Onde Wɛ Sukɛka Olimu wa Diolelo la Kɔlamelo Tshɛ?

¹ Lo asawo ayɔ wa wekelo, Tshoto y’Etangelo ya Diɛla Woke 1, 1994 (lo Falase) akatohola ɛkɛndɛ aso w’endana l’ɔtɛmwɛlɔ a pudipudi wa Jehowa. Wakate lo sawo sɔ ɔnɛ ɔtɛmwɛlɔ wa Jehowa la olimu wa Diolelo pombaka mbidjama lo dihole dia ntondo lo lɔsɛnɔ laso. L’ɛtɛkɛta ekina, sho pombaka sukɛ olimu wakawatosha la kɔlamelo tshɛ lo kimɔka kɛnɛ tshɛ kele laso.

² Diɔ diakɔ diɔsa ɔlɔngɔswamelo waki Jehowa tɛdikɔ tshɛ t’ohomba dia mbudiya ɔtɛmwɛlɔ lo kɛtɛ k’otondo. Lo yɛdikɔ yakɔna yasukɛso tɛdikɔ tɔsɔ, shoamɛ kana oko etshumanelo? Anangɛso w’ase Filipi wakatotshikɛ ɛnyɛlɔ ka dimɛna efula ka sho mbokoya. Mɛtɛ, ɔpɔstɔlɔ Paulo akawândola lo woho wakawashaka lonya dia lokumu l’ɔlɔlɔ ntshɔ otsha la ntondo, ndo nde akasha Nzambi losaka lo dikambo sɔ. Aha paka l’ɔnɛ vɔamɛmɛ wakasambishaka, koko vɔ wakakimanyiyaka Paulo la diangɔ dia l’emunyi la Akristo akina ondo, wakasukɛka esambishelo ka lokumu l’ɔlɔlɔ lo yoho shɔ la kɔlamelo tshɛ. Onde anto akina kokaka mbuta ɔsɔku lo dikambo diaso shoamɛ kana dia etshumanelo kaso?​—⁠Fil. 1:​3-5; 4:​16-18.

³ Lo mbilo kaso, anangɛso l’akadiyɛso wekɔ lo kamba la kɔlamelo tshɛ lo wokelo ndo l’ɔlɔngɔswɛlɔ wa mvudu yaso ya filialɛ. Amɔtshi a l’atei awɔ wakaye oma lo wedja w’etale dia sukɛ oyango ɔsɔ. Ambeta ngɔndɔ hiende, mbambodihwama Kalasa k’Olowanyelo w’Ekambi (Ecole de formation ministérielle) ndo anangɛso 26 wa lo kalasa ka ntondo wakakondja tumu yawɔ. Akina pombaka tatɛ ndo wayoya oma lo tenyi dia kɛtɛ efula dia ndjolowanyema la Kinshasa. Oko okokiso dieya, dikambo sɔ nemanɛka l’otondjelo wa falanga efula dia futɛ ambeki l’embetsha mboka, mbahangia ndo mbalesha.

⁴ Kɔmite ya diɔtɔnwɛlɔ la wa pitadi y’oma la ndowanyema ndo yɔ kokaka tokimanyiya etena kayototanema la ntondo ka dikambo dia kaloya dikila. Olimu ɔsɔ hatshu otsha la ntondo naka falanga hatombi. Tena dimɔtshi, omendji w’otshimbedi aso mbeyaka tɔlɔmba dia sho kaloya tshenyi mɔtshi ya dikuta. Ngande wayotota na? Onde tayota ɔnɛ wekɔ lo tɔlɔmba efula? Kana tayoyashikikɛ dia kahana ɔngɛnɔngɛnɔ naka sho mombaka yema mɔtshi ya diangɔ diaso dia l’emunyi tena la tena l’oyango wa sukɛ ɔtɛmwɛlɔ wa mɛtɛ ndo kimanyiya wanɛ wasungana kimanyiyama? (Enda lo 1 Koreto 16:​1, 2.) Sanganya ya ndjihelo ya Kalasa k’Olimu wa Diolelo (Ecole du ministère du Royaume) yekɔ lo salema ndo lo dikambo di’olowanyelo wa dikumanyi diaso la ekambi aso w’olimu, wanɛ wayokoka kokɛ anima aso oma lo dikambo sɔ. Tokanyiya nto di’ɛlɔngɔswɛlɔ aso ndo osalelo wa sanganya yaso ya distrikɛ “Totombole Nzambi l’Ɔngɛnɔngɛnɔ.” Sho nangaka mbidja akambo asɔ tshɛ l’ɔnɔngɔ dikambo dia sanganya shɔ lo kimɔka wenya aso, weolo aso ndo ekundji aso dia yɔ mbeta dimɛna.

⁵ Jehowa mbele ɛnyɛlɔ koleki ɔlɔlɔ ka lokaho, nɛ dia aha paka l’ɔnɛ nde akasha anto “lumu, luwi, la diango tshe,” (Etsha 17:25) koko nde akakimɔ Ɔn’ande ɛtɔi di’ɔlɔlɔ aso ndo nde ekɔ lo tɔngɔnya la weoho tshɛ wa weshasha. Oko wende Otungi, Jehowa mbakanga diangɔ tshɛ. Omalɔkɔ, onto lakimɔ oshasha wa l’emunyi lo dikambo dia tɔla ɔtɛmwɛlɔ wa mɛtɛ otsha la ntondo ekɔ paka lo kaloyɛ Nzambi yema ya kɛnɛ kakandalongola oma le nde l’etatelo.​—⁠2 Kor. 9:​10-15; Osam. 50:10; 1 Ek. 29:⁠14.

⁶ Osukelo aso w’olimu la kɔlamelo tshɛ hahembetɛ lo diangɔ dia l’emunyi to. Sho kokaka kimɔ ɛngɔ kɛmɔtshi koleki oshasha wa falanga kana wa diangɔ dia l’emunyi ohomba efula. Sho kondjaka ɔngɛnɔngɛnɔ efula lam’akimɔso wenya aso ndo akoka aso dia keketsha anto akina lo lomba ndo lo nyuma. Oshasha woleki woke wokokiso mbisha onto ele wa mbokimanyiya dia nde shihodia Dui dia Nzambi, nɛ dia dikambo sɔ kokaka mbokonya lo lɔsɛnɔ la pondjo. Ele l’ɔtɛ w’akambo asɔ mbɔsami tɛdikɔ tshɛ tomiso la tɛkɛta. Katendake Tshoto y’Etangelo ya Diɛla Woke 1, 1994 (lo Falase) tena la tena ndo tokanake lomba lo woho wokokiso shoamɛ kamba la kɛnɛ kakawatohola lɔkɔ dia salaka. Dikambo sɔ diayotokimanyiya dia sho mɛna lo yɛdikɔ yakɔna yasukɛso olimu wa Diolelo, oyadi l’etshumanelo kaso kana l’andja w’otondo.​—⁠Joa. 6:​26, 27; 17:3; Etsha 20:35; Eny. 22:⁠17.