Tɔkɛndɛkɛndɛ La Mbetawɔ
1 Miliyɔ y’anto mbahɛka nyumu yawɔ lo diangɔ dia l’emunyi, wayaɛkɛ tshanana lo wolo wa lokeso w’okundji. (Mat. 13:22) Etombelo mongaka ololo lam’ashishɔ ɛngɔnyi awɔ, lam’avamawɔ, kana naka waya bu ohomba efula. Wambotokeketsha wolo dia sho ndjela mboka kɛmɔtshi koleki ɔlɔlɔ, lo nyangaka ekundji wa lo nyuma l’etete tshɛ. (Mat. 6:19, 20) Kɛsɔ mɛnyaka ɔnɛ sho pombaka ‘kɛndakɛndaka la mbetawɔ.’—2 Kor. 5:7.
2 Tshɛkɛta y’ɔnɛ “mbetawɔ” kadimɔma oma lo tshɛkɛta ya lo Grɛkɛ yele la lokanyi la wɛkamelo, monga l’eshikikelo. Kɛndakɛnda la mbetawɔ kɛdikɛdi ntokomɛ ekakatanu lo ndjaɛkɛka le Nzambi, lo mbidjaka otema lo dikoka diande dia nɔmbɔla ekolo aso ndo lo lolango lande la tokotshɛ ehomba aso. Yeso mbishaka ɛnyɛlɔ ka kokele; nde akayasha tshɛ lo kɛnɛ kaki mɛtɛ ohomba. (Heb. 12:2) Woho akɔ wamɛ pombaka mbidja otema aso tshɛ lo diangɔ dia lo nyuma, nɛ diahɛnama. (2 Kor. 4:18) Teyake nshi tshɛ dia lɔsɛnɔ la nshi nyɛ lekɔ wandje, ndo teye dia sho mendɛka tshɛ oma le Nzambi.
3 Sho pombaka nto monga l’eshikikelo ɔnɛ Jehowa tɔlɔmbɔlaka lo tshimbo y’ɔlɔngɔswamelo ande wɛnama, l’ɛlɔmbwɛlɔ k’“ɔhɔmbɔ wa kɔlamelo ndo wa kɛsɔ.” (Mat. 24:45-47, NW) Sho mɛnyaka mbetawɔ kaso lo ‘kitanyiyaka wanɛ walɔmbɔla’ etshumanelo. (Heb. 13:17) Lo ndjaɔtɔnganyika la tɛdikɔ ta Teokrasi l’okitshakitsha tshɛ, sho mɛnyaka wɛkamelo aso le Jehowa. (1 Pet. 5:6) Sho pombaka tshutshuyama dia sukɛka tena tshɛ olimu wakakondja ɔlɔngɔswamelo. Ɔnkɔnɛ, lam’ayotomamatanaka wolo lo ngandji ndo lo kâmɛ, sho tayoyasukanyaka l’anangɛso.—1 Kor. 1:10.
4 Woho wa Keketsha Mbetawɔ Kaso: Tatosukukadiake mbetawɔ kaso. Sho pombaka ndɔsha wolo dia kihamia. Wekelo wa tena la tena, dɔmbɛlɔ ndo wɔtwɛlɔ wa lo nsanganya ayotokimanyiya dia sho keketsha mbetawɔ kaso, woho wa tɔ tshikala nge la ntondo ka woho tshɛ w’ohemba oma l’ekimanyielo ka Jehowa. (Ef. 6:16) Onde tamboyasalɛka ekongelo k’ɔlɔlɔ ka walelo wa Bible wa lushi la lushi ndo ka nɔngɔsɔlaka nsanganya? Onde sho kanaka yimba tena tshɛ lo kɛnɛ kekaso, ndo sho ndjasukanyaka le Jehowa lo dɔmbɛlɔ? Onde tekɔ la mbekelo ka mbɔtɔka lo nsanganya tshɛ ndo mbishaka kɔmatɛrɛ l’etena keso la diaaso?—Heb. 10:23-25.
5 Mbetawɔ ka wolo mɛnamaka oma l’etsha w’ɛlɔlɔ. (Jak. 2:26) Yoho mɔtshi yoleki ɔlɔlɔ ya mɛnya mbetawɔ kaso ele mbutɛ akina elongamelo kaso. Onde sho nyangaka waaso wa mbewoya lokumu l’ɔlɔlɔ? Ko naka sho nɔngɔsɔla akambo aso yema, onde tayoleka kondja diaaso dia sambisha efula? Onde sho ndjelaka alako wakondjaso dia nyomoleka nɔngɔsɔla ndo kamba olimu aso la wolo? Onde sho ndjadjɛka eyango wa lo nyuma ndo ndjatshutshuyaka dia mbakotsha?
6 Yeso akatewola oma lo wâle wa ndjasha tshɛ l’akambo wa nshi nyɛ wa lo lɔsɛnɔ, ndo dia tshikɛ eyango wa lomombo kana wa lokaki dihole dia vɔ fukutanya ɛnɛlɔ kaso ka lo nyuma. (Luka 21:34-36) Sho pombaka nama ɔlɔlɔ oko akɛndakɛndaso, di’aha sho ndjodindja mbetawɔ kaso. (Ef. 5:15; 1 Tim. 1:19) Onto l’onto l’atei aso nongamɛka dia mbuta lushi lokina ɔnɛ: “Dimi lakalo ta di’ololo, la[ka]shidiya esakelu ka luwangu, lakalami mbetawo.”—2 Tim. 4:7.