Toyale Diɛnyɛlɔ L’ɛtɛkɛta Ndo Lo Lɔkɛwɔ
1 Ɔpɔstɔlɔ Paulo akalɔmbɛ Timɔtɛ dia nde ndjâla ɛnyɛlɔ l’ɛtɛkɛta ndo lo lɔkɛwɔ. (1 Tim. 4:12) Ndo sho lawɔ pombaka monga l’ɛtɛkɛta ndo la lɔkɛwɔ l’ɔlɔlɔ, djekoleko lam’atatakambe olimu aso, nɛ dia waonga asɔ kokaka mɛnya ɔnɛ tayonanda etema w’anto wahomana la so kana kema.
2 Waonga aso w’ɛlɔlɔ pombaka mɛnama l’akambo tshɛ, ndo djekoleko oshidimikwelo aso, dilɛmiɛlɔ diaso, ɔlɔlɔ aso, loshilambo laso ndo yewo yaso. Lo mongaka la waonga asɔ, sho mɛnyaka ɔnɛ teyakɔ shɛngiya yokoki monga l’etsha aso le anto akina. Sho kokaka mbɛdika dionga di’ɔlɔlɔ l’olimu la tângangɔ tadjawɔ lo diangɔ dia mbisha ɔlɛtɛlɔ wa dimɛna. Naka diangɔ sɔ bu, kete mbo ya ndɛ y’ɔlɔlɔ yayonga ɔlɛlɔ ndo hokɛ saki efula. Naka sho hatongi la dionga di’ɔlɔlɔ lam’asawolaso l’anto, kete ayonga oko mbo ya ndɛ y’ɔlɛlɔ.—Kol. 4:6.
3 Toyale Diɛnyɛlɔ l’Ɛtɛkɛta: Ɔmɔnɔmɔnɔ wa la lɔngɛnyi ndo mɔyɔ wa la wangasanu ekɔ akambo w’ohomba efula lam’asambishaso lokumu l’ɔlɔlɔ. Etena ‘kamɔtshaso’ ɛtɛkɛta aso wa mbɔtwɛlɔ la wangasanu ndo awui wa mɛtɛ, ɔtɛkɛtshi aso mbokaka ɔnɛ mɛtɛ sho ndjashaka le nde. Tôlonge la yambalo tshɛ lam’atɛkɛtande ndo tɔlɛnya kanyi yande oko ahombama. Lam’atɛkɛtaso, tɔtɛkɛtɛ la yewo ndo lo yoho ya ngɛnyangɛnya onto.—Etsha 6:8.
4 Tena dimɔtshi sho tohomanaka l’onto latohetsha, kana kanga efata. Ngande wahombaso sala? Petero akatotɛ dia sho tɛkɛtaka la “lotutsha ndo la dilɛmiɛlɔ di’efula.” (1 Pet. 3:15, NW; Romo 12:17, 18) Yeso akate ate naka onto ambotona losango la Diolelo la lɔsɛndji tshɛ, diele laso ko ‘pomɛ ditshu di’oma l’akaka aso.’ (Mat. 10:14) Lo mongaka la dionga di’ɔlɔlɔ lo tena dia ngasɔ, sho mbeyaka tutsha etema w’anto watohetsha.
5 Toyale Diɛnyɛlɔ lo Lɔkɛwɔ: Sambisha lokumu l’ɔlɔlɔ l’ɛsɛsɛ weteta anto ndo l’ahole wele anto efula nɔmbaka dia sho monga la dilɛmiɛlɔ, mongaka nshi tshɛ la ndjakimɛ, aha tɛtɛ ndo aha futanya ambetshetshi. Etena keso laka anto wɛnya saki, sho pombaka ndjela ɛlɛmbɛ wa loshilambo ndo monga la lɔkɛwɔ l’angɛndangɛnda wele la loshilambo, wɛnya lowando lawɔ lo woho w’alongudiwɔ. Ɔna tshɛ latotshindɛ pombaka nɛmiya akanga a ngelo ndo diangɔ diawɔ, ndo nde pombaka nonga sawo la loshilambo tshɛ. Ana w’asɛndji mbishaka ɛnyɛlɔ ka kɔlɔ.—Tuk. 29:15.
6 Lo tenda tsho la asho, onto atamake dia sho tekɔ ekambi wa Dui dia Nzambi. Ɔlɔtɔ aso ndo lɔkɛndɔ laso hakoke monga otshatsha, kana ndeka kotola asho ndo monga tshambandeko. Ɛnamelo kaso kasunganake nshi tshɛ la lokumu l’ɔlɔlɔ! (Enda lo Filipi 1:27.) Naka tayodjaka yimba efula lo ɛnamelo kaso ndo lo akambo aso akina, kete hatototakanya akina ndoko yema kana mɔnyɔla olimu aso. (2 Kor. 6:3, 4) Ɛtɛkɛta aso ndo lɔkɛwɔ laso l’ɔlɔlɔ kotolaka anto lo losango la Diolelo, ndo tombolaka Jehowa.—1 Pet. 2:12.