Tosambisha lo luudu la luudu aha pekɔ
1 L’Isariyɛlɛ w’edjedja, elambo wakalambwamaka nshi tshɛ. (Etum. 29:38-42) Dja ya l’ediakelo yakahɛtaka wenya tshɛ; edinga wakadɛka oma lɔkɔ aki “diowo dia ngenyangenya” diakangɛnyangɛnyaka Jehowa. (Etum. 29:18) Ɛlɔ kɛnɛ, sho tambelamɛ esadi esadi dia ‘nambola Nzambi olambo wa lotombo, kɛdikɛdi elowa wa l’ɛlɔmɔ watɛkɛta lo sɛkɛ dikambo dia lokombo lande.’ (Heb. 13:15) Lo dihole dia nambola elambo wakafundama l’Ɛlɛmbɛ, sho tekɔ lo tɛmɔla Jehowa lo tatetemalaka la dianganya lotombo lande.—Is. 43:21; Etsha 5:42.
2 Yeso Kristo, Ɔmɛnyi wakaleke woke l’andja w’otondo, akatolakanya woho wambetɛ ɔtɛmwɛlɔ pudipudi lo nambolaka elambo wa lotombo. Nde akalakanya ambeki ande ohomba wa losango lakawasambishaka. Nde akeyaka dia woho woleki dimɛna wa mbewoya anto lokumu l’ɔlɔlɔ aki dia ntshɔ lawakawɔ dia tosawola lawɔ vɔamɛmɛ. (Mat. 10:7, 12) Ɔnkɔnɛ, apɔstɔlɔ wakayele alako asɔ wakasambiyama oma le Nzambi lam’akawasambishaka lo luudu la luudu.—Etsha 20:20.
3 Woho akɔ wamɛ ndo elɔ kɛnɛ. Oko wewɔ ambeki wa Yeso, Akristo wa mɛtɛ wekɔ lo ndjela ɛnyɛlɔ kande lam’asambishawɔ lokumu l’ɔlɔlɔ lo luudu la luudu. Tena dimɔtshi vɔ sɔkamaka kana pɛnyahɛnyamaka lo dikambo sɔ, koko, ɔnɔnyi tshɛ, ambeki w’eyoyo nunu la nunu sanganaka la olui a woke; dikambo sɔ mɛnyaka dia ngasɔ mbalanga Jehowa dia lolango lande kotshama. Diɔ diakɔ diatetemalaso l’olimu.
4 Ɛlɔlɔ watomba oma lo esambishelo ka lo luudu la luudu: “[Nzambi, NW] kema la shonodi y’antu. Keli nde mbetawoka . . . wane wawuka woma la watsha akambo w’ololo.” (Etsha 10:34, 35) Lam’atshɔso mbala kakɔ ɔtɔi lo luudu la luudu lele lo mbilo kaso, sho ndjaɛnyaka mɛtɛ dia tekɔ anto waha la shɔnɔdi ndo sho mbishaka onto tshɛ diaaso dia nde mboka losango la Diolelo tena la tena. Wanɛ wetawɔ losango lakɔ kondjaka ekimanyielo kasungana l’ehomba awɔ.
5 Suke la apandjudi tshɛ, mbidja ndo ɛlɔngɔlɔngɔ, esombe ndo kânga eyoyo kokaka mbisha lonya l’esambishelo ka lo luudu la luudu. Ɔsɔku mbasala anto tshɛ “[wotelo wa lo sɛkɛ dikambo dia eko, NW].” (Rom. 10:10) Esambishelo ka lo luudu la luudu kâmɛ l’apandjudi akina tokakatanyaka lo amama wa ngandji. Oma lo diaaso diakɔ diamɛ, tɔ tokimanyiyaka dia sho mɛnya etete kaso kânga la ntondo ka diɔnyɔ kana ka wekamu. Lam’ɛnyaso mbetawɔ kaso lo sɛkɛ, sho komaka “endelu” ndo ɔsɔku mbakimanyiyaso anto akina w’etema ɛlɔlɔ dia vɔ mbeya ɔnɛ sho tambɔlɔngɔswamaka dikambo dia ndakanya Bible ndo ɔnɛ vɔ kokaka kondja wahɔ oma lo wetshelo ɔsɔ. (1 Kor. 4:9) Mɛnamaka hwe dia Jehowa ekɔ lo tshɔkɔla esambishelo ka lo luudu la luudu ndo nde ekɔ lo kamba la tɔ olimu dia tshumanya olui a woke lo “luudu” lande, mbut’ate l’ɔtɛmwɛlɔ wa pudipudi.—Is. 2:2-4.
6 Ɛlɔ kɛnɛ anyaso wekɔ l’ohomba wa mboka losango la Diolelo oleki nshi ya ntondo. Totetemale la sambisha lo luudu la luudu aha pekɔ, edja ndo lam’ayota Jehowa ate: ambokoka. (Is. 6:11) Naka tayosala ɔsɔku, kete tayokondja difuto nɛ: ɔngɛnɔngɛnɔ watomba oma l’esambishelo ka lo luudu la luudu, olimu w’ohomba efula l’etena k’ekomelo kɛnɛ.—1 Kor. 15:58.