Tokeketshake Anto
1 Oko wasɛnaso lo “tena dia wulu,” sho tshɛ tekɔ l’ohomba w’ekeketshelo. (2 Tim. 3:1) Oko wakandashile la mboka ohomba ɔsɔ oma ko nshi yande, Paulo akasalaka tshɛ dia mbetɛ ahoma ande kâmɛ l’anango oko diaaso ‘dia vɔ keketshana.’ Nde akâlɔmbɛ dia vɔ ‘ndjela akambo wakoka mbakeketsha lam’asawɔ.’ (Romo 1:11, 12; 14:19.) Weolo ɛsɔ ‘akakeketsha etema w’ambeki, akâkɔkɔmiya dia tshikala lo mbetawɔ.’ (Etsha 14:22) Tekɔ l’ohomba efula w’ekeketshelo ka ngasɔ ɛlɔ kɛnɛ.
2 Ɛtɛkɛta aso mbeyaka keketsha akina ndo, tɛkɛta la yimba, ele “uku elua wa paunyi lu asangu wa fesa.” (Tuk. 25:11) Lam’ashaso kɔmatɛrɛ lo nsanganya, sho ‘keketshanaka lam’asaso.’ (Heb. 10:25) Ekɔ dimɛna kamba la lolemi laso dia kɔndɔla akambo wakatɛnyi l’esambishelo, mandola onto kana kɛtshanya akambo wa lo nyuma. Tɛkɛta ɔsɔku ‘ekɔ ɔlɔlɔ dia keketsha, ndo mbelaka wanɛ watolonga dikambo dimɔtshi diele la wâhɔ le wɔ.’—Ef. 4:29.
3 Tɔtɛkɛtake Akambo Wakeketsha Anto: Lo Filipi 4:8, Paulo akasha alako w’eshika wɛnya woho wa kamba ɔlɔlɔ l’ɔtɛkɛta: mbidja yambalo yaso lo dikambo tshɛ diele mɛtɛ ndo la kɛnɛmɔ, dikambo tshɛ di’osembwe, dia pudipudi ndo dimɛna, dikambo tshɛ diele la lokumu l’ɔlɔlɔ, diele ɔlɔlɔ ndo diandɔlama. Sho kokaka ndjashikikɛ ɔnɛ kɛnɛ kataso kekɔ mɛtɛ ndo keketshaka anto naka tɔ ndja oma lo Dui dia Nzambi. (Joa. 17:17) Ndjâkimɔ kaso le Nzambi, kɛnɛ kekaso lo nsanganya ya l’etshumanelo, ohetoheto wele laso l’olimu w’esambishelo ndo akambo akina wa woho ɔsɔ wekɔ la kɛnɛmɔ. Asawo w’endana la adjango ndo l’ɛlɛmbɛ wa lo Dui dia Nzambi ayotokimanyiya mɛtɛ dia sho koma ‘etshundju lo dikambo dia panda.’ (2 Tim. 3:15) Tɛnya lowando laso lo lɔkɛwɔ l’ɔlɔlɔ l’anto wele l’ɔlɔngɔswamelo wa pudipudi waki Jehowa. Tândole etsha w’ɔlɔlɔ wa diambo w’anangɛso. (Joa. 13:34, 35) L’atei w’akambo wele la lokumu l’ɔlɔlɔ sho tanaka ndo waonga w’ɛlɔlɔ w’Akristo oko mbetawɔ, ɔngɛnɔngɛnɔ, ki, ndjâkimɛ, waonga wɛnama le anangɛso. Sawola l’akambo aso w’ɛlɔlɔ ndo wandolama ekɔ ‘ɔlɔlɔ, dia keketsha’ anto akina.—Romo 15:2.
4 Ekɔ lonyangu dia pomanaka nshi tshɛ l’esukusuku wa l’andja ɔnɛ. Ande dimɛna tshika akambo asɔ dia kondja ɛlɔlɔ watomba oma lo ngandji k’onto l’ɔnango lee! Tena di’ɔlɔlɔ dietshaso kâmɛ ekɔ ɛngɔ k’oshinga a wolo kahombaso ngɛnangɛna efula. Naka tayokeketshanaka nshi tshɛ, kete anto akina koka mbuta lo dikambo diaso ɔnɛ: ‘Vɔ wakakeketsha yimba yami.’—1 Kor. 16:18.