Tewoya Lokumu L’ɔlɔlɔ Aha La Mpekɔ
1 Akristo wa ntondo wakɔsaka olimu awɔ la nɛmɔ di’efula. Luka ekɔ lo kɔndɔla ate: “Lushi la lushi lo tɛmpɛlɔ ndo lo luudu la luudu, vɔ kompekɔ mbetsha ndo mbewoya anto lokumu l’ɔlɔlɔ lo dikambo dia Kristo, Yeso.” (Etsha 5:42, NW) Ndoko kakakoke mbashimba, oyadi kânga ɔhɛnyɔhɛnyɔ! (Etsha 8:4) Vɔ wakalakanyaka anto akambo wa mɛtɛ nshi tshɛ.
2 Ko sho ngande? Toyambole ɔnɛ: ‘Onde dimi mbeyaka dia wonya aya bu efula? Onde dimi lekɔ suke dia mbewoya lokumu l’ɔlɔlɔ aha la mpekɔ?’
3 Vɔ Sambishaka aha la Mpekɔ: Kadiyɛso kɛmɔtshi kaki la hemɔ ka lokata akadjama lo poumon d’acier (mashinyi wakimanyiya ose hemɔ dia nde pɛnga dimɛna). Nde kokokaka ntshɔ lo Mbalasa ka Diolelo kana l’assemblée. Koko nde akewoyaka lokumu l’ɔlɔlɔ wonya tshɛ. L’edja k’ɛnɔnyi 37 wakandônge lo mashinyi ɔsɔ, nde akakimanyiya anto 17 lo vɔ mbeka mɛtɛ! Ngande wakandasale na? Kânga mbakinde kokokaka ntshɔ lo soko la soko, nde aki la diaaso dia sambishaka wanɛ wakɛnanaka la nde lo tshakitudi.
4 Anangɛso wa la Bosnie wakahombe ntokomɛ ta la ahombo wa l’emunyi. Koko vɔ wekɔ lo tetemala la sambisha. La Sarajevo, apandjudi mbetshaka, lo yɛdikɔ ya l’atei atei, wenya 20 lo ngɔndɔ la tɛkɛta dikambo dia lokumu l’ɔlɔlɔ, ndo onto l’onto mbekaka l’anto ahende Bible. Kânga mbewɔ lo pâ, vɔ sambishaka ndo ndakanyaka aha la mpekɔ.
5 Ɛlɔngɔlɔngɔ lawɔ wekɔ l’etete l’olimu. Lo Rwanda, wakatɔlɛ nkumbo kɛmɔtshi k’Ɛmɛnyi lo luudu lɔmɔtshi lakayalɔngɔsɔla asɔlayi dia mbâdiaka. Nkumbo kakɔ akalɔmbɛ dikimɔ dia tokotalɔmbi. Wakawasha dikimɔ, ko Deborah, yana ya yimato, akalɔmbɛ la dui dia wolo ate: “Jehowa, lomingu lɔnɛ, dimi la Papa takatshikɛ anto periodikɛ tshanu. Ngande wayotokalola la tenda anto asɔ dia mbâlakanya mɛtɛ ndo mbâkimanyiya dia vɔ kondja lɔsɛnɔ na?” Oma lo mbetawɔ kawɔ ka wolo ndo lo ngandji kawɔ k’olimu, nkumbo k’otondo kakake.
6 Lo nshi yaso nyɛ, ekɔ ohomba mbidja yimba lo waaso tshɛ wa sambisha ndo nyanga wanɛ “wasungana kondja lɔsɛnɔ la pondjo.” (Etsha 13:48, NW) Lo ndjela akambo weta lo ngelo kawɔ, dikumanyi dia l’etshumanelo nɔngɔsɔlaka randevu w’esambishelo lo tena diasungana le anto tshɛ, oyadi la pindju, l’ɔkɔngɔ a midi kana la dikɔlɔ. Asawo wa l’Olimu Aso wa Diolelo kâmɛ la asawo wasalema lo losanganya l’olimu, nsanganya y’otshimbedi la ya distrikɛ ekɔ tshɛ waaso wa kondja tokanyi ndo ekeketshelo w’endana la toho totshikitanyi t’esambishelo. Ndo nto, omendji w’otshimbedi la wa distrikɛ ndakanyaka apandjudi esambishelo ka l’ɛsɛsɛ, mbaɛnyaka woho wa sambisha lo kartiye y’amundji w’ekanda ndo kotolaka yambalo lo toho tokina ta sambisha lɛnɛ atanema anto. Kɛsɔ tshɛ tôholaka ɔnɛ sho la dia mbewoya lokumu l’ɔlɔlɔ aha la mpekɔ.
7 Apɔstɔlɔ wa Yeso wakate la dihonga tshɛ vate: “Hatokoke tshika mbuta awui wakatɛnyi ndo wakatoke.” Ngande wakawakoke tetemala kânga mbaki wekamu efula na? Vɔ wakayange ekimanyielo ka Jehowa, ndo nde akawashatɔ, ɔnkɔnɛ “vɔ tshɛ wakalodiama la nyuma k’ekila, ndo wakataka dui dia Nzambi la dihonga.” (Etsha 4:20, 29, 31, NW) Aha onto tshɛ mbele l’ɔngɛnɔngɛnɔ wa mɛna akambo w’ɛlɔlɔ l’olimu, koko naka sho nangaka mɛtɛ mbewoya lokumu l’ɔlɔlɔ aha la mpekɔ ndo naka sho ndjatshutshuya dia salaka ɔsɔku lushi tshɛ, kete Jehowa ayotokimanyiya.