ Bible.
5 Naka sho tshikɛ eyoyo diaaso dia vɔ mbuta kɛnɛ kele lawɔ l’otema, kete wayoyaoka dia tambalongola dimɛna ndo wayɛna dia sho ndjashaka le wɔ l’otema ɔtɔi. Sho kokaka mbalembetshiya oyango wa sanganya yaso yotshikitanyi ndo woho wasalemayɔ. Tɛkɛta dia woho wafundama ekanda aso ndo woho wakambaso olimu aso. Woho wayashaso l’otema ɔtɔi le wɔ mbeyaka mbakonya lo vɔ tɛmɔla Nzambi, wata vɔate: “[Nzambi, NW] eko l’atei anyu mete.”—1 Kor. 14:25.
6 Oma lo diki diawɔ, anto amɔtshi mbokaka wolo tɛkɛtsha oyoyo dia mbotɛ dikambo. Koko, tôhɔ dia sho pombaka mbokoya Kristo lo ndjâla kiɔkɔ y’ekeketshelo le anto akina. Naka sho nangaka mbokoya Kristo mɛtɛ, kete Jehowa ayotosha osukɔ wa nyuma kande. Koko, “[Nzambi, NW] kuntusha utema a woma, keli ndi akatusha utema a wulu la wa ngandji ndu wa ndjakimela.” Eelo, nyuma ka Nzambi kokaka tolodia la dihonga ndo la ngandji dia takula nna dia ntondo dia tɛkɛtsha oyoyo.—2 Tim. 1:7.
7 Ɔnkɔnɛ, tokoya Kristo lo nongolaka anto w’eyoyo waya lo sanganya yaso. Takimanyiya di’aha vɔ ndjaoka oko angɛndangɛnda l’atei aso. Lo salaka ɔsɔku, sho tayotombolaka Jehowa, nde ɔnɛ lalongola wanɛ tshɛ waya dia ndjɔ̂tɛmɔla l’‘okongo ande w’ekila’ lo tshimbo y’ɔnande.—Is. 56:6, 7.