Nsanganya Ya Wedja Efula L’amɛrika Wa Lo Nɔrdɛ Lo 1998

Oko akadiewoyama Lushi la Samalo lo Kɔlɛkɔlɛ 5, 1996 lo assemblée générale wa Watch Tower Bible and Tract Society of Pennsylvania wɔtɔma ɔnɔnyi l’ɔnɔnyi, Olui Walɔmbɔla ekɔ lo sangoya dia nɔngɔsɔla nsanganya ya wedja efula lo 1998. Lâdiko dia nsanganya ya distrikɛ yôkɔtɔmaka, nsanganya ya wedja tshɛ yayɔlɔngɔsɔma l’Amɛrika wa lo Nɔrdɛ kâmɛ ndo l’Afrika, l’Asiya, la Mputu, l’Amɛrika wa la Diko dia Nkushi, l’Antilles la lo Pacifique Sud.

Efula ka nsanganya shɔ ya lânde yayosalema l’Amɛrika wa lo Nɔrdɛ, ko atomami w’oma l’andja w’otondo wayelamɛ lɔkɔ. Lâdiko dia lâsɔ, tekɔ lo sangoya dia nongola wa misiɔnɛrɛ lo nsanganya shɔ ya wedja efula. Wa misiɔnɛrɛ l’anangɛso akina wayasha tshɛ l’olimu wa lânde lo wedja ekina ndo wele l’akoka walɔmbama, wayelamɛ dia ndjɔtɔ lo losanganya lɔmɔtshi l’atei ayɔ lo wedja awɔ hita, kana lo wodja ɔmɔtshi wosukanyi la lakawɔ.

Mbala kekina nyayolongola waewoyelo akina efula lo kɛnɛ kendana la adatɛ, ahole, kɛnɛ kalɔmbama di’onto tomama lo losanganya lakɔ, tɛdikɔ tambɔsama lo dikambo dia atomami wayoya oma lo wedja ekina ndo awui akina nto w’ɔm’ɔmɔ. Atomami amɔtshi ato wa l’États-Unis wayonga la diaaso dia mbɔtɔ lo nsanganya ya wedja efula lo wedja ekina. Apandjudi wasangoya dia ndodja dɛmandɛ dia monga l’atei w’atomami asɔ mbeyaka ondo tatɛ la momba falanga dia mangemɛka akambo wa lânde asɔ wayosalema.