Ngande wayowoka?
1. Lande na kakoka olimu w’esambishelo monga wolo ndo lande na kahombaso tetemala l’olimu akɔ?
1 Oko wayaleke sukana lushi la Jehowa, ekɔ ohomba efula dia sho kimanyiya anto efula dia vɔ kondja ewo ka mɛtɛ kaki Nzambi ndo ka sangwelo diakinde diendana la anto. (Joa. 17:3; 2 Pet. 3:9, 10) Tena dimɔtshi, dikambo sɔ mbeyaka monga wolo nɛ dia anto efula wekɔ la wendjodi ndo vɔ tɔ̂nyɔlaka l’ɔtɛ w’olimu aso w’esambishelo. (2 Pet. 3:3, 4) Koko tekɔ la ɛkɔkɔ wa mbetawɔ ɔnɛ tâkakoke tana anto wayetawɔ lokumu l’ɔlɔlɔ l’ɛtshi kaso ka nkɛtɛ naka vɔ lioka. Ngande wayokoka anto asɔ mboka naka onto ɔmɔtshi hatshwe dia tâsambisha?—Romo 10:14, 15.
2. Ngande watokeketsha ɛnyɛlɔ kaki ɔpɔstɔlɔ Paulo?
2 La ntondo k’ɔlɔshamelo: Lam’ele anto efula kombolaka mpokamɛ losango la Diolelo diaki Nzambi, sho hatohombe nkɔmɔ. Filipi mbaki osomba wa ntondo wa l’Erɔpɛ wakoke esambishelo ka lokumu l’ɔlɔlɔ laki Paulo. Etena kakawɔsɔngwɛ awui wa kashi nde la Silasi, vɔ akɔ ahende wakakɔmama eshingɔ ndo wakadjama lo lokanu. (Etsha 16:16-24) Koko dikɔmɔki sɔ koshimba Paulo dia tetemala sambisha. Etena kakandembola ase Tɛsalɔnika, osomba wa hende wakandatshu lo lɔkɛndɔ lande la misiɔnɛrɛ, nde ‘akakondja dihonga oma le Nzambi.’ (1 Tes. 2:2) Shi ɛnyɛlɔ kaki Paulo tɛnyaka ɛkɔkɔ ‘wahatahombe mpekɔ’?—Ngal. 6:9.
3. Kakɔna kakoka ndjokonya anto amɔtshi waki kombetawɔka losango laso dia vɔ ndjolietawɔ?
3 Anto efula wakatone dia tohokamɛ l’edja k’ɛnɔnyi efula wakayotshikitanyaka dionga diawɔ lo kɛnɛ kendana la losango laso. Ondo ekakatanu wendana la ekondjelo, hemɔ, nyɔi k’ose nkumbo ɔmɔtshi ndo alapɔlɔ wa kandji w’awui weta l’andja ɔnɛ mbakayatshutshuyaka dia sala etshikitanu ɛsɔ. (1 Kor. 7:31) Amɔtshi wele ambutshi awɔ wakâshimbaka dia mpokamɛ losango laso wamboyokoma epalanga ndo wetawɔ dia lihokamɛ. Woho watetemalaso sambisha amboyokonya dia anto asɔ monga la diaaso dia vɔ ‘tɛndɛ lokombo laki Jehowa’ kam’ekende suke.—Romo 10:13.
4. Kakɔna katotshutshuya dia sho tetemala la olimu aso ‘aha la mpekɔ’?
4 ‘Aha la mpekɔ’: Ngandji kokaso Nzambi ndo wanyaso anto kayototshutshuya dia tetemala mbetɛ anto ambeki l’ɛnyɛlɔ k’apɔstɔlɔ wa lo ntambe ka ntondo ‘aha la mpekɔ.’ (Etsha 5:42) Ɛlɔ kɛnɛ, anto efula wekɔ lo ‘kuma akumu ndo wekɔ lo ndela l’ɔtɛ w’akambo tshɛ wa wɔnɔnyi’ wasalema. (Ezek. 9:4) Ande elongamelo ndo ekeketshelo katolongolaka anto asɔ etena katowokaka lokumu l’ɔlɔlɔ lee! Kânga etena katona anto efula dia tohokamɛ, Afundelo toshikikɛka dia Jehowa ngɛnangɛnaka welo wadjaso.—Heb. 13:15, 16.